ໜັງສືພິມ ປະຊາຊົນ

ນັກທ່ອງທ່ຽວທົ່ວໂລກຫຼຸດລົງ 80% ໃນປີນີ້

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 27/05/2020 09:44:01 ຈຳນວນຢ້ຽມຊົມ 1032 ຄັ້ງ

ຮຽບຮຽງໂດຍ: ວິໄລພອນ ເພັດໄພບູນ

ອົງການການທ່ອງທ່ຽວໂລກ (World Tourism Organization) ຊຶ່ງເປັນໜ່ວຍງານພາຍໃຕ້ການຄວບຄຸມຂອງສະຫະປະຊາຊາດ (UN) ໄດ້ເປີດເຜີຍບົດລາຍງານການຄາດຄະເນຫຼ້າສຸດວ່າ: ຈໍານວນ ນັກທ່ອງທ່ຽວສາກົນ ໃນປີ 2020 ຈະຫຼຸດລົງຢ່າງຫຼວງຫຼາຍລະຫວ່າງ 60%-80% ຖືວ່າ ເປັນໂຕເລກທີ່ຕ່ຳກວ່າທີ່ເຄີຍ ຄາດຄະເນໄວ້ກ່ອນໜ້ານີ້.
ສະຖານະການທີ່ກ່າວມານັ້ນ, ເປັນຜົນມາຈາກການຈຳ ກັດການເດີນທາງຂອງປະເທດຕ່າງໆທົ່ວໂລກ. ການສັ່ງປິດສະໜາມບິນ ແລະ ຊາຍແດນ ເພື່ອປ້ອງກັນການລະບາດຂອງໂຣກ COVID-19, ເຮັດໃຫ້ຈໍານວນນັກທ່ອງທ່ຽວຫຼຸດລົງໃນລະດັບຕ່ຳທີ່ສຸດ ນັບຕັ້ງແຕ່ມີການເລີ່ມຈົດບັນທຶກໃນປີ 1950. ບົດລາຍງານສະບັບນີ້ ຂອງອົງການການທ່ອງທ່ຽວໂລກ ຊຶ່ງມີສຳນັກງານໃຫຍ່ຢູ່ໃນນະຄອນຫຼວງມາດຣິດຂອງແອັດສະປາຍ ລະບຸວ່າ: ການເດີນທາງມາຢ້ຽມຢາມຂອງນັກທ່ອງທ່ຽວຫຼຸດລົງ 22%, ໃນໄລຍະ 3 ເດືອນທຳອິດຂອງປີ ແລະ ສະເພາະໃນເດືອນມີນາ ປະມານ 57% ໂດຍພາກພື້ນອາຊີ ແລະ ເອີຣົບ ໄດ້ຮັບຜົນກະທົບຫຼາຍທີ່ສຸດ ຈາກການຫຼຸດລົງຂອງຈຳນວນນັກທ່ອງທ່ຽວ.
ທ່ານ ຊູຣາບ ໂພໂລລິຄາດວິລີ ເລຂາທິການໃຫຍ່ອົງການທ່ອງທ່ຽວໂລກກ່າວວ່າ: ທົ່ວໂລກກຳລັງປະເຊີນໜ້າກັບວິກິດດ້ານສຸຂະພາບ ແລະ ເສດ ຖະກິດ ຢ່າງທີ່ບໍ່ເຄີຍເກີດຂຶ້ນມາກ່ອນ. ການທ່ອງທ່ຽວໄດ້ຮັບ ຜົນກະທົບຫຼາຍທີ່ສຸດ ແລະ ເຮັດໃຫ້ຫຼາຍລ້ານຕຳແໜ່ງງານກຳລັງຕົກຢູ່ໃນຄວາມສ່ຽງ. ທັງ ນີ້, ອຸດສາຫະກຳການບິນທີ່ກ່ຽວກັບການທ່ອງທ່ຽວ ແລະ ການເດີນທາງ ໄດ້ຮັບຜົນກະທົບໜັກທີ່ສຸດຈາກການລະບາດຂອງໂຣກ COVID-19 ທີ່ພົບວ່າມີຜູ້ຕິດເຊື້ອລາຍທໍາອິດໃນຈີນ ເມື່ອຕົ້ນປີນີ້, ຖ້ຽວບິນເກືອບທັງໝົດຖືກຍົກເລີກ ແຕ່ກຸ່ມທຸລະກິດໂຮງແຮມ, ເຮືອສໍາລານ ແລະ ຜູ້ໃຫ້ບໍລິການນໍາທ່ຽວກໍາລັງຕໍ່ສູ້ເພື່ອເອົາຕົວລອດຈາກວິກິດຄັ້ງນີ້.
ອົງການການທ່ອງທ່ຽວໂລກ ເຄີຍຄາດຄະເນໄວ້ວ່າ: ໃນໄລຍະຕົ້ນປີນີ້, ການທ່ອງທ່ຽວທົ່ວໂລກຈະຂະຫຍາຍຕົວປະມານ 3%-4%, ແຕ່ໃນໄລຍະທ້າຍເດືອນມີນາຜ່ານມາ, ໄດ້ປັບໂຕເລກການຄາດຄະເນ ໃໝ່ ໂດຍຄາດວ່າ: ອຸດສາຫະກໍາການທ່ອງທ່ຽວ ຈະຫຼຸດລົງປະມານ 20%-30%. ພ້ອມທັງລະບຸວ່າ: ຈຳນວນນັກທ່ອງທ່ຽວທົ່ວໂລກ ຈະຫຼຸດລົງຫຼາຍເທົ່າໃດ ແມ່ນຂຶ້ນຢູ່ກັບໄລຍະເວລາຂອງການໃຊ້ມາດຕະການຄຸມເຂັ້ມດ້ານການເດີນທາງ ແລະ ການເປີດຊາຍແດນ ຈະໃຊ້ເວລາຫຼາຍເທົ່າໃດ. ຕາມການ ຄາດຄະເນ, ຖ້າຫາກຜ່ອນຄາຍກົດລະບຽບດ້ານການເດີນທາງເລີ່ມຂຶ້ນ ໃນໄລຍະຕົ້ນເດືອນກໍລະກົດນີ້, ຈຳນວນນັກທ່ອງທ່ຽວທົ່ວໂລກ ອາດຈະຫຼຸດລົງປະມານ 58%.
ຂະນະທີ່ການຄາດຄະເນໃນກໍລະນີທີ່ຮ້າຍແຮງທີ່ສຸດ, ຖ້າຫາກປະເທດຕ່າງໆ ຍົກ ເລີກການປິດຊາຍແດນໃນຕົ້ນເດືອນທັນວາປີນີ້, ຈໍານວນນັກທ່ອງທ່ຽວທົ່ວໂລກ ຈະຫາຍໄປປະມານ 78% ແລະ ຖ້າປະເທດຕ່າງໆ ຍົກເລີກມາດຕະການປິດເມືອງ ໃນໄລຍະຕົ້ນເດືອນກັນ ຍານີ້, ຈຳນວນນັກທ່ອງທ່ຽວທົ່ວໂລກຈະຫາຍໄປປະມານ 70%. ພາຍໃຕ້ການຄາດຄະເນເຫຼົ່ານີ້, ອຸດສາຫະກໍາການທ່ອງທ່ຽວທົ່ວໂລກອາດຈະສູນເສຍລາຍໄດ້ປະມານ 910.000 ລ້ານໂດລາ ເຖິງ 1,2 ລ້ານໆໂດລາ ແລະ ແຮງງານໃນອຸດສາຫະກຳນີ້ ຕ້ອງວ່າງງານປະມານ 100 - 120 ລ້ານຄົນ.
ໜ່ວຍງານດ້ານການ ທ່ອງທ່ຽວຂອງ UN ລະບຸວ່າ: ມີສັນຍານການຟື້ນຕົວຂອງອຸດສາຫະກໍາການທ່ອງທ່ຽວທົ່ວໂລກ ໃນໄລຍະໄຕມາດສຸດ ທ້າຍຂອງປີ 2020, ແຕ່ຈະຟື້ນຕົວເຕັມທີ່ໃນປີ 2021 ໂດຍພາກພື້ນອາຊີ-ປາຊີຟິກ ຈະເປັນພາກພື້ນທຳອິດ ທີ່ອຸດສາຫະ ກຳການທ່ອງທ່ຽວຟື້ນຕົວກ່ອນ ແລະ ຄາດວ່າ: ການທ່ອງທ່ຽວໃນປະເທດຈະຟື້ນຕົວກ່ອນການທ່ອງທ່ຽວ ລະຫວ່າງ ປະເທດ. ທັງນີ້, ການເຜີຍແຜ່ຂໍ້ມູນຖືວ່າເປັນເລື່ອງທີ່ສຳຄັນເຊັ່ນ: ກໍລະນີ ຄະນະກຳມະການສຸຂະພາບແຫ່ງຊາດ (NHC) ໄດ້ຮວບຮວມແຜນການ ແລະ ຮັກສາແຜນປ້ອງກັນ, ຄວບຄຸມ ລວມເຖິງເອກະສານທາງເຕັກ ນິກໃໝ່ຫຼ້າສຸດ ແລະ ແບ່ງປັນໃຫ້ 180 ປະເທດທົ່ວໂລກ ລວມເຖິງອົງການສາກົນ ແລະ ພາກພື້ນຫຼາຍກວ່າ 10 ແຫ່ງ ຮ່ວມຮັບຮູ້ໂດຍໄວ.