ໜັງສືພິມ ປະຊາຊົນ

ຟີລິບປິນ ຈະບໍ່ເປີດຮຽນຈົນກວ່າຈະມີ ວັກຊິນປ້ອງກັນ COVID-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 28/05/2020 08:58:08 ຈຳນວນຢ້ຽມຊົມ 890 ຄັ້ງ

ຂ່າວຕ່າງປະເທດລາຍງານ ວັນທີ 27 ພຶດສະພາ, ທ່ານປະທານາທິບໍດີ ໂຣດິຣໂກ ດູເຕີເຕ ຂອງຟີລິບປິນກ່າວວ່າ ຈະບໍ່ອະນຸຍາດໃຫ້ນັກຮຽນໄປໂຮງຮຽນຈົນກວ່າຈະມີວັກຊິນຕ້ານໄວຣັສໂຄໂຣນາສາຍພັນໃໝ່ (COVID-19) ເຊັ່ນດຽວກັບບາງປະເທດທີ່ສັ່ງໃຫ້ມີການຮຽນການສອນຜ່ານອອນລາຍ.
ບັນດານັກຮຽນຊັ້ນອະນຸ ບານໃນຟີລິບປິນຈະຕ້ອງກັບ ໄປໂຮງຮຽນ ຊຶ່ງມີກຳນົດເປີດ ຮຽນໃນທ້າຍເດືອນສິງຫານີ້ ຫຼັງຈາກທີ່ໂຮງຮຽນລະດັບປະຖົມສຶກສາ ແລະ ມັດທະຍົມສຶກສາຖືກສັ່ງໃຫ້ປິດຕັ້ງແຕ່ເດືອນມີນາທີ່ຜ່ານມາ ເນື່ອງຈາກສະ ຖານະການ ການແຜ່ລະບາດ ຂອງໂຣກ COVID-19 ໂດຍ ທ່ານປະທານາທິບໍດີ ດູເຕີເຕ ກ່າວວ່າ ມີຄວາມສ່ຽງເກີນໄປທີ່ຈະໃຫ້ນັກຮຽນກັບໄປສູ່ລະບົບໂຮງຮຽນ ແລະ ບໍ່ໝັ້ນໃຈວ່າ ພວກເຂົາຈະປອດໄພຢ່າງແທ້ຈິງ ຖ້າຈະໃຫ້ເປີດຮຽນໃນຕອນນີ້. ເຖິງຢ່າງໃດກໍຕາມ, ທ່ານປະທານາທິບໍດີ ດູເຕີເຕ ກ່າວເນັ້ນວ່າ ສຳລັບທ່ານ ວັກຊິນຕ້ອງມາກ່ອນ ຖ້າມີວັກຊິນຕ້ານ COVID-19 ທຸກຢ່າງກໍຈະດຳເນີນການຕາມປົກກະຕິ.
ຂ່າວແຈ້ງວ່າ ລັດຖະບານຟີລິບປິນ ກຳລັງພິຈາລະນາຫຼຸດລະດັບມາດຕະການລັອກດາວພາຍໃນປະເທດ ຈາກແຕ່ ກ່ອນທີ່ຈະຄວບຄຸມໃນລະດັບ ພູມີພາກລົງເຫຼືອພຽງລະດັບ ຊຸມຊົນ ເພື່ອເປັນການກຽມຄວາມພ້ອມໃນການເປີດເສດ ຖະ ກິດປະເທດ ພາຍຫຼັງລັດຖະ ບານຟີລິບປິນປະກາດໃຊ້ມາດຕະ ການລັອກດາວດົນກວ່າ 2 ເດືອນ ຕັ້ງແຕ່ວັນທີ 16 ພຶດ ສະພາທີ່ຜ່ານມາ, ທຸລະກິດສ່ວນໃຫຍ່ໃນນະຄອນຫຼວງມະນີລາໄດ້ຮັບການອະນຸຍາດໃຫ້ເປີດກິດຈະການບາງສ່ວນ ຂະນະທີ່ຍັງໃຫ້ຄວາມສຳຄັນກັບມາດຕະການ ການຮັກສາໄລຍະຫ່າງທາງສັງຄົມຢ່າງ ເຂັ້ມງວດ.