ເຈົ້າແຂວງໄຊຍະບູລີ ຊຸກຍູ້ວຽກງານ ກະສິກຳ ຢູ່ເມືອງໄຊຍະບູລີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 01/06/2020 09:35:24 ຈຳ​ນວນ​​ຢ້ຽມ​ຊົມ 1485 ຄັ້ງ

ທ່ານ  ພົງສະຫວັນ ສິດທະວົງ  ກຳມະການສູນກາງພັກ ເລຂາພັກແຂວງ ເຈົ້າແຂວງ ໄຊຍະບູລີ  ໄດ້ລົງຊຸກຍູ້ວຽກງານກະສິກຳຢູ່ເມືອງ   ໄຊຍະບູລີ ເມື່ອບໍ່ດົນຜ່ານມານີ້ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ບຸນແທນ ທີແກ້ວ ກຳ ມະການພັກແຂວງ  ເລຂາພັກ ເມືອງ  ເຈົ້າເມືອງໄຊຍະບູລີ ພ້ອມດ້ວຍການນຳຂອງເມືອງ ໃນການລົງຊຸກຍູ້ຄັ້ງນີ້ ທ່ານ ເຈົ້າແຂວງໄຊຍະບູລີ  ແລະ  ການນຳຂອງເມືອງໄຊຍະບູລີກໍໄດ້ລົງເບິ່ງການກໍ່ສ້າງໂຮງເຮືອນ, ເຄື່ອງຄັດ, ເຄື່ອງອົບເມັດພັນເຂົ້າ,  ການກໍ່ສ້າງຕາຝັ່ງກັນເຈື່ອນແຄມນ້ຳຮຸ່ງບ້ານນາລາ,  ລົງກວດເບິ່ງຫົວງານໄດສູບນ້ຳໃສ່ນາບ້ານນາຍາວ ແລະ ການປູກໄມ້ໃຫ້ໝາກຂອງບໍລິສັດລິວຈົງຮົວບ້ານວັງຊອຍ ຊຶ່ງການຜະລິດລະດູແລ້ງໃນສົກປີ 2019-2020 ເມືອງໄຊຍະບູລີສາມາດຜະລິດເຂົ້າ ນາແຊງໄດ້ 438 ເຮັກຕາ, ຜົນຜະລິດໄດ້ 2.000 ກວ່າໂຕນເທົ່າກັບ 98% ຂອງແຜນການປີ,  ການປູກພືດຊະນິດຕ່າງໆໄດ້ 4.321 ເຮັກຕາ  ຜົນຜະລິດໄດ້ 37.542 ໂຕນ, ສ່ວນທິດທາງການຈັດຕັ້ງປະຕິບັດການຜະລິດລະດູຝົນ  2020  ເມືອງໄຊຍະບູລີຈະຜະ ລິດເຂົ້ານາປີໃນເນື້ອທີ່ 4.370 ເຮັກຕາ,  ປູກພືດຊະນິດຕ່າງໆໃຫ້ໄດ້ 15.653 ເຮັກຕາ, ປູກໄມ້ຊະນິດຕ່າງໆໃນເນື້ອທີ່  900 ກວ່າເຮັກຕາ.

ໃນໂອກາດທີ່ລົງຊຸກຍູ້ໃນ ຄັ້ງນີ້ທ່ານເຈົ້າແຂວງໄຊຍະບູລີ ກໍໄດ້ເນັ້ນໜັກໃຫ້ພໍ່ແມ່ປະຊາ ຊົນພາຍໃນເມືອງສືບຕໍ່ໃນການຜະລິດປູກພືດຊະນິດຕ່າງໆເປັນຕົ້ນແມ່ນການປູກເຂົ້ານາປີ, ປູກພືດຜັກ ແລະ ປູກໄມ້ໃຫ້ໝາກຊະນິດຕ່າງໆໃຫ້ຫຼາຍຂຶ້ນກວ່າເກົ່າທັງນີ້ ກໍເພື່ອເປັນການສ້າງເສດຖະກິດຄອບຄົວຂອງຕົນໃຫ້ມີຄວາມເຂັ້ມແຂງກ້າວຂຶ້ນໄປເລື້ອຍໆ. 

(ຂ່າວ-ພາບ: ສົມພົງ ສີສະຫວັດ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110