ໜັງສືພິມ ປະຊາຊົນ

ຫວຽດນາມ ຫາລືມາດຕະການຟື້ນຟູເສດຖະກິດຈຸດສຸມ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 02/06/2020 08:51:02 ຈຳນວນຢ້ຽມຊົມ 396 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ວັນທີ 30 ພຶດສະພາຜ່ານມາ, ຢູ່ແຂວງບ່າເຣ້ຍ - ຫວຸ້ງເຕົ່າ, ທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ໄດ້ເປັນປະທານກອງປະຊຸມ ກັບການນໍາຫຼັກແຫຼ່ງ 8 ແຂວງເຂດເສດຖະກິດຈຸດສຸມທາງພາກໃຕ້ ກ່ຽວກັບໜ້າທີ່ພັດທະນາເສດຖະກິດສັງຄົມ.
ຂ່າວລະບຸວ່າ, ໃນກອງປະຊຸມ, ທ່ານນາຍົກລັດຖະ ມົນຕີຫວຽດນາມ ກ່າວວ່າ: ຕ້ອງວາງນະໂຍບາຍແນວໃດ ເພື່ອຊຸກຍູ້ການພັດທະນາເສດຖະກິດ-ສັງຄົມຂອງປະເທດຊາດ. ໂດຍສະເພາະ ແມ່ນບັນດາແຂວງຢູ່ເຂດເສດຖະກິດຈຸດສຸມທາງພາກໃຕ້ ສວມບົດບາດສໍາຄັນສໍາລັບປະເທດຊາດ ຊຶ່ງກວມເອົາ 42% GDP ແລະ ງົບປະມານແຫ່ງລັດກວມ 42%. ເພື່ອສາມາດບັນລຸໄດ້ເປົ້າໝາຍພື້ນຖານເສດຖະກິດ ທີ່ມີລາຍຮັບສູງໃນປີ 2045.
ທ່ານ ຫງວຽນຊວັກຟຸກ ກ່າວຕື່ມວ່າ: ດ້ວຍທີ່ຕັ້ງບົດບາດຂອງເຂດເສດຖະກິດຈຸດສຸມທາງພາກໃຕ້, ການນໍາຂັ້ນສູງຫວຽດນາມສະເໜີວ່າ: ໜຶ່ງ; ພື້ນຖານເສດຖະກິດໂລກພວມຊຸດໂຊມຢ່າງແຮງ ແລະ ມີການເຕີບໂຕທາງລົບ, ຫວຽດນາມ ຕ້ອງສູ້ຊົນຫຼາຍກວ່າເກົ່າ, ເພື່ອບັນລຸລື່ນກາຍລະດັບ ຫຼື ທຽບເທົ່າກັບລະດັບ ຊຶ່ງແຜນການຂອງລັດໄດ້ມອບໝາຍໃຫ້. ເພາະສະນັ້ນ, ທ່ານ ຫງວຽນຊວັນຟຸກ ສະເໜີ ຕ້ອງມີວິທີການແກ້ໄຂ ແລະ ມາດຕະການປະຕິບັດເພີ່ມເຕີມ.
ນອກຈາກນັ້ນ, ທ່ານນາ ຍົກລັດຖະມົນຕີຫວຽດນາມ ກໍສະເໜີໃຫ້ບັນດາທ້ອງຖິ່ນດັ່ງກ່າວ ຈົ່ງສຸມໃສ່ການພັດ ທະນາບັນດາເຂດອຸດສາຫະກໍາ, ເຂດຕົວເມືອງອັດສະລິຍະ. ພ້ອມທັງຮຽກຮ້ອງໃຫ້ມີມາດຕະການພັດທະນາເສດຖະກິດພາກເອກະຊົນ; ພັດທະນາເສດຖະກິດດີຈີຕອນ ແລະ ບັນດາຮູບແບບດໍາເນີນທຸລະກິດໃໝ່, ກະຕຸ້ນຄວາມຕ້ອງການພາຍໃນປະເທດ ແລະ ຍູ້ແຮງການສົ່ງອອກ.