ໜັງສືພິມ ປະຊາຊົນ

ທ່ານທູດ ສປ ຈີນ ປະຈຳ ສປປ ລາວ ໃຫ້ສຳພາດກ່ຽວກັບການສ້າງກົດໝາຍການຮັກສາຄວາມໝັ້ນຄົງແຫ່ງຊາດຂອງຮົງກົງ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 02/06/2020 08:52:50 ຈຳນວນຢ້ຽມຊົມ 667 ຄັ້ງ

ເມື່ອທ້າຍອາທິດຜ່ານມາ, ທ່ານ ຈ່ຽງ ຈາຍດົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ຕອບສຳພາດສື່ມວນຊົນລາວກ່ຽວກັບລັດຖະບານສູນກາງຈີນ ຊຸກຍູ້ການສ້າງກົດໝາຍວ່າດ້ວຍຮັກສາຄວາມໝັ້ນຄົງແຫ່ງຊາດຂອງຮົງກົງ
ຄຳຖາມ 1. ເປັນຫຍັງໃນເວລານີ້ຝ່າຍຈີນຕ້ອງສົ່ງ ເສີມການສ້າງ ແລະ ປັບປຸງລະບຽບກົດໝາຍ ແລະ ກົນໄກປະຕິບັດກົດໝາຍຂອງເຂດປົກຄອງພິເສດຮົງກົງໃນການປົກປັກຮັກສາຄວາມໝັ້ນຄົງແຫ່ງຊາດ ?
ຕອບ: ພາຍຫຼັງຮົງກົງກັບຄືນສູ່ປະເທດຈີນ ຈີນໄດ້ຈັດຕັ້ງປະຕິບັດທິດທາງນະໂຍບາຍ “ປະເທດດຽວສອງລະບອບ” “ຊາວຮົງກົງປົກຄອງຮົງກົງ” ແລະ ປົກຄອງຕົນເອງໃນລະດັບສູງ ແລະ “ປະເທດດຽວສອງລະບອບ” ໄດ້ປະສົບຜົນສໍາເລັດທີ່ບໍ່ເຄີຍມີມາກ່ອນໃນຮົງກົງ. ປັດຈຸບັນ, ບັນຫາທີ່ພົ້ນເດັ່ນແມ່ນຄວາມສ່ຽງທີ່ມີອັນຕະລາຍເຖິງຄວາມໝັ້ນຄົງແຫ່ງຊາດໃນຮົງກົງ ໂດຍສະ ເພາະນັບຕັ້ງແຕ່ເຫດການປັ່ນປ່ວນທີ່ເກີດຂຶ້ນຢູ່ຮົງກົງ ໃນປີ 2019, ການກໍ່ການຮ້າຍສືບຕໍ່ຍົກລະດັບສູງຂຶ້ນ ແລະ ອິດທິກຳລັງພາຍນອກໄດ້ແຊກແຊງເຂົ້າເລິກວຽກງານຮົງກົງຢ່າງຜິດກົດໝາຍ. ທັງໝົດເຫຼົ່ານີ້ລ້ວນແຕ່ໄດ້ທຳລາຍຄວາມໝັ້ນຄົງແຫ່ງຊາດຂອງຈີນຢ່າງໜັກໜ່ວງ, ຍັງເປັນການຂົ່ມຂູ່ຢ່າງໃຫຍ່ຫຼວງຕໍ່ຮົງກົງໃນການຮັກສາຄວາມຈະເລີນຮຸ່ງເຮືອງ ແລະ ສະຖຽນລະພາບ ຂະນະທີ່ຊຸກຍູ້ນະໂຍບາຍ “ປະເທດດຽວສອງລະບອບ”, ຈຳເປັນຕ້ອງປະຕິບັດມາດຕະການເຂັ້ມແຂງ ເພື່ອປ້ອງກັນ, ສະກັດກັ້ນ ແລະລົງໂທດ.
ສັງລວມແລ້ວ, ການຮັກ ສາຄວາມໝັ້ນຄົງຂອງຊາດ ແມ່ນໜ້າທີ່ຂອງອົງການປົກ ຄອງສູນກາງ. ລັດຖະບານກາງມີຄວາມຮັບຜິດຊອບສູງສຸດແລະ ສຸດທ້າຍ ສຳລັບຄວາມໝັ້ນຄົງແຫ່ງຊາດ ຂອງບັນດາທ້ອງຖິ່ນ ພ້ອມທັງສາມາດຊົມ ໃຊ້ທຸກສິດທີ່ຈຳເປັນ ນີ້ແມ່ນທິດສະດີພື້ນຖານ ແລະ ຫຼັກການຂອງອະທິປະໄຕແຫ່ງຊາດແລະ ກໍແມ່ນມູນເຊື້ອຂອງທຸກໆປະເທດໃນໂລກ. ລັດຖະບານກາງຂອງຈີນມີຄວາມເປັນຫ່ວງທີ່ສຸດຕໍ່ຄວາມຈະເລີນຮຸ່ງເຮືອງແລະ ສະຖຽນລະພາບຂອງຮົງກົງ ແລະ ສະຫວັດດີການຂອງພີ່ນ້ອງຮົງກົງ, ບໍ່ອະນຸຍາດໃຫ້ອິດທິກຳລັງສັດຕູທັງພາຍໃນ ແລະ ພາຍນອກດໍາເນີນກິດຈະການຕ່າງໆ ທີ່ຫວັງແຊກແຊງເຂົ້າໃນວຽກງານ ຮົງກົງ.
ຄຳຖາມ 2. ຝ່າຍຈີນຈະສ້າງ ແລະ ປັບປຸງລະບຽບກົດໝາຍ ແລະ ກົນໄກປະຕິບັດກົດໝາຍຂອງເຂດປົກຄອງພິເສດຮົງກົງໃຫ້ສົມບູນ ເພື່ອປ້ອງກັນຄວາມປອດໄພແຫ່ງຊາດຄືແນວໃດ?
ຕອບ: ໃນຂະບວນການສ້າງ ແລະ ປັບປຸງລະບຽບກົດ ໝາຍ ແລະ ກົນໄກປະຕິບັດກົດໝາຍຂອງເຂດປົກຄອງພິເສດຮົງກົງ ເພື່ອປ້ອງກັນຄວາມປອດໄພແຫ່ງຊາດ ໃນຂັ້ນຊາດໃນສະຖານະການໃໝ່ ພວກຂ້າພະເຈົ້າຈະຢຶດໝັ້ນການຊີ້ນຳ ນຳພາ ໂດຍທິດສະດີສັງຄົມນິຍົມ ຕາມສີສັນພິເສດຈີນໃນຍຸກສະໄໝໃໝ່ຂອງ ທ່ານ ສີຈິ້ນຜິງ ຈັດຕັ້ງປະຕິບັດທັດສະນະຄວາມປອດໄພແຫ່ງຊາດໃຫ້ລົງເລິກ ຢຶດໝັ້ນ ແລະ ປັບປຸງລະບົບຈີນດຽວ ສອງລະບອບໃຫ້ສົມບູນ ໃຫ້ການປ້ອງກັນສິດປົກຄອງຮອບດ້ານຕໍ່ເຂດປົກຄອງພິເສດຂອງສູນກາງສົມທົບກັບການປ້ອງກັນສິດປົກຄອງຕົວເອງຢ່າງສູງຂອງເຂດປົກຄອງພິເສດໃຫ້ດີ ປ້ອງກັນຄວາມໝັ້ນຄົງ ແລະ ຄວາມຈະເລີນຂອງຮົງກົງໃນໄລຍະຍາວ ແລະ ຮັບປະກັນຫຼັກການ ຈີນດຽວ ສອງລະບອບ ບໍ່ປ່ຽນ ບໍ່ສັ້ນ ຮັບປະກັນພຶດຕິກຳການຈັດຕັ້ງປະຕິດບັດ ຈີນດຽວ ສອງລະບອບ ບໍ່ປ່ຽນຮູບ ບໍ່ປ່ຽນແບບ.
ອີງຕາມແນວຄິດດັ່ງກ່າວນີ້ ພວກຂ້າພະເຈົ້າຈະນຳໃຊ້ຮູບແບບທີ່ ການຕັດສິນຂໍ້ຕົກລົງ ບວກ ການສ້າງນິຕິກຳ ແລະ ດຳເນີນຕາມສອງຂັ້ນຕອນ. ຂັ້ນຕອນທີໜຶ່ງ ກອງປະຊຸມສະພາຜູ້ແທນປະຊາຊົນທົ່ວປະເທດຈະອີງຕາມລັດຖະທຳມະນູນ ແລະ ກົດໝາຍພື້ນຖານຂອງຮົງກົງ ຕັດສິນຂໍ້ຕົກລົງກ່ຽວກັບການສ້າງ ແລະ ປັບປຸງລະບຽບກົດໝາຍ ແລະ ກົນໄກປະຕິບັດກົດໝາຍຂອງເຂດປົກ ຄອງພິເສດຮົງກົງໃຫ້ສົມບູນ ແລະ ຮ່າງກົດລະບຽບພື້ນຖານໃຫ້ແກ່ບັນຫາທີ່ກ່ຽວຂ້ອງ. ໃນເວລາດຽວກັນ ມອບສິດໃຫ້ແກ່ຄະນະກຳມະການປະຈຳຂອງກອງປະຊຸມສະພາຜູ້ແທນປະຊາຊົນທົ່ວປະເທດ ເພື່ອສ້າງນິຕິກຳກ່ຽວກັບການສ້າງ ແລະ ປັບປຸງລະບຽບກົດໝາຍ ແລະ ກົນໄກປະຕິບັດກົດໝາຍຂອງເຂດປົກຄອງພິເສດຮົງກົງໃຫ້ສົມບູນ. ຂັ້ນຕອນທີ່ສອງ ຄະນະກຳມະການປະຈຳຂອງກອງປະຊຸມສະພາຜູ້ແທນປະຊາຊົນທົ່ວປະເທດຈະອີງຕາມລັດຖະທຳມະນູນ ກົດໝາຍພື້ນຖານຂອງຮົງກົງ ແລະ ສິດທີ່ມອບໂດຍຂໍ້ຕົກລົງຂອງກອງປະຊຸມສະພາຜູ້ແທນປະຊາຊົນທົ່ວປະເທດ ແລະ ສົມທົບສະພາບຕົວຈິງຂອງເຂດປົກຄອງພິເສດຮົງກົງ ມາຮ່າງກົດໝາຍທີ່ກ່ຽວຂ້ອງ ແລະ ເອົາກົດໝາຍນີ້ເຂົ້າໃນເອກະສານໝາຍເຫດເລກທີ່ສາມທີ່ຂັດຕິດນຳກົດໝາຍພື້ນຖານ ເພື່ອໃຫ້ຈັດຕັ້ງປະຕິບັດໃນເຂດປົກຄອງພິເສດຮົງກົງ.
ຄຳຖາມ 3. ທ່ານມີຄວາມເຫັນແນວໃດ ຕໍ່ການຕີລາຄາຈາກປະຊາຄົມໂລກ ໂດຍສະ ເພາະແມ່ນການຕີລາຄາທາງລົບຈາກບາງປະເທດຕໍ່ມະຕິຕົກລົງຂອງຝ່າຍຈີນ?
ຕອບ: ນັບຖືສິດອະທິປະໄຕ ແລະ ຜືນແຜ່ນດິນອັນຄົບຖ້ວນ ບໍ່ແຊກແຊງກິດຈະການພາຍໃນຊຶ່ງກັນ ແລະ ກັນ ແມ່ນຫຼັກການຂອງສາຍພົວພັນສາ ກົນທີ່ທຸກຝ່າຍກໍເຫັນດີເຫັນພ້ອມ, ການສ້າງກົດໝາຍວ່າດ້ວຍການຮັກສາຄວາມໝັ້ນຄົງແຫ່ງຊາດຂອງຮົງກົງ ແມ່ນກິດຈະການພາຍໃນຂອງຈີນ ປະເທດອື່ນໆກໍບໍ່ຄວນ ແລະ ບໍ່ມີສິດມາແຊກແຊງ. ພວກຂ້າ ພະເຈົ້າຍິນດີທີ່ໄດ້ເຫັນວ່າ ມີຫຼາຍປະເທດລວມເຖິງປະເທດລາວກໍໄດ້ສະແດງຄວາມເຫັນຂອງຕົນທີ່ວ່າ ສະໜັບສະໜູນປະເທດຈີນໃນການຮັກສາສິດອະທິປະໄຕ ຄວາມເອກະພາບແລະ ຜືນແຜ່ນດິນອັນຄົບຖ້ວນຂອງຕົນ, ຢຶດໝັ້ນຫຼັກການປະເທດຈີນດຽວ, ເນັ້ນໜັກວ່າ ຮົງກົງເປັນເຂດບໍລິຫານພິເສດຂອງຈີນ ພາຍໃຕ້ຂອບປະເທດດຽວສອງລະບອບ, ພ້ອມທັງໄດ້ປະກອບຄວາມເຫັນວ່າ ມະຕິຕົກລົງຂອງຝ່າຍຈີນ ສອດຄ່ອງກັບສະພາບຄວາມຈິງ ແລະລະບຽບກົດໝາຍ ເປັນສິດອັນຊອບທໍາໃນການຮັກສາຄວາມໝັ້ນຄົງ ແລະ ຜົນປະໂຫຍດຂອງຊາດ.
ພ້ອມນັ້ນ ພວກຂ້າພະເຈົ້າກໍຮູ້ສຶກເສຍດາຍທີ່ໄດ້ເຫັນວ່າ ໃນໂລກນີ້ ຍັງມີອິດທິກໍາລັງອັນໜຶ່ງ ຢຶດໝັ້ນລັດທິເຈົ້າອໍານາດ ຢຽບຢໍ່າຫຼັກການພື້ນຖານຂອງສາຍພົວພັນສາກົນ ແຊກແຊງການເມືອງຂອງປະເທດອື່ນຢ່າງຮ້າຍແຮງ.
ຂ້າພະເຈົ້າຕ້ອງເນັ້ນໜັກອີກວ່າ ຮົງກົງເປັນຮົງກົງຂອງປະເທດຈີນ ການສ້າງກົດໝາຍວ່າດ້ວຍການຮັກສາຄວາມໝັ້ນຄົງແຫ່ງຊາດຂອງຮົງກົງເປັນກິດຈະການພາຍໃນຂອງຈີນ. ລັດຖະບານຈີນມີຄວາມຕັດສິນໃຈຢ່າງເດັດດ່ຽວໃນການປ້ອງກັນສິດອະທິປະໄຕ ຄວາມໝັ້ນຄົງ ແລະ ຜົນປະໂຫຍດການພັດທະນາຂອງຊາດ, ມີຄວາມຕັດສິນໃຈຢ່າງເດັດດ່ຽວໃນການປະຕິບັດເຂັມທິດ ປະເທດດຽວສອງລະບອບ, ມີ ຄວາມຕັດສິນໃຈຢ່າງເດັດດ່ຽວໃນການຄັດຄ້ານອິດທິກໍາລັງພາຍນອກໃດໆທີ່ມາແຊກແຊງກິດຈະການຂອງຮົງກົງ. ເຈດຈໍານົງທີ່ຢາກແຊກແຊງກິດຈະການຂອງຮົງກົງ ແລະ ກົດໜ່ວງການພັດທະນາຂອງຈີນ ແນ່ນອນຈະປະລາໄຊຢ່າງຮາບຄາບ.
ຄຳຖາມ 4. ລັດຖະບານສູນກາງຈີນຊຸກຍູ້ການສ້າງກົດໝາຍວ່າດ້ວຍການຮັກສາຄວາມໝັ້ນຄົງແຫ່ງຊາດຂອງຮົງກົງ ຈະມີຜົນສະທ້ອນແນວໃດ ຕໍ່ການພັດທະນາຂອງຮົງກົງ?
ຕອບ: ຍ້ອນວ່າ ປະຊາຊົນຮົງກົງໄດ້ເຫັນເຖິງເປົ້າໝາຍແລະ ຮູ້ສຶກວ່າ ການສ້າງກົດ ໝາຍວ່າດ້ວຍການຮັກສາຄວາມໝັ້ນຄົງແຫ່ງຊາດຂອງຮົງກົງຈະເສີມສ້າງເງື່ອນໄຂທີ່ດີກວ່າເກົ່າໃຫ້ແກ່ການສຶກສາ ເຮືອນຢູ່ ການປະກອບອາຊີບແລະ ການດໍາລົງຊີວິດຂອງປະຊາຊົນຮົງກົງ, ສະນັ້ນ ຫຼັງຈາກກິດຈະກໍາລົງລາຍເຊັນສະໜັບສະໜູນສ້າງກົດໝາຍນີ້ ເລີ່ມຂຶ້ນພຽງແຕ່ສາມມື້ ກໍໄດ້ມີປະຊາຊົນຮົງກົງຈໍານວນ 1,1 ລ້ານຄົນ ໄປລົງລາຍເຊັນຢູ່ພາກສະໜາມ ຫຼື ຜ່ານອິນເຕີເນັດແລ້ວ ຊຶ່ງໄດ້ສະແດງໃຫ້ເຫັນວ່າ ການສ້າງກົດໝາຍນີ້ເປັນຄວາມຫວັງຂອງປະຊາຊົນທັງປວງ. ຄຽງຄູ່ກັນກັບການຊຸກຍູ້ຂັ້ນຕອນສ້າງກົດໝາຍ ຮົງກົງຈະມີລະບົບກົດໝາຍທີ່ຄົບຖ້ວນກວ່າເກົ່າ ລະບຽບສັງຄົມທີ່ໝັ້ນຄົງກວ່າເກົ່າ ສະພາບປະຕິບັດກົດໝາຍ ແລະ ດໍາເນີນທຸລະກິດທີ່ດີກວ່າເກົ່າ ຊຶ່ງຈະຊ່ວຍຮັກສາເຂັມທິດພື້ນຖານ ປະເທດດຽວສອງລະບອບ ຊ່ວຍຮັກສາຖານະທີ່ເປັນຈຸດໃຈກາງທາງດ້ານການຄ້າ ການທະນາຄານ ແລະ ການເດີນເຮືອຂອງຮົງກົງ. ປະຊາຊົນກໍຄອງຄອຍຢາກໃຫ້ ຮົງກົງມີອະນາຄົດທີ່ສົດໃສຕື່ມອີກ.