ບ້ານນ້ຳຍາງ ໄດ້ຮັບໃບຢັ້ງຢືນຄອບຄົວບ້ານວັດທະນະທຳ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 02/06/2020 08:57:52 ຈຳ​ນວນ​​ຢ້ຽມ​ຊົມ 5452 ຄັ້ງ

  ທ່ານ​ ສີ​ພູ​ວົງ ວິໄລ​ແກ້ວ ກໍາ​ມະ​ການ​ພັກ​ເມືອງ​ຫົວໜ້າ​ຫ້ອງການ​ຖະແຫຼງ​ຂ່າວ, ​ວັດທະນະ ແລະ ທ່ອງ​ທຽ່ວ​ເມືອງ ພ້ອມ​ດ້ວຍ​ພະນັກງານ​ໄດ້​ລົງ​ມອບ​ໃບຢັ້ງຢືນ​ຄອບຄົວ​ບ້ານ​ວັດ​ທະ​ນະ​ທໍາ ບ້ານ​ນໍ້າ​ຍາງ ເມືອງ​ຫົງ​ສາ ແຂວງ​ໄຊ​ຍະ​ບູ​ລີ  ​ເມື່ອບໍ່​ດົນ​ມານີ້ ຢູ່​ຫໍ​ປະຊຸມ​ບ້ານ​ດັ່ງກ່າວ  ການ​ມອບ​ໃບຢັ້ງຢືນ​ຄອບຄົວ​ວັດ​ທະ​ນະ​ທໍາ​ຄັ້ງ​ນີ້  ທາງ​ພະ​ແນ​ກ​ຖະແຫຼງ​ຂ່າວ​, ວັດ​ທະ​ນະ​ທໍາ ແລະ ທ່ອງ​ທ່ຽວ​ແຂວງ​ໄຊ​ຍະ​ບູ​ລີ ກໍຄື​ຫ້ອງການ​ຖະແຫຼງ​ຂ່າວ, ​ວັດ​ທະ​ນະ​ທໍາ ແລະ ທ່ອງ​ທ່ຽວ​ເມືອງ ພ້ອມ​ຫ້ອງການ​ທີ່​ກ່ຽວ​ຂ້ອງ ໄດ້​ລົງ​ກວດກາ ແລະ ເຫັນ​ດີ​ເປັນ​ເອກະ​ພາບ​ກັນ ຊຶ່ງ​ບ້ານ​ດັ່ງກ່າວ​ແມ່ນ​ໄດ້​ຕາມ 5 ມາດຖານ ບ້ານ​ວັດ​ທະ​ນະ​ທໍາ  15 ເນື້ອ​ໃນ​ຂອງ​ມາດຖານ​ຄອບຄົວ​ບ້ານ​ວັດ​ທະ​ນະ​ທໍາ​ທີ່​ໄດ້​ກໍາ​ນົດ​ໄວ້, ກ່າວ​ມອບ​ໂດຍ ທ່ານ ສີ​ພູ​ວົງ ວິໄລ​ແກ້ວ, ກ່າວ​ຮັບ​ໂດຍ​ທ່ານ ວາຍ ທອງ​ໜູ​ຕາ ນາຍບ້ານໆນໍ້າ​ຍາງ ພ້ອມ​ດ້ວຍ​ຄະນະ​ບ້ານ ແລະ ປະຊາຊົນ​ເຂົ້າ​ຮ່ວມເປັນ​ສັກຂີ​ພິຍານ, ທົ່ວ​ບ້ານ​ມີ 108 ຄອບຄົວ ໄດ້​ຮັບ​ໃບຢັ້ງຢືນ​ເຂົ້າ​ເປັນ​ຄອບຄົວ​ບ້ານ​ວັດ​ທະ​ນະ​ທໍາ​ແລ້ວ ໃນ​ຈໍາ​ນວນ 89 ຄອບຄົວ, ຍັງ​ບໍ່​ທັນ​ໄດ້ 19  ຄອບ​ຄົວ, ເທົ່າ​ກັບ 82,40%   ຊຶ່ງ​ທົ່ວ​ເມືອງ​ມີ 33  ບ້ານ, ໄດ້​ເປີດ​ເປັນ​ບ້ານ​ວັດ​ທະ​ນະ​ທໍາ​ແລ້ວ 31 ບ້ານ, ກວມ​ເອົາ 93,93%, ຍັງ​ເຫຼືອ 12 ບ້ານ, ການ​ຮັບຮອງ​ບ້ານ​ວັດ​ທະ​ນະ​ທໍາ ແມ່ນ​ເລີ່ມ​ຈັດ​ຕັ້ງ​ປະຕິ​ບັດ​ມາ​ແຕ່​ວັນ​ທີ 23/3/1999 ເປັນຕົ້ນ​ມາ​ຈົນ​ເຖິງ​ປັດຈຸ​ບັນ, ​ໃນ​ໂອກາດ​ດັ່ງກ່າວ ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ຄວາມ​ເປັນ​ມາ​ກ່ຽວ​ກັບ​ວັດ​ທະ​ນະ​ທໍາ​ລາວ ການ​ເວົ້າ​ຈາ, ການ​ນຸ່ງ​ຖື, ການ​ດໍາ​ລົງ​ຊີ​ວິ​ດຢູ່​​ຮ່ວມ​ກັນ, ການ​ເຊື່ອ​ຖື​ສາສະໜາ ແລະ ອື່ນໆ ເພື່ອ​ເຮັດ​ໃຫ້​ປະຊາຊົນ​ພາຍ​ໃນ​ບ້ານ​ໄດ້​ຮັບ​ຮູ້ ແລະ ເຂົ້າໃຈຕື່ມ​ອີກ.
(ພາບ - ຂ່າວ: ບຸນ​ປອນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110