ໜັງສືພິມ ປະຊາຊົນ

ເມືອງຊຳເໜືອ ຈັດພິທີປູກຕົ້ນໄມ້ໃນວັນປູກຕົ້ນໄມ້ແຫ່ງຊາດ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 02/06/2020 08:59:44 ຈຳນວນຢ້ຽມຊົມ 368 ຄັ້ງ

ເມືອງຊໍາເໜືອ ສົມທົບກັບພະແນກກະສິກຳ ແລະ ປ່າໄມ້ແຂວງຫົວພັນໄດ້ຈັດພິທີປູກຕົ້ນໄມ້ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຊຶ່ງຈັດຂຶ້ນໃນວັນທີ 29 ພຶດສະພາ ຜ່ານມາ ທີ່ສວນສາທາລະນະ ຫົວພັນ-ກວາງນິງ ໂດຍການເຂົ້າຮ່ວມເປັນປະທານຂອງທ່ານ ພຸດພັນ ແກ້ວວົງໄຊ ເຈົ້າເມືອງໆຊໍາເໜືອ ເປັນກຽດເຂົ້າຮ່ວມມີທ່ານ ວັນໄຊ ແພງຊຸມມາ ເຈົ້າແຂວງຫົວພັນ, ບັນດາທ່ານການນໍາຂັ້ນແຂວງ, ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພຸດພັນ ແກ້ວວົງໄຊ ເຈົ້າເມືອງໆຊໍາເໜືອໄດ້ກ່າວວ່າ: ໃນປີ 2019 ເມືອງຊໍາເໜືອໄດ້ປູກຕົ້ນໄມ້ປະດັບໃສ່ອ້ອມຂ້າງເທດສະບານເມືອງໃນຈຳນວນ 656 ຕົ້ນ ກວມເອົາເນື້ອທີ່ 1,15 ເຮັກຕາ, ຜ່ານການບົວລະບັດເຫັນວ່າມີຕົ້ນໄມ້ທີ່ບໍ່ຕາຍຈຳນວນ 533 ຕົ້ນ, ຕາຍ 123 ຕົ້ນ ສາເຫດຍ້ອນວ່າ: ມີບຸກຄົນຈຳນວນໜຶ່ງທີ່ມີດິນຢູ່ແຄມທາງໄດ້ຕັດ, ຖົມ, ຂາຍເຄື່ອງໃສ່ບ່ອນຕົ້ນໄມ້ທີ່ປູກ ແລະ ຍ້ອນມີບາງພາກສ່ວນມີການຂຸດຂຸມ, ການໃສ່ຝຸ່ນ, ການລ້ອມຮົ້ວບໍ່ໄດ້ມາດຕະຖານເຕັກນິກບວກໃສ່ການບົວລະບັດຮັກສາບໍ່ຄ່ອຍເອົາໃຈໃສ່ປານໃດ, ຕົ້ນໄມ້ທີ່ນຳມາປູກພັດຍັງເປັນເບ້ຍນ້ອຍ, ຄະນະຮັບຜິດຊອບທີ່ຕິດຕາມກວດກາປູກຕົ້ນໄມ້ບໍ່ໄດ້ແນະນຳໃຫ້ພາກສ່ວນທີ່ກ່ຽວຂ້ອງໄປປູກທົດແທນຄືນຈຳນວນຕົ້ນໄມ້ທີ່ຕາຍໄປ. ສະເພາະປີນີ້ຕົ້ນໄມ້ທີ່ນຳມາປູກມີ ໄມ້ໂລ່ງເລ່ງຈຳນວນ 1.186 ຕົ້ນ, ໄມ້ດູ່ລາຍ 314 ຕົ້ນ, ໄມ້ຄູນ 19 ຕົ້ນ, ໄມ້ດູ່ທຳມະດາ 100 ຕົ້ນ, ໄມ້ຂະຍຸງ 75 ຕົ້ນ, ໄມ້ຈວງ 5 ຕົ້ນ, ໄມ້ຝາງແດງ 38 ຕົ້ນ ແລະ ໄມ້ຄາຍປ່າຈຳນວນ 387 ຕົ້ນ ລວມທັງໝົດ 2 ພັນກວ່າເບ້ຍ ຊຶ່ງໄດ້ປູກຢູ່ 3 ຈຸດຄື: ຂອບເຂດວັດອົງຕື້ສີບຸນເຮືອງ, ຂອບເຂດຈຸດຊົມວິວມາຫາຄິວລົດເມ ແລະ ຂອບເຂດປ່າຊົມໃຊ້ບ້ານຫຼັກ 20, ລວມເນື້ອທີ່ທັງໝົດ 4 ເຮັກຕາກວ່າ, ນອກຈາກນີ້ຍັງໄດ້ປູກດອກບານທົດແທນເບ້ຍໄມ້ທີ່ຕາຍໃນປີ 2019 ຈຳນວນ 47 ເບ້ຍຢູ່ສວນສາທາລະນະຫົວພັນ-ກວາງນິງຕື່ມອີກ.
ທ່ານເຈົ້າເມືອງຊໍາເໜືອຍັງເວົ້າອີກວ່າ: ເພື່ອເຮັດໃຫ້ຕົ້ນໄມ້ທີ່ປູກໃນມື້ນີ້ໄດ້ຮັບໝາກຜົນຢ່າງເປັນຮູບປະທຳໃນອະນາຄົດອັນຍາວນານໃຫ້ໄດ້ທັງປະລິມານ ແລະ ຄຸນນະພາບພວກເຮົາທຸກຄົນຕ້ອງຮ່ວມແຮງຮ່ວມໃຈກັນປູກ, ເອົາໃຈໃສ່ບົວລະບັດ ແລະ ປົກປັກຮັກສາຕົ້ນໄມ້ ເພື່ອຄວາມອຸດົມສົມບູນ ແລະ ຍືນຍົງຂອງທຳມະຊາດດັ່ງຄຳຂວັນທີ່ວ່າ: “ປູກຕົ້ນໄມ້ໃນວັນນີ້ ເພື່ອຄວາມສຸຂີໃນວັນໜ້າ” “ປູກຕົ້ນໄມ້ ໃນວັນນີ້ເພື່ອຄວາມອຸດົມຮັ່ງມີ ແລະ ຄວາມຍືນຍົງຂອງຊາດໃນອະນາຄົດ” .
(ຂ່າວ-ພາບ: ນິດຖະໜອມ)