ເຈົ້າແຂວງໄຊຍະບູລີ ໂອ້ລົມປະຊາຊົນ 6 ບ້ານ

ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະໄດ້ລົງຢ້ຽມຢາມ ແລະ ໂອ້ລົມປະຊາຊົນ 6 ບ້ານຄື: ໂພນຫີນ, ເມືອງພຽງ, ໜອງງົວ, ແສງຈະເລີນ, ໂພນໄຊ ແລະ ບ້ານດົງເງິນ, ເມືອງພຽງ ແຂວງໄຊຍະບູລີ ເມື່ອບໍ່ດົນຜ່ານມານີ້, ໃຫ້ການຕ້ອນຮັບໂດຍ ທ່ານ ເສີດ ແສງສຸລິນ ເຈົ້າເມືອງ-ເມືອງ ພຽງ ພ້ອມດ້ວຍອໍານາດການປົກຄອງ 6 ບ້ານ.

ໃນໂອກາດນີ້, ທ່ານ ເຈົ້າແຂວງ ໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມເປັນຕົ້ນ ແມ່ນການກະກຽມຜະລິດລະດູຝົນ ແລະ ປະກົດການຫຍໍ້ທໍ້ໃນແຕ່ລະບ້ານ ໂດຍລວມແລ້ວແຕ່ລະບ້ານແມ່ນໄດ້ຫັນເອົາມະຕິກອງປະຊຸມໃຫຍ່ຂອງເມືອງ ກໍຄືມະຕິກອງປະຊຸມໃຫຍ່ຂອງແຕ່ລະບ້ານເປັນອັນລະອຽດ ເພື່ອໃຫ້ແທດເໝາະກັບຈຸດພິເສດທ່າແຮງຂອງແຕ່ລະບ້ານ ໂດຍສຸມໃສ່ແກ້ໄຂຄວາມທຸກຍາກ, ການຈັດສັນອາຊີບຄົງທີ່ໃຫ້ປະຊາຊົນ, ພ້ອມດຽວກັນແຕ່ລະບ້ານແມ່ນໄດ້ຊຸກຍູ້ສົ່ງເສີມໃຫ້ປະຊາຊົນທໍາການຜະລິດ ໂດຍສະເພາະແມ່ນການປູກເຂົ້າ, ປູກພືດອຸດສາຫະກໍາເປັນສິນຄ້າເຊັ່ນ: ສາລີ, ໝາກງາ, ໝາກເດືອຍ, ມັນຕົ້ນ ແລະ ອື່ງໆ ຊຶ່ງນໍາໃຊ້ເຕັກນິກວິທະຍາສາດ, ນໍາໃຊ້ກົນຈັກ, ການນໍາໃຊ້ຝຸ່ນຊີວະພາບ ເພື່ອຍົກສູງສະມັດຖະພາບຂອງການຜະລິດໃຫ້ສູງຂຶ້ນ. ຈາກນັ້ນ, ທ່ານເຈົ້າແຂວງໄດ້ໃຫ້ກຽດໂອ້ລົມຕໍ່ປະຊາຊົນບັນດາເຜົ່າພາຍໃນ 6 ບ້ານ ຊຶ່ງທ່ານໄດ້ເນັ້ນໜັກໃຫ້ຄະນະບ້ານ ແລະ ປະຊາຊົນແຕ່ລະບ້ານຈົ່ງສືບຕໍ່ເອົາໃຈໃສ່ໃນການສ້າງເສດຖະກິດຂອງແຕ່ລະຄອບຄົວດ້ວຍການປູກ-ການລ້ຽງ, ຊຸກຍູ້ສົ່ງເສີມປະຊາຊົນປູກພືດອຸດສາຫະກໍາເປັນສິນຄ້າ, ນໍາໃຊ້ເຕັກນິກໃໝ່ ແລະ ປ່ຽນແນວພັນພື້ນເມືອງມາເປັນແນວພັນປັບປຸງທີ່ໄດ້ຜ່ານການຄັດເລືອກລະອຽດ, ການລ້ຽງສັດໃຫຍ່ ຕິດພັນກັບການປູກຫຍ້າ. ເອົາໃຈໃສ່ສຶກສາອົບຮົມລູກຫຼານ ແລະ ພໍ່ແມ່ປະຊາຊົນໃຫ້ເຫັນໄດ້ຜົນຮ້າຍຂອງຢາເສບຕິດ, ພ້ອມທັງເອົາໃຈໃສ່ແກ້ໄຂບັນຫາຢາເສບຕິດຢູ່ແຕ່ລະບ້ານໃຫ້ໄດ້, ເອົາໃຈໃສ່ປັບປຸງການຈັດຕັ້ງໃຫ້ເຂັ້ມແຂງ ແລະ ໜັກແໜ້ນ, ແຕ່ລະບ້ານຕ້ອງເປັນເຈົ້າການເປັນຫູເປັນຕາຊ່ວຍເຈົ້າໜ້າທີ່ ໃນການຕິດຕາມການເຄື່ອນໄຫວຂອງກຸ່ມຄົນບໍ່ດີ, ກຸ່ມເສບ ແລະ ຄ້າ-ຂາຍຢາເສບຕິດ, ການລັກລອບຕັດໄມ້, ການຖາງປ່າແກ່, ປ່າຕົ້ນນໍ້າ, ເພື່ອນໍາເອົາກຸ່ມຄົນດັ່ງກ່າວມາສຶກສາອົບຮົມໃຫ້ກາຍເປັນພົນລະເມືອງດີຂອງສັງຄົມ, ຊຸກຍູ້ລູກຫຼານໃນເກນອາຍຸໃຫ້ໄດ້ເຂົ້າຮຽນ, ປ້ອງກັນບໍ່ໃຫ້ມີການປະລະການຮຽນ, ເອົາໃຈໃສ່ເຝົ້າລະວັງຕໍ່ພະຍາດ ໂຄວິດ-19, ການລະບາດຂອງພະຍາດໄຂ້ຍຸງລາຍດ້ວຍການເຮັດອະນາໄມບ້ານ-ເຮືອນ ສໍາຄັນແມ່ນໃຫ້ປະຕິບັດຕາມ 5 ປໍຂອງກະຊວງສາທາລະນະສຸກວາງອອກໃຫ້ເປັນປົກກະຕິ ແລະ ປຸກລະດົມປະຊາຊົນໃຫ້ສາມັກຄີກັນສ້າງຄັນຄຸກັກກັນນໍ້າຕາມຫ້ວຍຮ່ອງຕ່າງໆຢູ່ແຕ່ລະບ້ານເພື່ອກັກຕຸນນໍ້າໃນລະດູຝົນໄວ້ໃຊ້ທໍາການຜະລິດ ແລະ ບໍລິໂພກໃນລະດູແລ້ງ. 

(ຂ່າວ-ພາບ: ອຸ່ນເຮືອນ ໂພທິລັກ)