ໜັງສືພິມ ປະຊາຊົນ

ບໍລິສັດ ນຳ້ອູສຳເລັດການຝຶກຊ້ອມ ປ້ອງກັນອຸທົກກະໄພ ປີ 2020

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 02/06/2020 13:20:53 ຈຳນວນຢ້ຽມຊົມ 550 ຄັ້ງ

ການຝຶກຊ້ອມວຽກງານປ້ອງກັນອຸທົກກະໄພ ໄລຍະລະດູຝົນ ປະຈຳປີ 2020 ຂອງບໍລິສັດ ຜະລິດໄຟຟ້າພະລັງງານນ້ຳ ນ້ຳອູ ໄດ້ມີຂຶ້ນເມື່ອວັນທີ 28 ພຶດສະພາ ຜ່ານມາ ທີ່ແຂວງຫຼວງພະບາງ ໂດຍພາຍໃຕ້ການເປັນປະທານຂອງ ທ່ານ ສົ້ງ ຫຍຸ້ຍ ຫົງ ຜູ້ອຳນວຍການໃຫຍ່ ບໍລິສັດ ຜະລິດໄຟຟ້າພະລັງງານນ້ຳ ນ້ຳອູ, ມີ ທ່ານ ຫຼີ່ ຈື້ ກົງ ຫົວໜ້າກົງສູນໃຫຍ່ແຫ່ງສປ ຈີນ ປະຈຳແຂວງຫຼວງພະບາງ ແລະ ທ່ານ ສົມໃຈ ວັນນະສີ ຫົວໜ້າພະແນກພະລັງງານ ແລະ ບໍ່ແຮ່ ແຂວງຫຼວງພະບາງ ພ້ອມດ້ວຍບັນດາອຳນາດການປົກຄອງແຂວງ ແລະ ເມືອງ ທີ່ຕັ້ງໂຄງການເຂື່ອນໄຟຟ້ານ້ຳອູ ທັງ 7 ເຂື່ອນເຂົ້າຮ່ວມຢ່າງພ້ອມພຽງ.

ການຝຶກຊ້ອມວຽກງານປ້ອງກັນອຸທົກກະໄພ ແມ່ນວຽກສຳຄັນທີ່ສຸດຂອງໂຄງການເຂື່ອນໄຟຟ້ານ້ຳອູ ໃນແຕ່ລະປີ ຊຶ່ງນັບແຕ່ຕົ້ນປີຜ່ານມາ ບໍລິສັດ ໄດ້ຢຶດໝັ້ນແນວຄວາມຄິດ “ການປ້ອງກັນພະຍາດ ແລະ ປ້ອງກັນອຸທົກກະໄພມີຄວາມສຳຄັນເທົ່າກັນ, ການກໍ່ສ້າງ ແລະ ຜະລິດໄປພ້ອມໆກັນ”. ທັງນີ້, ນັບແຕ່ທ້າຍເດືອນມັງກອນ ຜ່ານມາ ບໍລິສັດ ໄດ້ຄຸ້ມຄອງດ້ວຍວິທີປິດການເຂົ້າ-ອອກຂອງແຕ່ລະເຂື່ອນ ແລະ ໜ່ວຍງານເຂົ້າຮ່ວມການກໍ່ສ້າງການປ້ອງກັນການລະບາດ ຂອງພະຍາດແບບຕາຂ່າຍ. ຫຼັງຈາກນັ້ນໃນເດືອນມີນາ ໄດ້ເລີ່ມຕົ້ນເຂົ້າສູ່ວຽກງານປ້ອງກັນອຸທົກກະໄພປະຈຳປີ ໂດຍໄດ້ມີການຈັດຕັ້ງການປ້ອງກັນອຸທົກກະໄພຂອງເຂື່ອນໄຟຟ້າຕາມລຳນ້ຳອູ ແລະ ໄດ້ສຳເລັດການກວດກາຄວາມປອດໄພຂອງແຕ່ລະເຂື່ອນ ກ່ອນກ້າວເຂົ້າສູ່ລະດູຝົນ.

ການຝຶກຊ້ອມຄັ້ງນີ້ ຈັດຂຶ້ນພາຍໃນຫົວຂໍ້ທີ່ວ່າ “ການປ້ອງກັນອຸທົກກະໄພໃຫຍ່, ຕໍ່ສູ້ກັບໄພພິບັດໃຫຍ່ ແລະ ກູ້ໄພອັນຕະລາຍໃຫຍ່” ເປັນແນວຄິດຊີ້ນຳ ແລະ ຖືເອົາ ຄຳຂວັນ “ປອດໄພໄວ້ກ່ອນ, ກະກຽມໄວ້ຕະຫຼອດ, ບໍ່ຖືເບົາ ແລະ ປະໝາດ, ປ້ອງກັນເປັນເຫຼັກ, ກູ້ໄພຢ່າງເຕັມແຮງ” ເປັນບ່ອນອີງໃນການຈັດຕັ້ງປະຕິບັດວຽກງານອຸທົກກະໄພ ພ້ອມທັງຖືເອົາ “ການທົດສອບແຜນການ, ຝຶກຝົນຫຼໍ່ຫຼອມທີມງານ, ສ້າງຄວາມກົມກຽວແກ່ກົນໄກປະສານງານ, ເຜີຍແຜ່ໂຄສະນາແບບວິທະຍາສາດ” ເປັນເປົ້າໝາຍໃນການສາທິດກໍລະນີສຸກເສີນ ເຊັ່ນ: ເຂື່ອນນ້ຳອູ 7 ໄດ້ພົບນໍ້ານອງລະດັບຮອບວຽນ 20 ປີ ພ້ອມກັນຍົກຍ້າຍປະຊາຊົນເຂດລຸ່ມເຂື່ອນໜີອອກຈາກພື້ນທີ່; ການບໍລິຫານຈັດການນ້ຳລ່ວງໜ້າ ເພື່ອຮັບນ້ຳນອງຂອງເຂື່ອນນ້ຳອູ 6; ການແກ້ໄຂກໍລະນີສຸກເສີນຂອງເຂື່ອນນ້ຳອູ 5 ໄດ້ພົບນໍ້ານອງລະບົບຮອບວຽນ 100 ປີ; ການແກ້ໄຂກໍລະນີສຸກເສີນ ປະຕູລະບາຍນ້ຳເກີດບັນຫາຂັດຂ້ອງຂອງເຂື່ອນນ້ຳອູ 4; ການແກ້ໄຂກໍລະນີສຸກເສີນໄຟດັບໝົດຂອງເຂື່ອນນ້ຳອູ 2; ການແກ້ໄຂກໍລະນີສຸກເສີນ ເຂື່ອນນ້ຳອູ 7 ໄດ້ພົບນ້ຳນອງລະດັບຮອບວຽນ 200 ປີ; ການແກ້ໄຂຂ່າວລື ແລະ ຂ່າວປັ່ນປ່ວນວ່າ ເຂື່ອນແຕກ. ຊຶ່ງທັງ 7 ກໍລະນີນີ້ ການຝຶກຊ້ອມນັ້ນແມ່ນໄດ້ໃຊ້ຮູບແບບການປະຕິບັດພາກສະໜາມ ແລະ ການຄຸ້ມຄອງທາງໄກ ດ້ວຍການຕິດຕາມທາງວີດີໂອຕາມເວລາຕົວຈິງ ໄດ້ສະແດງໃຫ້ເຫັນ ເຖິງສະພາບການປະຕິບັດວຽກງານກູ້ໄພຂອງທີມງານປະຈຳພາກສະໜາມ ແລະ ການບັນຊາວຽກງານຂອງຄະນະນຳ, ວຽກງານປ້ອງກັນອຸທົກກະໄພທີ່ສູນຄຸ້ມຄອງການດຳເນີນງານ ແລະ ບຳລຸງຮັກສາເຂື່ອນໄຟຟ້າພະລັກງານນ້ຳ ນ້ຳອູ.

ຄຽງຄູ່ກັນນັ້ນ, ໃນການຝຶກຊ້ອມດັ່ງກ່າວ ຍັງໄດ້ມີການສາທິດກໍລະນີສຸກເສີນທີ່ເໝາະສົມ ດ້ວຍການກຳນົດໜ້າທີ່ຮັບຜິດຊອບຂອງອົງການຈັດຕັ້ງ ແລະ ພະນັກງານຢ່າງຊັດເຈນ, ການບັນຊາວຽກງານ ແລະ ການປະສານງານທີ່ມີປະສິດທິຜົນສູງ, ການຈັດແບ່ງລະດັບແຈ້ງເຕືອນ ແລະ ໃຊ້ມາດຕະການປະຕິບັດໃຫ້ມີຄວາມສອດຄ່ອງກັບສະພາບຕົວຈິງ, ພະນັກງານປະຈຳແຕ່ລະເຂື່ອນ ຕອບສະໜອງຢ່າງວ່ອງໄວ, ມີການຄຸ້ມຄອງ ແລະຄວບຄຸມໃຫ້ດີ, ການແກ້ໄຂຍົກລະດັບການຮັບມື ແລະ ແກ້ໄຂກໍລະນີສຸກເສີນ, ໄດ້ບັນລຸຄາດໝາຍສ້າງພື້ນຖານທີ່ແໜ້ນແກ່ນໃຫ້ແກ່ວຽກງານປ້ອງກັນອຸທົກກະໄພ ເພື່ອເຮັດໃຫ້ຊີວິດ ແລະ ຊັບສິນຂອງປະຊາຊົນທີ່ອາໄສຢູ່ຕາມແຄມແມ່ນ້ຳອູ ມີຄວາມປອດໄພ.

(ຂ່າວ: ບໍລິສັດນ້ຳອູ)