ໜັງສືພິມ ປະຊາຊົນ

ສປຊ ຫາລືການປົກປັກຮັກສາສິ່ງແວດລ້ອມໃນການປະທະກັນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 03/06/2020 08:50:08 ຈຳນວນຢ້ຽມຊົມ 430 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ໃນຂອບເຂດສັບປະດາຂອງ ສປຊ ກ່ຽວກັບການປົກປ້ອງສາມັນຊົນ ໃນການປະທະກັນດ້ານອາວຸດ ປີ 2020 (27 ພຶດສະພາ - 1 ມິຖຸນາ 2020), ວັນທີ 29 ພຶດສະພາຜ່ານມາ, ຄະນະປະຕິບັດງານຫວຽດນາມ ປະຈຳ ສປຊ ພ້ອມກັບຄະນະປະຕິບັດງານປະເທດສະວິດ, ຫ້ອງການປະສານງານບັນດາການເຄື່ອນໄຫວມະນຸດສະທຳຂອງ ສປຊ (OCHA), ໂຄງການສິ່ງແວດລ້ອມຂອງ ສປຊ (UNEP) ແລະ ອົງການຈັດຕັ້ງອື່ນໆ ໄດ້ຈັດກອງປະຊຸມການປຶກສາຫາລືທາງອອນລາຍທີ່ມີຊື່ວ່າ; “ປົກປັກຮັກສາສິ່ງແວດລ້ອມໃນການປະທະກັນດ້ວຍອາວຸດ ແມ່ນ ປົກປ້ອງສາມັນຊົນ”.
ຂ່າວລະບຸວ່າ: ຜ່ານການປຶກສາຫາລື, ບັນດາຜູ້ແທນທີ່ເຂົ້າຮ່ວມຕ່າງກໍໃຫ້ທັດສະນະວ່າ: ຄວນຊຸກຍູ້ການປຶກສາຫາລືຢູ່ບັນດາກົນໄກຂອງສະພາຄວາມໝັ້ນຄົງ ສປຊ ແລະ ອົງການ ສປຊ ກ່ຽວກັບການປົກປັກຮັກສາສິ່ງແວດລ້ອມໃນການປະທະກັນ, ມີການພົວພັນຢ່າງແໜ້ນແຟ້ນ ລະຫວ່າງ ການປົກປັກຮັກສາສິ່ງແວດລ້ອມ, ປົກປ້ອງສາມັນຊົນ ແລະ ເປົ້າໝາຍການພັດທະນາ. ບັນດາຜູ້ແທນຊີ້ແຈງວ່າ: ໂຣກລະບາດ Covid - 19 ໄດ້ກໍ່ຜົນກະທົບຕໍ່ດ້ານສາທາລະນະສຸກ, ສຸຂະພາບ, ເຮັດໃຫ້ແຫຼ່ງກຳລັງຂອງປະເທດອ່ອນແອລົງໃນການຮັບມືກັບບັນດາບັນຫາສິ່ງແວດລ້ອມ.
ໃນພິທີປິດກອງປະຊຸມການປຶກສາຫາລື, ທ່ານ ດັ້ງດິ່ງກຸ໊ຍ ເອກອັກຄັດລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ ໄດ້ເນັ້ນໜັກວ່າ: ບັນດາຝ່າຍທີ່ມີການປະທະກັນຕ້ອງມີຄວາມຮັບຜິດຊອບໃນການປະຕິບັດຢ່າງຖືກຕ້ອງຕາມກົດໝາຍວ່າດ້ວຍມະນຸດສະທຳ. ໃນໄລຍະພາຍຫຼັງໂຣກລະບາດ, ບັນດາປະເທດຄວນເອົາໃຈໃສ່ເຖິງການຟື້ນຟູສິ່ງແວດລ້ອມທີ່ຖືກທຳລາຍ. ຈາກນັ້ນ ຊ່ວຍໃຫ້ປະຊາຊົນກັບຄືນສູ່ການດຳລົງຊີວິດທີ່ເປັນປົກກະຕິໂດຍໄວ, ຮັກສາສັນຕິພາບແບບຍືນຍົງ.