ໜັງສືພິມ ປະຊາຊົນ

ຟີລິບປິນ ຈະຜ່ອນຜັນມາດຕະການກັກບໍລິເວນຢູ່ມະນີລາ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 03/06/2020 08:51:17 ຈຳນວນຢ້ຽມຊົມ 388 ຄັ້ງ

ຂ່າວສານຊີອາໄອລາຍງານວ່າ: ທ້າຍເດືອນ ພຶດສະພາຜ່ານມາ, ທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ປະກາດວ່າ: ຈະຜ່ອນຜັນມາດຕະການກັກບໍລິເວນຢູ່ນະຄອນຫຼວງມະນີລາ ເມືອງດາວາວ ຊຶ່ງເປັນເມືອງໃຫຍ່ອັນດັບທີ 3 ແລະ ແຫ່ງອື່ນໆຂອງປະເທດ, ແຕ່ຍັງຈະປະຕິບັດນະໂຍບາຍແບບທຳມະດາກັກບໍລິເວນຢູ່ຕາມເຂດຊຸມຊົນ.
ຂ່າວລະບຸວ່າ: ຟີລິບປິນ ໄດ້ປະຕິບັດມາດຕະການກັກບໍລິເວນທີ່ເຄັ່ງຄັດຢູ່ເຂດຊຸມຊົນຫຼາຍແຫ່ງພາຍໃນປະເທດ ເລີ່ມແຕ່ກາງເດືອນມີນາປີນີ້ເປັນຕົ້ນມາ ແລະ ໄດ້ຜ່ອນຜັນມາດຕະການກັກບໍລິເວນທີ່ເຄັ່ງຄັດຢູ່ເຂດຊຸມຊົນຫຼາຍແຫ່ງໃນກາງເດືອນພຶດສະພານີ້ ໂດຍແບ່ງເປັນແຕ່ລະໄລຍະ. ຈາກນັ້ນໄດ້ປ່ຽນມາປະຕິບັດນະໂຍບາຍຢ່ອນຍານທີ່ໃຫ້ກັກບໍລິເວນຢູ່ຕາມເຂດຊຸມຊົນ. ສ່ວນເວລາກຳນົດຂອງການປະຕິບັດມາດຕະການການກັກບໍລິເວນທີ່ເຄັ່ງຄັດຢູ່ເຂດຊຸມຊົນໃນນະຄອນຫຼວງມະນີລາ ແລະ ແຫ່ງອື່ນໆ ທີ່ມີສະພາບການແຜ່ລະບາດຂອງພະຍາດໂຄວິດ-19 ທີ່ໜັກໜ່ວງນັ້ນ ໄດ້ສືບຕໍ່ຈົນຮອດວັນທີ 31 ພຶດສະພາຜ່ານມາ.
ກະຊວງສາທາລະນະສຸກຟີລິບປິນ ໄດ້ແຈ້ງໃຫ້ຮູ້ວ່າ: ມາຮອດທ້າຍເດືອນພຶດສະພາ, ຜູ້ເປັນພະຍາດ COVID-19 ທີ່ເພີ່ມໃໝ່ຢູ່ຟິລິບປິນມີເຖິງ 1.046 ກໍລະນີ, ນີ້ແມ່ນຄັ້ງທຳອິດທີ່ຈຳນວນຜູ້ເປັນພະຍາດ COVID-19 ເພີ່ມໃໝ່ຕໍ່ມື້ຫຼາຍກວ່າໜຶ່ງພັນກໍລະນີ ນັບແຕ່ພະຍາດນີ້ເລີ່ມລະບາດຢູ່ຟິລິບປິນ. ປັດຈຸບັນ, ຜູ້ຕິດເຊື້ອພະຍາດ COVID-19 ນັບລວມແລ້ວຢູ່ຟິລິບປິນມີ 18.086 ກໍລະນີ, ຜູ້ເສຍຊີວິດ 957 ຄົນ, ປິ່ນປົວຫາຍແລ້ວ 3.909 ກໍລະນີ.