ໜັງສືພິມ ປະຊາຊົນ

ຫວຽດນາມ ຊຸກຍູ້ມາດຕະການພັດທະນາ ວຽກເຮັດງານທຳພາຍຫຼັງ ໂຄວິດ-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 03/06/2020 08:52:40 ຈຳນວນຢ້ຽມຊົມ 437 ຄັ້ງ

ວິທະຍຸກະຈາຍສຽງຫວຽດນາມລາຍງານວ່າ: ມາຮອດປັດຈຸບັນ, ຫວຽດນາມ ສາມາດຄວບຄຸມໂຣກລະບາດ Covid - 19 ໄດ້ໂດຍພື້ນຖານ, ແຕ່ໂຣກລະບາດພວມກໍ່ຜົນກະທົບໂດຍກົງຢ່າງໜັກໜ່ວງເຖິງລາຍຮັບ ແລະ ການຫາເງິນລ້ຽງຊີບຂອງຜູ້ອອກແຮງງານ, ເປັນຕົ້ນແມ່ນບັນດາຜູ້ອອກແຮງງານທຸກຍາກ. ຕ້ອງມີວິທີການແກ້ໄຂສະພາບການດັ່ງກ່າວໂດຍໄວ ແມ່ນຂໍ້ສະເໜີແນະຂອງຜູ້ມີສິດເລືອກຕັ້ງ ແລະ ກໍແມ່ນແນວຄິດຈິດໃຈຂອງສະມາຊິກສະພາແຫ່ງຊາດຢູ່ກອງປະຊຸມສະໄໝສາມັນເທື່ອທີ 9 ນີ້.
ຂ່າວລະບຸວ່າ: ໂຣກລະ ບາດ Covid - 19 ໄດ້ເຮັດໃຫ້ຜູ້ອອກແຮງງານຫວຽດນາມ ນັບລ້ານຄົນຢູ່ໃນລະບົບ ແລະ ນອກລະບົບ ບໍ່ມີວຽກເຮັດງານທຳ. ມາຮອດປັດຈຸບັນ, ເມື່ອຫວຽດນາມ ຍູ້ໂຣກລະບາດໃຫ້ຖອຍໄປໂດຍພື້ນຖານ, ບັນດາວິສາຫະກິດ ໄດ້ເລີ່ມຟື້ນຟູການຜະລິດ, ບັນຫາທີ່ວາງອອກນັ້ນ ແມ່ນ ແກ້ໄຂວຽກເຮັດງານທຳໃຫ້ແກ່ຜູ້ອອກແຮງງານທີ່ບໍ່ມີວຽກເຮັດງານທຳ, ຮັບປະກັນຈຳນວນແຮງງານສະໜອງໃຫ້ແກ່ຕະຫຼາດແຮງງານຄືນໃໝ່.
ທ່ານ ດ່າວງອກຢຸງ ລັດ ຖະມົນຕີກະຊວງແຮງງານ, ທະ ຫານເສຍອົງຄະ ແລະ ສັງຄົມ ຫວຽດນາມ ໄດ້ໃຫ້ຂໍ້ສັງເກດວ່າ: ດ້ວຍບັນດານະໂຍບາຍຂອງລັດຖະບານ ແລະ ຄວາມພະຍາຍາມ ຮັບເອົາໂອກາດຟື້ນຟູເສດຖະກິດ, ການເຄື່ອນໄຫວຜະລິດ, ການບໍລິການຟື້ນຟູ ຈະມີຜູ້ອອກແຮງງານ ປະມານ 70.000 - 80.000 ຄົນຢູ່ຂົງເຂດຕ່າງໆ ຈະກັບຄືນສູ່ຕະຫຼາດແຮງງານເທື່ອລະກ້າວ. ເພາະສະນັ້ນ, ບັນດາທ້ອງຖິ່ນ, ວິສາຫະກິດຄວນມີບຸລິມະສິດແຖວໜ້າ ແມ່ນສຸມໃສ່ສ້າງໂຄງປະກອບແຫຼ່ງຊັບພະຍາກອນມະນຸດຄືນໃໝ່, ໄປຄຽງຄູ່ກັນນັ້ນແມ່ນການປ່ຽນແປງໃໝ່ເຕັກໂນໂລຊີ ແລະ ລະບົບມູນຄ່າ.