ໜັງສືພິມ ປະຊາຊົນ

ສາລະວັນ ຫວນຄືນມູນເຊື້ອວັນສ້າງຕັ້ງ ຊປປລ ຄົບຮອບ 65 ປີ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 04/06/2020 09:11:09 ຈຳນວນຢ້ຽມຊົມ 580 ຄັ້ງ

ໃນວັນທີ 2 ມິຖຸນາ 2020, ຄະ ນະບໍລິຫານງານຊາວໜຸ່ມແຂວງສາ ລະວັນ ໄດ້ຈັດພິທີປາຖະກະຖາວັນສ້າງຕັ້ງຊາວໜຸ່ມປະຊາຊົນປະຕິວັດລາວ (ຊປປລ) ຄົບຮອບ 65 ປີ (14 ເມສາ 1955-14 ເມສາ 2020) ຢູ່ທີ່ສະໂມສອນແຂວງ ໂດຍການບັນລະຍາຍຂອງ ທ່ານ ນາງ ບຸນທະວີ ດວງລາສີ ຄະນະປະຈຳພັກແຂວງ ປະທານສະຫະພັນແມ່ຍິງແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີທ່ານ ຈັນເພັງ ສາຍທຳມະວົງ ຮັກສາການເລຂາຄະນະບໍລິຫານງານຊາວໜຸ່ມແຂວງ ແລະ ພາກສ່ວນກ່ຽວຂ້ອງເຂົ້າຮ່ວມຮັບຟັງ.
ທ່ານ ນາງ ບຸນທະວີ ດວງລາສີ ໄດ້ເລົ່າຄືນມູນເຊື້ອການກຳເນີດເຕີບໃຫຍ່ຂະຫຍາຍຕົວຂອງຄະນະ ຊປປລ ໃນໄລຍະຜ່ານມາ ປະເທດຊາດລາວເຮົາແມ່ນມີມູນເຊື້ອອົງອາດກ້າຫານ ແລະ ມີປະຫວັດຄວາມເປັນມາຍາວນານ ໃນການເຕົ້າໂຮມຄວາມສາມັກຄີ, ການສ້າງຕັ້ງ ແລະ ປົກປັກຮັກສາປະເທດຊາດ ສືບຕໍ່ກັນມາແຕ່ດຶກດຳບັນ ບໍ່ວ່າໃນປະຫວັດສາດໃດກໍຕາມຊາວໜຸ່ມແມ່ນມີບົດບາດສຳຄັນໃນການຕໍ່ສູ້ເພື່ອປົກປັກຮັກສາບ້ານເມືອງ, ເສຍສະຫຼະຊີວິດເພື່ອປົກປັກຮັກສາເອກະລາດ ແລະ ຜືນແຜ່ນດິນອັນແສນຮັກຂອງຕົນໄວ້ ຊຶ່ງມີບັນພະບູລຸດວິລະຊົນທີ່ລືຊື່ຄື: ຂຸນບູລົມ, ເຈົ້າຟ້າງຸ່ມ, ເຈົ້າສຸລິຍະວົງສາ, ເຈົ້າໄຊເສດຖາ, ເຈົ້າອະ ນຸວົງ, ທ່ານປະທານ ໄກສອນ ແລະ ຜູ້ອື່ນໆ ຊຶ່ງເຄີຍນຳພາການຕໍ່ສູ້ຕ້ານການຮຸກຮານຂອງສັດຕູພາຍນອກ, ນຳເອົາປະເທດຊາດຜ່ານພາຍຸລົມແດງ ແລະ ສາມາດຮັກສາແຜ່ນດິນໄວ້ຢ່າງໝັ້ນຄົງ. ພາຍຫຼັງພັກກອມມູນິດອິນດູຈີນໄດ້ມີການສ້າງຕັ້ງຂຶ້ນໃນວັນທີ 13 ກຸມພາ 1930 ມາຮອດປີ 1932 ບັນດາໜ່ວຍພັກຢູ່ລາວໄດ້ຮັບເຂົ້າຢູ່ໃນຕາໜ່າງການຈັດຕັ້ງພັກກອມມູນິດອິນດູຈີນ, ມາໃນປີ 1934 ທົ່ວແຄວ້ນລາວໄດ້ມີສະມາຊິກພັກກອມມູນິດຈຳນວນ 32 ຄົນ, ມີ 6 ໜ່ວຍພັກຂົນຂວາຍມະຫາຊົນ ແລະ ສ້າງໄດ້ສະມາຊິກພັກກອມມູນິດ 25 ຄົນ, ສະມາຊິກຊາວໜຸ່ມນັກຮຽນ 20 ຄົນ ຄຽງຄູ່ກັນນັ້ນຢູ່ໃນຂະບວນການຕໍ່ສູ້ຕ້ານຈັກກະພັດໃນແຕ່ລະໄລຍະກໍ່ມີກຳລັງສູ້ຮົບຂອງກອງເຈົ້າໄຊຈັກກະພັດ, ກອງເຈົ້າຟ້າປັດໃຈ ແລະ ກຳລັງອື່ນໆ. ນັ້ນແມ່ນຊາວໜຸ່ມມາຈາກກຳລັງປະກອບອາວຸດເອີ້ນວ່າ: ຄະນະຊາວໜຸ່ມຕະລຸມບອນ ຊຶ່ງມີບົດບາດຕະລຸມບອນໄດ້ ບໍ່ວ່າແນວໜ້າ ຫຼື ແນວຫຼັງ ກໍລ້ວນມີກຳລັງຂອງຊາວໜຸ່ມ. ສະນັ້ນ, ພາຍຫຼັງພັກໄດ້ດຳເນີນກອງປະຊຸມໃຫຍ່ ຄັ້ງທີ I ໄດ້ກໍານົດເອົາວັນທີ 22 ມີນາ 1955 ເປັນວັນສ້າງຕັ້ງພັກ ແລະ ຍ້ອນເຫັນໄດ້ບົດບາດສໍາຄັນຂອງຊາວໜຸ່ມ ພັກໄດ້ກໍານົດເອົາວັນທີ 14 ເມສາ 1955 ເປັນວັນສ້າງຕັ້ງຊາວໜຸ່ມປະຊາຊົນປະຕິວັດລາວຂຶ້ນ. ຄະນະຊາວໜຸ່ມປະຊາຊົນປະຕິວັດລາວ ແມ່ນພັກປະຊາຊົນປະຕິວັດລາວເປັນຜູ້ຈັດຕັ້ງນຳພາໂດຍກົງ ເປັນບ່ອນເຕົ້າໂຮມກຳລັງແຮງໜຸ່ມລາວບັນດາເຜົ່າ, ສຶກສາອົບຮົມ ແລະ ຝຶກຝົນຫຼໍ່ຫຼອມຊາວໜຸ່ມໃຫ້ກາຍເປັນກຳລັງປະຈັນບານທີ່ຈົງຮັກພັັກດີຕໍ່ຊາດ ໂດຍພາຍໃຕ້ຄຳຂວັນທີ່ວ່າ: “ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມມີໜ້າ ເມື່ອໃດຊາດຕ້ອງການຊາວໜຸ່ມຂານອາສາ”.
ໃນໂອກາດນີ້, ໃນພິທີກໍໄດ້ຈັດກິດຈະກຳບໍລິຈາກເລືອດເພື່ອຊ່ວຍເຫຼືອສັງຄົມ ຊຶ່ງມີຊາວໜຸ່ມອາສາສະໝັກ ຮ່ວມແຮງຮ່ວມໃຈກັນບໍລິຈາກເລືອດໄດ້ 20 ກວ່າຄົນ.
(ພາບ-ຂ່າວ: ທິດລານີ ໂຄດໂຍທາ)