ໜັງສືພິມ ປະຊາຊົນ

ມອບ-ຮັບ ອຸປະກອນໂຄສະນາປູກຈິດສຳນຶກກ່ຽວກັບຄວາມປອດໄພທາງຫຼວງ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 04/06/2020 09:21:38 ຈຳນວນຢ້ຽມຊົມ 620 ຄັ້ງ

ກົມຂົນສົ່ງ ກະຊວງໂຍທາທິການ ແລະ ຂົນສົ່ງ (ຍທຂ)ໄດ້ຈັດພິທີມອບ-ຮັບອຸປະກອນຮັບໃຊ້ວຽກງານໂຄສະນາປູກຈິດສຳນຶກກ່ຽວກັບຄວາມປອດໄພທາງຫຼວງພາຍໃຕ້ກອງທຶນພິເສດ ແມ່ນ້ຳຂອງ-ແມ່ນ້ຳລ້ານຊ້າງຂຶ້ນໃນວັນທີ 2 ມິຖຸນາຜ່ານມາ ທີ່ກະຊວງ ຍທຂ, ເປັນກຽດເຂົ້າຮ່ວມຂອງທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງກະຊວງ ຍທຂ, ມີບັນດາພະແນກ ຍທຂ ແຂວງ 9 ແຂວງຄື: ແຂວງຜົ້ງສາລີ, ແຂວງຫົວພັນ, ແຂວງໄຊສົມບູນ, ແຂວງຫຼວງນ້ຳທາ, ແຂວງຫຼວງພະບາງ, ແຂວງບໍ່ແກ້ວ, ແຂວງວຽງຈັນ, ແຂວງຊຽງຂວາງ, ແຂວງໄຊຍະບູລີເຂົ້າຮ່ວມ.
ເຄື່ອງອຸປະກອນທີ່ນຳມາມອບໃນຄັ້ງນີ້ມີທັງໝົດ 34 ຊຸດ, ແຕ່ລະຊຸດປະກອບມີ ຄອມພິວເຕີໂນດບຸກ 1 ເຄື່ອງ, LCD 1 ເຄື່ອງ, ຜ້າຈໍສາຍສະໄລ 1 ອັນ ແລະ ລໍາໂພງ 1 ໜ່ວຍ ມອບໃຫ້ຂະແໜງຂົນສົ່ງ 1 ແຂວງ ແລະ ຫ້ອງການ ຍທຂ ເມືອງ 34 ເມືອງ, ທັງໝົດນັ້ນແມ່ນເພື່ອຈຸດປະສົງດຽວ ຄືຮັບໃຊ້ໃນການລົງໂຄສະນາເຜີຍເເຜ່ກົດລະບຽບຈະລາຈອນ ແລະ ປູກຈິດສໍານຶກຄວາມປອດໄພທາງຫຼວງຕາມສໍານັກງານ, ອົງການ, ໂຮງງານ, ໂຮງຮຽນ ແລະ ຕາມບ້ານ ແນໃສ່ເຮັດໃຫ້ຜູ້ນໍາໃຊ້ລົດ-ໃຊ້ທາງຫຼວງ ໄດ້ຮັບຮູ້ກົດລະບຽບຈະລາຈອນ, ເຕັກນິກການຂັບຂີ່ທີ່ປອດໄພ ແລະ ຄຸນສົມບັດ, ມາລະຍາດໃນ ການຂັບຂີ່ ເພື່ອພ້ອມກັນຈັດຕັ້ງປະຕິບັດຢ່າງມີປະສິດທິຜົນທັງເປັນການປະກອບສ່ວນໃນການປະຕິບັດນະໂຍບາຍຂອງລັດຖະບານໃນການຫຼຸດ ຜ່ອນການເກີດອຸບັດເຫດລົງເທື່ອລະກ້າວໃຫ້ກຽດກ່າວມອບຂອງ ທ່ານ ບຸນຕາ ອ່ອນນາວົງ ແລະ ຕາງໜ້າຮັບແມ່ນພະແນກ ຍທຂ ແຂວງ 9 ແຂວງ ເພື່ອສ້າງຄວາມເຂັ້ມແຂງໃຫ້ແກ່ວຽກງານໂຄສະນາປູກຈິດສຳ ນຶກກ່ຽວກັບຄວາມປອດໄພ ທາງຫຼວງໃຫ້ບັນດາແຂວງ ເພື່ອນຳເອົາອຸປະກອນດັ່ງກ່າວໄປນຳ ໃຊ້ໃຫ້ເກີດຜົນປະໂຫຍດສູງສຸດ.
ໃນໄລຍະທີ່ຜ່ານມາສະພາບການເກີດອຸບັດເຫດຕາມ ທາງຫຼວງໃນ ສປປ ລາວ ຢູ່ໃນຂັ້ນໜັກໜ່ວງສົມຄວນ, ທົ່ວ ສປປ ລາວ ມີພົນລະເຮືອນ 7 ລ້ານກວ່າຄົນ, ມີຍານພາຫະນະ 2 ລ້ານກວ່າຄັນ, ໃນແຕ່ລະປີມີຜູ້ເສຍຊີວິດຈາກການເກີດອຸບັດເຫດຕາມທາງຫຼວງ 1 ພັນຄົນ, ມີຜູ້ບາດເຈັບຫຼາຍກວ່າ 8 ພັນຄົນຕໍ່ປີ, ມູນຄ່າການເສຍຫາຍຫຼາຍກວ່າ 500 ລ້ານໂດລາ ຊຶ່ງຖືວ່າເປັນການສູນເສຍທີ່ສົ່ງຜົນສະທ້ອນຕໍ່ການພັດທະນາເສດຖະກິດ-ສັງຄົມຂອງຊາດ, ຜ່ານມາກົມຂົນສົ່ງໃນນາມທີ່ເປັນແກນຫຼັກໃນວຽກງານຄຸ້ມຄອງຄວາມປອດໄພທາງຫຼວງກໍໄດ້ປະສານສົມທົບກັບພາກສ່ວນທີ່ກ່ຽວຂ້ອງຕ່າງໆ ຫາວິທີຫຼຸດຜ່ອນ ແລະ ສະກັດກັ້ນການເກີດອຸບັດເຫດ ລວມທັງການໂຄສະນາປູກຈິດສຳນຶກໃຫ້ແກ່ຜູ້ນຳໃຊ້ລົດ, ນຳໃຊ້ທາງຫຼວງໃຫ້ຮູ້ຈັກ ແລະ ເຄົາລົບກົດລະບຽບການຈະລາຈອນ ແລະ ເຫັນເຖິງຜົນກະທົບຈາກການເກີດອຸບັດເຫດຂອງຜູ້ທີ່ໄດ້ຮັບເຄາະຮ້າຍຈາກການເກີດອຸບັດເຫດທາງຫຼວງ, ເນື່ອງຈາກຜ່ານມາຍັງຂາດເຂີນທາງ ດ້ານວັດຖຸອຸປະກອນໃນການ ລົງເຮັດວຽກໂຄສະນາດັ່ງກ່າວ, ສະນັ້ນໃນປີ 2017 ຈຶ່ງໄດ້ນຳສະເໜີບົດໂຄງການໂຄສະນາປູກຈິດສໍານຶກກ່ຽວກັບຄວາມປອດໄພທາງຫຼວງທີ່ມີມູນຄ່າ 498.600 ໂດລາ ຕໍ່ກອງທຶນ ພິເສດ ແມ່ນ້ຳຂອງ-ແມ່ນ້ຳລ້ານຊ້າງ ແລະ ໂຊກດີທີ່ໂຄງການດັ່ງກ່າວໄດ້ຮັບການອະນຸມັດ ແລະ ໄດ້ຈັດພິທີມອບ-ຮັບຢ່າງເປັນທາງການຂຶ້ນໃນມື້ນີ້.
(ຂ່າວ: ພູວັນ, ພາບ: ບຸນອູ້ມ)