ໜັງສືພິມ ປະຊາຊົນ

ເຂື່ອນໄຟຟ້າຫ້ວຍລຳພັນໃຫຍ່ ຈັດພິທີປູກໄມ້ ເພີ່ມພື້ນທີ່ສີຂຽວ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 04/06/2020 09:25:07 ຈຳນວນຢ້ຽມຊົມ 795 ຄັ້ງ

ເນື່ອງໃນໂອກາດວັນປູກຕົ້ນໄມ້ແຫ່ງຊາດທີ 1 ມິຖຸນາຂອງທຸກໆປີ ເຂື່ອນໄຟຟ້າຫ້ວຍ ລໍາພັນໃຫຍ່ ເມືອງທ່າແຕງ ແຂວງ ເຊກອງ ໄດ້ຈັດພິທີປູກຕົ້ນໄມ້ຂຶ້ນເມື່ອບໍ່ດົນຜ່ານມານີ້ ທີ່ເຂື່ອນໄຟຟ້າດັ່ງກ່າວ.ໂດຍມີທ່ານ ສົມເພັດ ວົງສາ ຜູ້ອໍານວຍການເຂື່ອນໄຟຟ້າຫ້ວຍລໍາພັນໃຫຍ່ ພ້ອມຄະນະ ແລະ ພະນັກ ງານວິຊາການພາຍໃນເຄື່ອນໄຟຟ້າເຂົ້າຮ່ວມ.
ທ່ານ ສົມເພັດ ວົງສາ ຜູ້ອໍານວຍການເຂື່ອນໄຟຟ້າຫ້ວຍ ລໍາພັນໃຫຍ່ກ່າວວ່າ: ການຈັດກິດຈະກຳຄັ້ງນີ້ ເພື່ອເປັນການສະໜັບສະໜູນນະໂຍບາຍຂອງລັດຖະບານໃນການເພີ່ມ ເນື້ອທີ່ສີຂຽວໃຫ້ ສປປ ລາວ, ເຮັດໃຫ້ພະນັກງານລັດຖະກອນ, ລັດວິສາຫະກິດ ຕະຫຼອດຮອດປະ ຊາຊົນ, ຮູ້ຈັກປົກປັກຮັກສາ, ອະນຸລັກ ແລະ ຮັກສາທໍາມະຊາດ ພ້ອມກັນປູກຕົ້ນໄມ້ ເພື່ອເພີ່ມປ່າໃຫ້ເປັນສີຂຽວໃຫ້ໄດ້ 70% ຕາມແຜນການຂອງລັດ ຖະບານວາງອອກ ແລະ ເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ. ຕົ້ນໄມ້ທີ່ນຳມາປູກໃນຄັ້ງນີ້ ມີຕົ້ນຊາຂຽວຈຳນວນ 300 ຕົ້ນ,ຕົ້ນໄມ້ຂະຍຸງ 170 ຕົ້ນ ແລະ ຕົ້ນໄມ້ຍາງ ຈໍານວນ 20 ຕົ້ນ, ຊຶ່ງສະຖານທີ່ປູກດັ່ງກ່າວແມ່ນປູກຕາມສໍານັກງານຫ້ອງການ,ບໍລິເວນເຂດເຮືອນຈັກ ແລະ ຢູ່ຕາມແຄມສາຍທາງພາຍໃນເຂື່ອນໄຟຟ້າຫ້ວຍລໍາພັນໃຫຍ່ ຊຶ່ງແຜນການຕໍ່ໜ້າຈະລະດົມໃຫ້ແຕ່ລະຄອບຄົວຢູ່ພາຍໃນເຂື່ອນຂອງຕົນປູກຕົ້ນໄມ້ໃຫ້ໄດ້ຢ່າງໜ້ອຍຄອບຄົວລະ 1 ຕົ້ນ ເພື່ອເພີ່ມພື້ນທີ່ສີຂຽວຂຶ້ນຢ່າງບໍ່ຢຸດຢັ້ງ.
ກ່ອນໜ້ານີ້ຊາວໜຸ່ມຂອງໂຮງຮຽນ ມສ ກະປືເຂດຈຸດສຸມພັດທະນາທີ 3 ກໍໄດ້ຈັດພິທີປູກຕົ້ນໄມ້ໃສ່ຂອບເຂດບໍລິເວນໂຮງຮຽນດັ່ງກ່າວຈຳນວນ 100 ກ່ວາຕົ້ນ ຊຶ່ງປະກອບມີໄມ້ມ່ວງ, ໄມ້ຂາມ, ໄມ້ໝາກມີ້ ແລະ ໄມ້ອາໂວກາໂດ ໂດຍມີທ່ານ ສີສົມພາ ໄຊແກ້ວຍະວົງ ເລຂາຄະນະບໍລິຫານງານຊາວໜຸ່ມເມືອງທ່າແຕງພ້ອມດ້ວຍຄູ-ອາຈານ ແລະ ອົງການປົກຄອງບ້ານເຂົ້າຮ່ວມຢ່າງເປັນຂະບວນ.
(ຂ່າວ: ພອນ ບຸນອຸທິດ)