ລັດຖະບານ​ຍີ່ປຸ່ນ​ໄດ້​ຊ່ວຍ ເຫຼືອມູນ​ຄ່າ 1,5 ຕື້​ເຢນ ຫຼື ປະ ມານ 13,7 ລ້ານ​ໂດ​ລາ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ປ້ອງ​ກັນ, ຄວບ​ຄຸມ ແລະ ແກ້​ໄຂ ການ​ລະບາດ​ຂອງ​ພະຍາດ​ໂຄ​ວິດ-19 ໃນ ສປປ ລາວ.
  ພິທີ​ລົງ​ນາມ​ໃນ​ເອກະ ສານແລກປ່ຽນ ໂຄງການຊ່ວຍ ເຫຼືອ​ດັ່ງກ່າວ​ໄດ້​ຈັດ​ຂຶ້ນ​ໃນ​ວັນ ​ທີ 5 ມິຖຸນາຜ່ານ​ມາ ທີ່​ກະຊວງ​ ການ​ຕ່າງປະເທດ, ຕາງໜ້າຝ່າຍ​ ລາວ ຮ່ວມ​ລົງ​ນາມ​ໃນເອກະ ສານ ແລະ ກ່າວ​ຮັບ​ໂຄງການ  ໂດຍທ່ານ ທອງ​ສະຫວັນ ພົມວິ ຫານ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປປ ລາວ ແລະ ຕາງໜ້າ​ຝ່າຍ​ຍີ່ປຸ່ນ ຮ່ວມ​ລົງ​ນາມ​ໃນ​ເອກະສານ ແລະ ກ່າວ​ມອບ​ໂດຍທ່ານ ທາ​ເກ​ວາ​ກະ ເຄ​ໂຊ (TAKEWAKA Keizo) ເອກ​ອັກ​ຄະ​ຣາ​ຊະ​ທູດ ຍີ່ປຸ່ນ ປະ​ຈໍາ ສປປ ລາວ, ມີ​ພະນັກງານ​ກ່ຽວຂ້ອງ​ທັງ​ສອງ​ຝ່າຍ ລາວ ແລະ ຍີ່​ປຸ່ນ.
  ໂຄງການ​ຊ່ວຍເຫຼືອ​ຄັ້ງ​ນີ້ ເປັນ​ໂຄງການ​ຊ່ວຍເຫຼືອ​ນອກ​ ໂຄງການ (Non-Project), ມີ​ມູນ​ຄ່າ 1,5 ຕື້ເຢນ  (13,7 ລ້ານ ໂດລາ​) ເພື່ອ​ສະໜອງ​ອຸປະ ກອນ​ການ​ແພດ, ພາຫະນະ ແລະ ລົດ​ຜະ​ລິດນຳ້ສະອາດ ເພື່ອ​ນໍາ​ໄປ​ຈັດ​ຕັ້ງ​ປະຕິ ບັດ​ເຂົ້າ​ໃນ​ວຽກ​ງານ​ສາທາລະ ນະ​ສຸກ ກໍ​ຄືການ​ປ້ອງ​ກັນ, ຄວບ​ຄຸມ ແລະ ແກ້​ໄຂ​ການແຜ່​ລະບາດຂອງ​ເຊື້ອ​ພະຍາດ COVID-19 ຢູ່ ສປປ ລາວ. ຍີ່ປຸ່ນ ໄດ້​ເປັນ​ປະເທດອັນ​ດັບຕົ້ນໆ ທີ່​ໃຫ້ ການ​ຊ່ວຍເຫຼືອ ສປປ ລາວ ເພື່ອ​ຕ້ານ​ການ​ແຜ່​ລະບາດ​ຂອງເຊື້ອ​ພະຍາດ COVID-19 ຢ່າງ​ທັນ​ການ, ໂດຍ​ສະເພາະ ການ​ຊ່ວຍເຫຼືອ​ຊຸດ​ປ້ອງ​ກັນ​ການ​ຕິດເຊື້ອ (Personal Protective Equipments - PPEs). ມາ​ຮອດ​ປັດຈຸ​ບັນ, ລັດຖະບານ​ຍີ່ປຸ່ນ ໄດ້​ໃຫ້ການ​ຊ່ວຍເຫຼືອ ສປປ ລາວ ມູນ​ຄ່າ​ຫຼາຍ​ກວ່າ 18 ລ້ານໂດ​ລາ.
  ລັດຖະບານ ສປປ ລາວ ຕີ​ລາຄາ​ສູງ​ຕໍ່​ການ​ສະໜັບສະ ໜູນ​ຊ່ວຍເຫຼືອ​ຂອງລັດຖະ ບານ ແລະ ປະຊາຊົນ​ຍີ່ປຸ່ນ ຕະຫຼອດ​ໄລຍະ​ທີ່​ຜ່ານ​ມາ, ໂດຍ​ສະເພາະການ​ຊ່ວຍເຫຼືອ​ທາງ​ການ ເພື່ອ​ການ​ພັດທະນາ (ODA) ແກ່ ສປປ ລາວ, ສະ ເລ່ຍປະມານ 90-100 ລ້ານ ໂດ​ລາ​ຕໍ່​ປີ, ຈັດ​ເປັນ​ອັນ​ດັບ 1 ຂອງ​ຕ່າງປະເທດທີ່​ໃຫ້ການ​ຊ່ວຍເຫຼືອ ສປປ ລາວ ຊຶ່ງ​ໄດ້​ປະກອບສ່ວນ​ອັນ​ສໍາ​ຄັນ​ໃນ​ການ​ພັດທະນາ​ຊັບພະຍາກອນ​ມະນຸດ, ສາທາລະນະ​ສຸກ, ພື້ນ ຖານໂຄງ​ລ່າງ​, ກະ​ສິ​ກໍາ ແລະ ປ່າໄມ້ ແລະ ອື່ນໆ.
  ໃນ​ໂອກາດ​ນີ້, ທ່ານທອງ ສະຫວັນ ພົມວິຫານ ໄດ້​ຕາງ ໜ້າ​ລັດຖະບານ ແລະ ປະຊາ ຊົນ​ລາວ ສະແດງ​ຄວາມຂອບ ໃຈຢ່າງຈິງ​ໃຈ ແລະ ຕີ​ລາຄາສູງ ​ຕໍ່ລັດຖະບານ ແລະ ປະຊາຊົນ ຍີ່ປຸ່ນ ທີ່​ຍາມ​ໃດ​ກໍໄດ້ໃຫ້ການ ສະໜັບສະໜູນຊ່ວຍເຫຼືອ  ສປປ ລາວ ເປັນ​ຢ່າງ​ດີ​ຕະຫຼອດ​ມາ, ພ້ອມ​ທັງ​ໃຫ້ຄໍາໝັ້ນ​ສັນຍາ​ ວ່າ ຈະ​ນໍາ​ໃຊ້​ໂຄງການຊ່ວຍ ເຫຼືອຄັ້ງນີ້ ໃຫ້​ເກີດປະໂຫຍດ ​ສູງ​ສຸດ ເພື່ອພັດທະ ນາ​ຂະແໜງ​ສາທາລະນະ​ສຸກຂອງ ສປປ ລາວ ກໍ ຄື​ປະເທດ​ລາວ ໃຫ້​ນັບ​ມື້​ໄດ້​ຮັບ​ການ​ພັດທະນາ ແລະ ຈະເລີນ​ກ້າວໜ້າ​ຂຶ້ນ​ໄປ ​ເລື້ອຍໆ, ອວຍພອນ​ໃຫ້ສາຍ ​ພົວພັນ​ມິດຕະພາບ ແລະ ການ​ເປັນ​ຄູ່​ຮ່ວມ​ຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໄດ້​ຮັບ​ການ​ພັດທະນາ​ຢ່າງ​ບໍ່​ຢຸດ​ຢັ້ງ.
(ຂ່າວ+ພາບ: ແສງ​ຈັນ)