ກອງ​ປະຊຸມ​ໃຫຍ່​ຜູ້​ແທນ​​ສະຫະພັນ​ນັກຮົບ​ເກົ່າ​ແຂວງ ສາລະ​ວັນ ຄັ້ງ​ທີ IV ໄດ້​ເປີດ​ຂຶ້ນ ແລະ​ ປິດ​ລົງ​ຢ່າງ​ເປັນ​ທາງ​ການ​ເມື່ອບໍ່​ດົນ​ຜ່ານ​ມາ​ນີ້, ຢູ່​ທີ່​ສະໂມສອນ​ໃຫຍ່​ຂອງ​ແຂວງ​ໂດຍ​ການ​ໃຫ້​ກຽດ​ເປັນ​ປະທານ​ຂອງ​ສະຫາຍ ພົວ ສົມ​ພອນ ແກ້ວ​ມີ​ໄຊ ປະທານ​ສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ, ສະຫາຍ ບຸນ​ທຽມ ແກ້ວ​ໄຊ​ຍະ​ວົງ ຮອງ​ເລຂາ​ພັກ​ແຂວງ ຫົວໜ້າ​ຄະນະ​ຈັດ​ຕັ້ງ​ແຂວງ​ສາລະ​ວັນ, ມີ​ພາກສ່ວນ​ກ່ຽວຂ້ອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.
ສະຫາຍ ພັທ ບຸນ​ຖອງ ແກ້ວ​ສຸ​ມົນ​ທາ ຮອງ​ປະທານ ສະຫະພັນ​ນັກຮົບ​ເກົ່າແຂວງ ໃຫ້​ກຽດ​ຂຶ້ນ​ຜ່ານ​ບົດ​ລາຍ​ງານ​ການເມືອງ​ທັງ​ສອງ​ພາກ ໂດຍ​ໄດ້​ຍົກ​ໃຫ້​ເຫັນ​ຜົນສຳເລັດ​ຫຼາຍ​ດ້ານ​ໃນ​ໄລຍະ​ຜ່ານ​ມາ ​ຊຶ່ງ​ມີ​ທັງ​ດ້ານ​ດີ, ດ້ານ​ອ່ອນ ແລະ ຂໍ້​ຄົງ​ຄ້າງ. ພ້ອມ​ກັນ​ນັ້ນ, ບັນດາ​ຜູ້​ແທນ​ທີ່​ເຂົ້າ​ຮ່ວມ​ກອງ​ປະຊຸມ​ຍັງ​ໄດ້​ພ້ອມ​ກັນ​ຄົ້ນຄວ້າ, ປະກອບ​ຄຳ​ຄິດ​-​ຄຳ​ເຫັນ​ໃສ່​ຮ່າງ​ບົດ​ລາຍ​ງານ​ການເມືອງ, ບົດ​ສໍາ​ຫຼວດ​ການ​ຊີ້​ນໍາ-ນໍາ​ພາ ຂອງ​ຄະນະ​ບໍລິຫານ​ງານ ສະຫະພັນ​ນັກຮົບ​ເກົ່າ​ແຂວງ​ສະໄໝ​ທີ III ໃນ​ໄລຍະ 5 ປີ ແລະ ທິດ​ທາງ​ໃນຕໍ່ໜ້າ ເພື່ອ​ເຮັດ​ໃຫ້​ວຽກ​ງານ​ດັ່ງກ່າວ​ໄດ້​ຮັບ​ຜົນສຳເລັດ​ຕາມ​ລະດັບ​ຄາດໝາຍ​ທີ່​ວາງ​ໄວ້​ໃນ 5 ປີ​ຕໍ່​ໜ້າ.
ນອກ​ນັ້ນ​ກອງ​ປະຊຸມ​ໄດ້​ເປັນ​ເອກະສັນ​ກັນ​ຮັບຮອງ​ເອົາ​ສະຫາຍ ພັທ ສໍາ​ລີ ໂພທິ​ສານ ເປັນ​ປະທານ​ສະຫະພັນ​ນັກຮົບ​ເກົ່າ​ແຂວງ​ສາລະ​ວັນ, ສະຫາຍ ພັຕ ບົວ​ແກ້ວ ລິນ​ທາ​ສອນ ເປັນ​ຮອງ​ປະທານ ທັງ​ເປັນ​ປະທານ​ກວດກາ, ສະຫາຍ ພັທ ພູ​ວັນ ລົດ​ຈາ​ນາ ເປັນ​ຮອງ​ປະທານ, ສະຫາຍ ຮທ ນ ສົມ​ໃຈ ສຸກ​ສະໄໝ ເປັນ​ຮອງ​ປະທານ​ກວດກາ ແລະ 8 ສະຫາຍ​ເປັນ​ກໍາ​ມະ​ການ​ຄະນະ​ບໍລິຫານ​ງານ ສະຫະພັນ​ນັກຮົບ​ເກົ່າ​ແຂວງ​ສະໄໝ​ທີ IV.
(ໂດຍ: ກິນ​ດາ​ວັນ)