ເມືອງໜອງບົກ ວາງຄາດໝາຍປູກເຂົ້ານາປີ 15.700 ເຮັກຕາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 12/06/2020 09:02:30 ຈຳ​ນວນ​​ຢ້ຽມ​ຊົມ 2056 ຄັ້ງ

  ທ່ານ ຄຳ​ມອນ ພົມ​ພິພັກ ຫົວໜ້າ​ຫ້ອງການ​ກະສິກຳ ແລະ ປ່າໄມ້​ເມືອງ​ໜອງ​ບົກ ແຂວງ​ ຄຳ​ມ່ວນ ລາຍ​ງານ ໃນ​ວັນ​ທີ 10 ມິຖຸນາ​ຜ່ານ​ມາ ໃຫ້​ຮູ້​ວ່າ: ສະພາບ​ການ​ຜະລິດເຂົ້ານາ ແຊງ​ສົກ​ປີ 2019-2020 ໃນ​ທົ່ວ​ເມືອງ​ໜອງ​ບົກ  ໄດ້​ວາງ​ຄາດໝາຍ​ຈຳນວນ 2.800 ເຮັກຕາ, ສາມາດ​ຈັດ​ຕັ້ງ​ປະຕິ ບັດ​ຕົວ​ຈິງ​ໄດ້ 3.600 ເຮັກຕາ, ລື່ນ​ແຜນການ  800 ເຮັກຕາ ໃນ​ນັ້ນ​ແມ່ນ​ໄດ້​ສຳເລັດ​ການ​ເກັບ​ກ່ຽວ​ໃນ​ຕົ້ນ​ເດືອນ​ພຶດສະພາ, ສະເລ່ຍ​ສະມັດຖະ​ພາບ  5,7 ໂຕນ​ຕໍ່​ເຮັກຕາ,  ລວມ​ຜົນ​ຜະ ລິດ 20 ພັນ​ກວ່າ​ໂຕນ ສຳລັບ​ການ​ຜະລິດ​ເຂົ້ານາ​ປີ  2020 ປັດຈຸບັນ​ແມ່ນ​ສຳເລັດ​ການ​ຕົກ ກ້າ​ແລ້ວ 100% ແລະ ໄຖ​ຮຸດ​ໄດ້​ແລ້ວ​ປະມານ 60%  ໃນ​ເນື້ອທີ່​ທັງ​ໝົດ 15.700 ເຮັກຕາ  ໃນ​ນີ້​ມີນາ​ຫວ່ານ 5 ພັນ​ກວ່າ​ເຮັກຕາ ຫຼື​ກວມ​ເອົາ 35% ຂອງ​ເນື້ອທີ່​ທັງ​ໝົດ ແລະ ໄດ້​ສຳເລັດ​ການ​ເຮັດ​ນາຫວ່ານ​ແລ້ວ 100%. ສະເພາະ​ແຜນການ​ປູກ​ພືດ​ໃນ​ລະດູຝົນ ມີ​ເນື້ອທີ່​ທັງ​ໝົດ 644 ເຮັກຕາ. ປະຕິບັດ​ໄດ້​ແລ້ວ 50% ເປັນຕົ້ນ​ແມ່ນ​ການ​ປູກ​ໝາກຖົ່ວ, ໝາກແຕງ, ສາລີ, ໝາກອຶ, ໝາກເຂືອ ແລະ ພືດ​ຜັກ ​ຕ່າງໆ ຊຶ່ງ​ຄາດ​ວ່າ​ຈະ​ປູກ​ໃຫ້​ສຳເລັດ​ໃນ​ທ້າຍ​ເດືອນ​ມິຖຸນາ​ນີ້. 
  ສຳລັບ​ແຜນການ​ຮອງ​ຮັບ​ໃຫ້​ແກ່​ການ​ຕ້ານ​ແລ້ງ​-​ຕ້ານ​ຖ້ວມ ທາງ​ຫ້ອງການ​ກະສິກຳ ແລະ ປ່າໄມ້​ເມືອງ​ໄດ້ ປະສານ​ສົມທົບ​ກັບ 3 ກຸ່ມ​ການ​ຜະລິດ​ແນວ​ພັນ​ເຂົ້າຂອງ​ເມືອງ​ເປັນ ຕົ້ນກຸ່ມ​ຜະລິດ​ແນວ​ພັນ​ເຂົ້ານາ​ວາງ​ທົ່ງ, ນາ​ວາງ​ໃຫຍ່ ແລະ ກຸ່ມ​ຜັກ​ອີ່​ຕູ່ ເພື່ອ​ກະກຽມ​ແນວ​ພັນ​ຈຳນວນ​ໜຶ່ງ​ຕອບ​ສະໜອງ​ໃຫ້​ແກ່​ຊາວ​ກະສິກອນ​ໃນເວ ລາ​ສຸກ​ເສີນ. ນອກ​ນັ້ນກໍ່​ຍັງ​ໄດ້​ລົງ​ຊຸກຍູ້​ອຳນາດ​ການ​ປົກ ຄອງ ແລະ ພໍ່​ແມ່​ປະຊາຊົນ​ໃນ​ ເຂດ​ທີ່​ມີ​ຊົນລະປະທານໃຫ້​ ກະກຽມ​ສ້ອມແປງລະບົບ​ຊົນ ລະປະທານ ແລະ ບ້ານ​ທີ່​ບໍ່​ມີ​ລະບົບ​ຊົນລະປະທານ​ກໍ​ໃຫ້​ກະກຽມ​ຈັກ  ​ເພື່ອ​ສູບ​ນໍ້າຈາກ​ຫ້ວຍຮ່ອງ​ຄອງ​ບຶງຂຶ້ນ​ຫົດ​ເນື້ອທີ່​ຖ້າ​ຫາກ​ສະພາບ​ຝົນຕົກ​ບໍ່​ປົກ​ກະ​ຕິ. 
   (ຂ່າວ: ກອງ​ຄຳ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110