3 ຂະແໜງການກະສິກຳ ແຂວງສາລະວັນ ລົງຊຸກຍູ້ການຜະລິດລະດູຝົນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/06/2020 09:40:10 ຈຳ​ນວນ​​ຢ້ຽມ​ຊົມ 1589 ຄັ້ງ

  ເພື່ອ​ເປັນ​ການ​ຄ້ຳປະກັນ​ເຮັດ​ໃຫ້​ສະບຽງ​ອາຫານ​ພຽງພໍ​ກັບ​ຄວາມ​ຕ້ອງການ ແລະ ມີ​ຄັງ​ແຮ​ເກັບ​ໄວ້​ໃນ​ເວລາ​ສຸກ​ເສີນ ແລະ ​ຈຳເປັນ. ດັ່ງນັ້ນ, ​ມາ​ໃນ​ ວັນ​ທີ 9-11 ມິຖຸນາຜ່ານມາ ຂະ ແໜງ​ຊົນລະປະທານ, ຂະແໜງ​ປູກຝັງ ແລະ ຂະແໜງ​ຄຸ້ມ​ຄອງ ແລະ ​ພັດທະນາ​ທີ່​ດິນ​ກະສິກຳ ແຂວງ​ສາລະ​ວັນ ໄດ້​ສົມທົບ​ກັບ​ຫ້ອງການ​ກະສິກຳ ແລະ ​ປ່າໄມ້​ເມືອງ ລົງ​ຊຸກຍູ້ຂະບວນ​ການ​ຜະລິດ​ຂອງ​ພໍ່​ແມ່​ ປະຊາຊົນ​ໃນ​ລະດູຝົນ ຢູ່ 4 ເມືອງ ຄື: ເມືອງ​ສາລະ​ວັນ, ວາປີ, ຄົງ​ເຊ​ໂດນແລະ ເມືອງ​ລະຄອນ​ເພັງ ມີ​ທັງໝົດ 6 ຈຸດ, ມີ 20 ບ້ານ ​ເຂົ້າ​ຮ່ວມ.
  ຕາມ​ແຜນການ​ຜະລິດ​ເຂົ້າ​ໃນ​ລະດູຝົນ ເປົ້າ​ໝາຍ​ມີ 84 ພັນ​ເຮັກຕາ, ຄາດ​ຄະເນ​ຜົນ​ຜະລິດ ໃຫ້​ໄດ້ 395.000 ໂຕນ, ສະມັດ​ຖະ​ພາບ ສະເລ່ຍ 4,7 ໂຕນ​ຕໍ່​ເຮັກຕາ, ລວມ​ມີ​ເຂດ​ຈຸດ​ສຸມ​ຍົກ​ສະມັດ​​ຖະ​ພາບ 100 ເຮັກຕາ, ຜົນ​ຜະລິດ​ໃຫ້​ໄດ້ 6 ໂຕນ​ຕໍ່​ເຮັກຕາ, ມີ 41 ບ້ານ, 772 ຄອບຄົວ, ໃນ​ນັ້ນ​ເນື້ອທີ່​ເຂົ້າ GAP, ມີ 180 ເຮັກຕາ, ມີ 12 ບ້ານ 154 ຄອບຄົວ ນອນ​ໃນ 4 ເມືອງ​ທົ່ງພຽງ ຄື: ເມືອງ​ສາລະ​ວັນ, ວາປີ, ຄົງ​ເຊ​ໂດນ, ເມືອງ​ລະຄອນ​ເພັງ ແລະ​ ມີ​ຕົວ​ແບບ​ການ​ຜະລິດ​ເຂົ້າ 8 ເຮັກຕາ  8 ຄອບຄົວ​ ໂດຍ​ແບ່ງ​ເຂດ​ການ​ຜະລິດ​ຍົກ​ສະມັດ​ຖະ​ພາບ​ຄື: ເຂດ​ຜະລິດ​ເຂົ້າ​ທີ່​ສະມັດ​ຖະ​ພາບ ສະເລ່ຍ 4,5-5,5 ໂຕນ, ມີ 25.200 ເຮັກຕາ, ເຂດ​ຜະລິດ​ເຂົ້າ​ສະມັດ​ຖະ​ພາບ ສະເລ່ຍ 3,6 - 4,4 ໂຕນ​ຕໍ່​ເຮັກຕາ ມີ 57.800 ເຮັກຕາ ແລະ ປູກ​ພືດ​ຕາມ​ແຜນການ 61.295 ເຮັກຕາ, ຄາດ​ຄະເນ​ຜົນ​ຜະລິດ 846.200 ໂຕນ, ພືດ​ເປັນ​ສິນຄ້າ 54.595 ເຮັກຕາ, ຄາດ​ຄະເນ​ຜົນຜະລິດ 799.380 ໂຕນ, ພືດຜັກ​​ເປັນສະບຽງ​ອາຫານ 6.700 ເຮັກຕາ, ຄາດ​ຄະເນ​ຜົນ​ຜະລິດ 46.820 ໂຕນ. ມາ​ຮອດ​ປັດຈຸບັນ ການ​ສະໜອງ​ແນວ​ພັນ​ເຂົ້າ​ໃຫ້​ແກ່​ຊາວ​ກະສິກອນ​ໃນ​ເຂດ​ຈຸດ​ສຸມ ປະຕິບັດ​ໄດ້​ແລ້ວ​ຈຳນວນ 20 ໂຕນ, ການ​ປູກ​ພືດ​ປະຕິບັດ​ໄດ້ 27.857 ເຮັກຕາ ເທົ່າ​ກັບ 70%, ມັນຕົ້ນ ປະຕິບັດ​ໄດ້ 24.401 ເຮັກຕາ​ເທົ່າ​ກັບ 89%, ພືດ​ເປັນ​ສິນຄ້າ ປະຕິບັດ​ໄດ້ 25.313 ເຮັກຕາ ເທົ່າ​ກັບ 77%
  ການ​ລົງ​ຊຸກຍູ້​ຄັ້ງ​ນີ້​ກໍແມ່ນ​ປະຕິບັດ​ຕາມ​ຄຳ​ສັ່ງ​ແນະນຳ​ຂອງ​ລັດຖະມົນຕີ​ກະຊວງ​ກະ​ສິ ກຳ ແລະ ປ່າໄມ້ ເລກ​ທີ 0587/ກປ ລົງ​ວັນ​ທີ 25 ພຶດສະພາ 2020 ກ່ຽວ​ກັບ​ການ​ເພີ່ມ​ທະວີ​ຄວາມ​ຮັບຜິດຊອບ​ຕໍ່​ການ​ຜະລິດ​ລະດູຝົນ ແລະ ​ຄໍາ​ສັ່ງ​ແນະນຳ​ເລກ​ທີິ 0434/ກປ ລົງ​ວັນ​ທີ 30 ເມສາ 2020 ແລະ​ ຄຳ​ສັ່ງ​ແນະນຳ​ເລກ​ທີ 0994/ກປຂ.ສວ ລົງ​ວັນ​ທີ 2 ມິຖຸນາ 2020, ໃນ​ນັ້ນ​ແຕ່​ລະ​ຂະແໜງການ ກໍ​ໄດ້​ອະ​ທິບາຍ, ແນະ​ນໍາ​ວິທີ​ການ​ບົວລະບັດ​ຮັກສາ, ການ​ໃສ່​ຝຸ່ນ​ໃນ​ດິນ​ແຕ່​ລະ​ປະເພດ, ການ​ປັກ​ດຳ ແລະ ການ​ປາບ​ສັດຕູ​ພືດ​ຕ່າງໆ, ພ້ອມ​ທັງ​ແຮ​ແນວ​ພັນ​ເຂົ້າ​ໄວ້​ໃນ​ເວລາ​ສຸກ​ເສີນ​ຈຳເປັນ ບໍ່​ໃຫ້​ຕົກ​ໝົດ, ແນວ​ພັນ​ທີ່​ໃຊ້ ໄດ້​ແນະນຳ​ໃຫ້​ໃຊ້​ແນວ​ພັນ​ເຂົ້າ​ກາງ ແລະ ເຂົ້າ​ດອກ, ບໍ່​ໃຫ້​ໃຊ້​ແນວ​ພັນ​ເຂົ້າງັນ ເພາະ​ຢ້ານ​ມີ​ບັນຫາ​ຕໍ່​ກັບ​ການ​ຜະລິດ​ຂອງ​ຕົນ ແລະ​ໃຫ້​ແຕ່​ລະ​ເມືອງ, ແຕ່​ລະ​ບ້ານ ມີ​ການ​ແຕ່ງຕັ້ງ​ຄະນະ​ສະເພາະ​ກິດ​ໃນ​ແຕ່​ລະ​ຂັ້ນ​ເພື່ອ​ກຽມ​ຮັບ​ມື​ໃນ​ການ​ຕ້ານ​ແລ້ງ​-​ຕ້ານ​ຖ້ວມ. ຈາກ​ນັ້ນ​ພໍ່​ແມ່​ປະຊາຊົນ​ກໍໄດ້​ມີ​ຄໍາ​ຄິດ​ເຫັນ​ສະເໜີ​ຕໍ່​ທີ​ມ​ງານ ທີ່​ລົງ​ໄປ, ໂດຍ​ສ່ວນ​ໃຫຍ່​ຊາວ​ກະສິກອນ ໃນ​ແຕ່​ລະ​ເຂດສະເໜີ​ເລື່ອງ​ຊົນລະປະທານ, ນໍ້າ, ແນວ​ພັນ​ເຂົ້າ, ວິທີ​ປາບ ແລະ ກຳຈັດ​ສັດຕູ​ພືດ 
(ພາບ​-​ຂ່າວ: ສິດ​ຕາ ເພັດ​ວົງສາ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110