ໜັງສືພິມ ປະຊາຊົນ

ເຢຍລະມັນ ສືບຕໍ່ສະໜັບສະໜູນການຄຸ້ມຄອງປ່າໄມ້

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 18/06/2020 08:58:37 ຈຳນວນຢ້ຽມຊົມ 934 ຄັ້ງ

ລັດຖະບານລາວ ແລະ ເຢຍລະມັນ ໄດ້ຕົກລົງເຫັນດີ ທີ່ຈະຈັດຕັ້ງປະຕິບັດ ໂຄງການ “ປ້ອງກັນດິນຟ້າອາກາດ ໂດຍຫຼີກລ່ຽງການທຳລາຍປ່າໄມ້ (CliPAD)” ໄລຍະໃໝ່ ແລະ ແຜນງານ’’ ການຈັດຕັ້ງປະຕິ ບັດການສ້າງຄວາມເຂັ້ມແຂງໃນວຽກງານປ່າໄມ້, ການຄຸ້ມ ຄອງປ່າໄມ້ແບບພູມີທັດ ແລະ ສົ່ງເສີມຊີວິດການເປັນຢູ່ (I-GFLL)”. ສັນຍາສະບັບ ນີ້ປະກອບ ມີການປະກອບ ສ່ວນຂອງ ເຢຍລະມັນມີມູນຄ່າ 6.500.000 ເອີໂຣ ແລະ ການປະກອບສ່ວນຮ່ວມສະ ໜອງທຶນຂອງກອງທຶນດິນຟ້າອາກາດສີຂຽວ (GCF) ມູນຄ່າ 16.140.000 ເອີໂຣ ໂດຍມີຈຸດປະສົງ ເພື່ອຈັດຕັ້ງປະຕິບັດ ແຜນງານຫຼຸດຜ່ອນການປ່ອຍອາຍພິດເຮືອນແກ້ວຂອງ ສປປ ລາວ ຜ່ານການປັບປຸງການ ຄຸ້ມຄອງບໍລິຫານ ແລະ ການ ຄຸ້ມຄອງພູມີທັດປ່າໄມ້ ແບບຍືນຍົງ.
ພິທີເຊັນສັນຍາ ວ່າດ້ວຍການຈັດຕັ້ງປະຕິບັດດ້ານວິຊາການ ໂດຍກົມປ່າໄມ້ (ກະຊວງກະສິກຳ ແລະ ປ່າໄມ້) ແລະ GIZ ໄດ້ຈັດຂຶ້ນໃນວັນທີ 17 ມິຖຸນານີ້ ທີ່ໂຮງແຮມຄຣາວພາຊາ ໂດຍຕາງໜ້າໃຫ້ຝ່າຍເຢຍລະມັນ ແມ່ນ ທ່ານ ໂອລີເວີ ວັດເທັນເບີກ (Oliver Wattenberg ຫົວໜ້າບໍລິຫານ ແລະ ການເງິນ GIZ, ທ່ານ ເຈນ ກາລາບິນກີ (Jens Kalabineki) ຫົວໜ້າທີມງານທີ່ປຶກສາໂຄງການ CliPAO ແລະ ຝ່າຍລາວ ແມ່ນ ທ່ານ ນາງ ສີສົມບຸນ ອຸນາວົງ ຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ, ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ ກະຊວງກະສິກຳ ແລະ ປ່າໄມ້ ໂດຍການໃຫ້ກຽດເຂົ້າຮ່ວມມີ ທ່ານ ທອງພັດ ວົງມະນີ, ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ທອງພັດ ວົງມະນີ ໄດ້ເນັ້ນໜັກວ່າ: ສັນຍາສະບັບນີ້ ສະແດງເຖິງ ຄວາມມຸ່ງໝັ້ນ ທີ່ພວກເຮົາກໍາລັງສືບຕໍ່ຈັດຕັ້ງປະຕິບັດຢູ່ ແລະ ທັງເປັນການເພີ່ມທະວີການຮ່ວມມືສອງຝ່າຍ ລະຫວ່າງ ລັດຖະບານລາວ ແລະ ເຢຍລະມັນ. ໃນໄລຍະແຕ່ປີ 2009 ຫາ 2019, ໂດຍໄດ້ຮັບການສະໜັບສະ ໜູນ ຈາກໂຄງການ, ປະເທດລາວ ໄດ້ມີຄວາມຄືບໜ້າ ທີ່ເປັນຮູບປະທໍາ ໄປສູ່ ການບັນລຸເປົ້າໝາຍ ແຫ່ງການພັດທະນາ ແບບຍືນຍົງ ໂດຍສະເພາະທີ່ກ່ຽວຂ້ອງກັບການຫຼຸດຜ່ອນ ການປ່ຽນແປງຂອງດິນຟ້າອາກາດດ້ວຍການຫຼຸດຜ່ອນການປ່ອຍອາຍພິດເຮືອນແກ້ວ ຈາກຂະແໜງການນຳໃຊ້ທີ່ດິນ ແລະ ປ່າໄມ້. ໂຄງການ ຈະຫຼຸດຜ່ອນ 5,6 ລ້ານໂຕນ ໃນໄລຍະເວລາການຈັດຕັ້ງປະຕິບັດ 4 ປີ ຊຶ່ງໄດ້ສ້າງຜົນປະໂຫຍດແກ່ປະຊາຊົນໃນ 3 ແຂວງພາກເໜືອຂອງລາວ ໂດຍການສົ່ງເສີມການຄຸ້ມຄອງປ່າໄມ້, ພູມີທັດ ແລະ ຊັບພະຍາກອນກະສິກຳແບບຍືນຍົງ. ໃນການເຮັດວຽກຮ່ວມກັບອໍານາດການປົກຄອງ ໃນຂັ້ນສູນກາງ ແລະ ທ້ອງຖີ່ນ ລວມທັງບັນດາຜູ້ມີບົດບາດ ທີ່ບໍ່ສັງກັດລັດ ຈະໄດ້ປັບປຸງສະພາບເງື່ອນໄຂສໍາລັບການຄຸ້ມຄອງປ່າໄມ້ແບບຍືນຍົງ ແລະ ໂດຍສະເພາະ ສຳລັບການຫຼຸດຜ່ອນການປ່ອຍອາຍພິດເຮືອນແກ້ວຈາກການທຳລາຍປ່າໄມ້ ແລະ ການເຮັດໃຫ້ປ່າໄມ້ເສື່ອມໂຊມ (REDD+).”
ທ່ານ ເຢັນ ລູກເກິນແຮມ ກ່າວວ່າ: “ການປົກປັກຮັກສາ ດິນຟ້າອາກາດ ຜ່ານການຄຸ້ມຄອງປ່າໄມ້ ແລະ ກະສິກຳ ແບບຍືນຍົງທີ່ເຢຍລະມັນ ໃຫ້ການສະໜັບສະໜູນ. ໂຄງການຈະສືບຕໍ່ເສີມສ້າງຄວາມອາດສາມາດ ຂອງ ລັດຖະບານລາວ, ພາກເອກະຊົນ ແລະ ຊຸມຊົນທີ່ອາໄສປ່າໄມ້ ໃນ 3 ແຂວງ ເພື່ອຄຸ້ມຄອງປ່າໄມ້ ຂອງປະເທດ ໃຫ້ມີຄວາມຍືນຍົງຫຼາຍຂຶ້ນ ພ້ອມທັງປົກປັກຮັກສາປ່າໄມ້ ໃຫ້ມີປະສິດທິພາບຫຼາຍຂຶ້ນ ເພື່ອຜົນປະໂຫຍດຂອງຄົນຮຸ່ນຕໍ່ໄປ. ເງື່ອນໄຂຂອງກອບວຽກ (REDD+) ໃນລາວ ຈະໄດ້ຮັບການສ້າງຄວາມເຂັ້ມແຂງ ແລະ ພວກເຮົາຈະລົງທຶນເຂົ້າໃນ ການຄຸ້ມຄອງກະສິກຳ ແລະ ປ່າໄມ້ ເພື່ອແກ້ໄຂສາເຫດຂອງການທຳລາຍປ່າໄມ້ ແລະ ການເຮັດໃຫ້ປ່າໄມ້ເສື່ອມໂຊມ. ໃນຕອນທ້າຍ, ພວກເຮົາຢາກຈະເຫັນໂຄງການສ້າງຜົນປະໂຫຍດແກ່ປະຊາຊົນລາວ ຈາກການຈ່າຍເງິນທີ່ອີງຕາມຜົນງານ”.
ໂຄງການສຸມໃສ່ຂົງເຂດ 1) ສ້າງຄວາມເຂັ້ມແຂງໃຫ້ແກ່ການສ້າງສະພາບແວດລ້ອມທີ່ເອື້ອອຳນວຍຕໍ່ວຽກງານ REDD+ ຜ່ານ 3 ວິທີການຕົ້ນຕໍຄື: ເພີ່ມທະວີຄວາມພ້ອມ ໃນການສະໜອງທຶນ ເພື່ອການຫັນປ່ຽນ ໃນລັກສະນະທີ່ປະເທດລາວ ຄຸ້ມຄອງພູມີທັດປ່າໄມ້ ຂອງຕົນເອງ; ປັບປຸງ ແລະ ສ້າງຄວາມເຂັ້ມແຂງແກ່ຂອບນິຕິກໍາ ແລະ ລະບຽບການສຳລັບຂະແໜງປ່າໄມ້ ແລະປັບປຸງ ການປະຕິບັດຂອບລະບຽບການໃໝ່. 2) ສະໜັບສະໜູນ ການເຮັດກະສິກຳ ແລະ ກະສິກໍາປ່າໄມ້ແບບປະສົມປະສານ ທີ່ປາສະຈາກການທໍາລາຍປ່າໄມ້ ໂດຍການເພີ່ມຜະລິດຕະຜົນ, ເພີ່ມການເຊື່ອມໂຍງ ຂອງຊາວກະສິກອນ ເຂົ້າໃນຕ່ອງໂສ້ມູນຄ່າກະສິກຳ ແລະ ປັບປຸງການເຂົ້າເຖິງແຫຼ່ງທຶນ ແລະ ການມີສ່ວນຮ່ວມຂອງພາກເອກະຊົນ ໃນກິດຈະກຳທາງເສດຖະກິດ ທີ່ຫຼຸດຜ່ອນ ຄວາມກົດດັນຕໍ່ປ່າໄມ້. 3) ສະໜັບສະໜູນການຈັດຕັ້ງປະຕິບັດການຄຸ້ມຄອງພູມີທັດປ່າໄມ້ແບບຍືນຍົງ (SFM) ແລະ ການຟື້ນຟູພູມີທັດປ່າໄມ້ (FLR) ໃນເນື້ອທີ່ດິນເສື່ອມໂຊມຫຼາຍກວ່າ 1,5 ລ້ານເຮັກຕາ.
ໂຄງການດັ່ງກ່າວຈະຈັດຕັ້ງປະຕິບັດຢູ່ແຂວງໄຊຍະບູລີ, ເເຂວງຫຼວງພະບາງ ແລະ ແຂວງຫົວພັນ ໂດຍກະຊວງກະສິກຳ ແລະ ປ່າໄມ້ຈັດຕັ້ງປະຕິບັດ ຮ່ວມກັບ GIZ ໃນນາມຕາງໜ້າລັດຖະບານເຢຍລະມັນ. ໂຄງການໄລຍະນີ້ ຈະຖືກຈັດຕັ້ງປະຕິບັດ ຈົນຮອດ ເດືອນມິຖຸນາ ປີ 2024.
(ຂ່າວຈາກ ຈີໄອແຊ້ດ ຮູບ ສຸກສະຫັວນ)

ຂ່າວທີ່ໄດ້ຮັບຄວາມນິຍົມ