ໜັງສືພິມ ປະຊາຊົນ

ກະຊວງ ຍທຂ ປະກອບຄຳເຫັນໃສ່ຮ່າງ ກົດໝາຍວ່າດ້ວຍຍານພາຫະນະທາງບົກ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 02/07/2020 09:03:32 ຈຳນວນຢ້ຽມຊົມ 502 ຄັ້ງ

ກອງປະຊຸມເປີດກວ້າງ ເພື່ອປະກອບຄຳເຫັນໃສ່ຮ່າງກົດໝາຍວ່າດ້ວຍຍານພາຫະ ນະທາງບົກ ໄດ້ຈັດຂຶ້ນໃນທ້າຍເດືອນມິຖຸນາຜ່ານມານີ້ ຢູ່ແຂວງສະຫວັນນະເຂດ ໂດຍການເປັນປະທານຂອງ ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ (ຍທຂ), ທ່ານ ໂພໄຊ ໄຊຍະສອນ ຮອງເຈົ້າແຂວງໆສະຫວັນນະເຂດ; ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະ ຊຸມໃນຄັ້ງນີ້, ເພື່ອປະກອບຄໍາຄິດຄໍາເຫັນໃສ່ຮ່າງກົດໝາຍວ່າດ້ວຍຍານພາຫະນະທາງບົກ, ໃຫ້ອຸດົມສົມບູນໄປດ້ວຍເນື້ອໃນຊຶ່ງຮ່າງກົດໝາຍສະບັບນີ້ ເປັນກົດໝາຍສ້າງໃໝ່ ທີ່ມີຄວາມສຳຄັນຫຼາຍ ທັງເປັນຄວາມຮຽກ ຮ້ອງຕ້ອງການຂອງເສດ ຖະກິດ - ສັງຄົມ, ໃນປັດຈຸບັນຕາມ ແຜນແມ່ນ ຈະເອົາເຂົ້າຜ່ານກອງປະຊຸມສະໄໝສາ ມັນ ຄັ້ງທີ 10 ຂອງສະພາແຫ່ງ ຊາດຊຸດທີ VIII ເດືອນ 11/2020 ໂດຍປະຕິບັດຕາມຂັ້ນຕອນ ແລະ ລະບຽບການຜ່ານຮ່າງກົດໝາຍ ກອງປະຊຸມເປີດກວ້າງ ພວກເຮົາໄດ້ ກໍານົດຈັດຂຶ້ນຢູ່ສອງພາກຄື: ພາກກາງ ແລະ ພາກໃຕ້ ແມ່ນ ຈັດຂຶ້ນຢູ່ແຂວງສະຫວັນນະເຂດ ໃນລະຫວ່າງວັນທີ 24-26 ມິຖຸນາ 2020 ແລະ ພາກເໜືອ ຈະຈັດຂຶ້ນ ໃນລະຫວ່າງວັນທີ 1-3 ກໍລະກົດ 2020 ທີ່ແຂວງ ຫຼວງພະບາງ.
ປັດຈຸບັນ ວຽກງານກ່ຽວກັບຍານພາຫະນະໄດ້ມີບາດກ້າວຂະຫຍາຍຕົວຢ່າງກະໂດດ ເປັນຕົ້ນການນໍາເຂົ້າ, ການຜະ ລິດ, ການປະກອບ, ການຈໍາໜ່າຍ, ການຂຶ້ນທະບຽນ, ການນໍາໃຊ້ ແລະ ອື່ນໆ ແຕ່ການຄຸ້ມຄອງວຽກງານດັ່ງກ່າວ ຍັງບໍ່ທັນມີຄວາມເປັນລະບຽບຮຽບຮ້ອຍ ແລະ ຮັດກຸມເທົ່າທີ່ຄວນ ເຮັດໃຫ້ມີຄວາມຫຍຸ້ງຍາກ ແລະ ເຮັດໃຫ້ລັດເສຍລາຍຮັບ ເປັນຈໍານວນຫຼວງຫຼາຍ ເນື່ອງຈາກວ່າ ພວກເຮົາຍັງບໍ່ທັນມີກົດໝາຍ ເພື່ອຄຸ້ມຄອງວຽກງານດັ່ງກ່າວ, ມີແຕ່ລະບຽບການຈໍານວນໜຶ່ງ ທີ່ນໍາໃຊ້ເພື່ອເປັນເຄື່ອງມືເພື່ອຄຸ້ມຄອງ. ສະນັ້ນ, ຈຶ່ງມີຄວາມຈໍາເປັນສ້າງກົດໝາຍວ່າດ້ວຍຍານພາຫະນະຂຶ້ນ ເພື່ອເປັນເຄື່ອງມືຄຸ້ມຄອງ ວຽກງານດັ່ງກ່າວ ໃຫ້ມີປະ ສິດທິພາບ, ປະສິດທິຜົນສູງ. ພາຍຫຼັງທີ່ກົດໝາຍສະບັບນີ້ໄດ້ຖືກຮັບຮອງແລ້ວ ຈະເປັນເຄື່ອງມືອັນໜຶ່ງ ເພື່ອຄຸ້ມຄອງຫຼາຍວຽກ ກ່ຽວກັບວຽກງານຍານພາຫະນະ ເປັນຕົ້ນການຂຶ້ນທະບຽນ, ການເສຍຄ່າທໍາ ນຽມທາງ, ການກວດກາເຕັກ ນິກ ແລະ ອື່ນໆ ຊຶ່ງຈະເປັນການປະກອບສ່ວນສ້າງລາຍຮັບ ເຂົ້າງົບປະມານເປັນຈໍານວນ ຫຼວງຫຼາຍ, ກົດໝາຍວ່າດ້ວຍຍານພາຫະນະທາງບົກ ກະຊວງ ຍທຂ ໄດ້ຮ່າງສໍາເລັດໂດຍພື້ນ ຖານເປັນທີ່ຮຽບຮ້ອຍແລ້ວ. (ຂ່າວ-ພາບ: ກະຊວງ ຍທຂ)