ໜັງສືພິມ ປະຊາຊົນ

ທາບທາມຄຳເຫັນໃສ່ຮ່າງດຳລັດນາມມະຍົດນັກຂ່າວ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 06/07/2020 09:09:54 ຈຳນວນຢ້ຽມຊົມ 260 ຄັ້ງ

ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມທາບທາມ ແລະ ປະກອບຄຳເຫັນໃສ່ຮ່າງດຳລັດນາມມະຍົດນັກຂ່າວ ເມື່ອວັນທີ 3 ກໍລະກົດຜ່ານມາ ທີ່ກະຊວງດັ່ງກ່າວ ໂດຍການເປັນປະທານ ຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ມີບັນດາຫົວໜ້າກົມ, ກອງ, ສະຖາບັນອ້ອມຂ້າງກະຊວງເຂົ້າຮ່ວມ.
ກອງປະຊຸມ ທ່ານ ທອງຫຼໍ່ ດວງສະຫວັດ ຫົວໜ້າບັນ ນາທິການໃຫຍ່ໜັງສືພິມພາ ສາຕ່າງປະເທດ ສະເໜີຮ່າງ ດຳລັດນາມມະຍົດນັກຂ່າວ ຊຶ່ງຮ່າງດຳລັດດັ່ງກ່າວ ປະກອບມີ 6 ໝວດ, 16 ມາດຕາ, ດຳ ລັດສະບັບນີ້ກຳນົດຫຼັກການ, ລະບຽບການ ແລະ ເງື່ອນໄຂໃນການມອບນາມມະຍົດໃຫ້ນັກຂ່າວ ເພື່ອເປັນການຊຸກຍູ້, ເສີມຂະຫຍາຍບົດບາດ ແລະ ຍົກສູງຄຸນນະພາບຂອງສື່ມວນຊົນ ແນໃສ່ເພື່ອຈາລຶກຄຸນງາມຄວາມດີ ແລະ ຜົນງານອັນດີເດັ່ນຂອງນັກສື່ມວນຊົນລາວທຸກຂະແໜງການທີ່ໄດ້ອຸທິດເຫື່ອແຮງສະຕິປັນຍາເຂົ້າໃນການປະຕິບັດໜ້າທີ່ຂອງຕົນໃນຖານະເປັນນັກຮົບດ້ານຖະແຫຼງຂ່າວ,ເປັນບ່ອນອີງໃນການປະຕິບັດນະໂຍບາຍອັນຊອບທຳທາງດ້ານວັດຖຸ ແລະ ຈິດໃຈກໍຄືດ້ານສະຫວັດດີການສັງຄົມ,ທັງເປັນການເຊີດຊູຖານະບົດບາດຂອງນັກສື່ມວນຊົນລາວໃຫ້ນັບມື້ສູງຂຶ້ນຕໍ່ພາຍໃນ ແລະ ສາກົນ,ນັກຂ່າວແມ່ນຜູ້ທີ່ເຄື່ອນໄຫວດ້ານວຽກງານຖະແຫຼງຂ່າວປະກອບມີນັກຂ່າວ, ນັກວິຊາການດ້ານສື່ມວນຊົນທີ່ມີຜົນງານ, ມີປະສົບການ ແລະ ເປັນທີ່ຍອມຮັບຈາກມະຫາຊົນ, ມີພາລະບົດບາດ ແລະ ໜ້າທີ່ເປັນກະບອກສຽງຂອງອົງການຈັດຕັ້ງພັກ,ລັດ ແລະ ສັງຄົມໃນການໂຄສະນາເຜີຍແຜ່, ສຶກສາອົບຮົມແນວທາງນະໂຍບາຍຂອງພັກ, ລະບຽບ, ກົດໝາຍຂອງລັດ, ປຸກລະດົມນໍ້າໃຈຮັກຊາດ, ສະໜອງຂໍ້ມູນຂ່າວສານດ້ານການເມືອງ, ເສດຖະກິດ, ວັດທະນະທຳ ແລະ ສັງຄົມ, ວິທະຍາສາດ, ເຕັກໂນໂລຊີ, ສາລະຄວາມຮູ້, ສາລະບັນເທີງໃຫ້ແກ່ສັງຄົມ ປະກອບສ່ວນຕ້ານປະກົດການຍໍ້ທໍ້ໃນສັງຄົມ, ຕອບໂຕ້ຖ້ອຍທຳນອງບິດເບືອນຄວາມຈິງ, ເສີມຂະຫຍາຍປະຊາທິປະໄຕ ແລະ ສິດເປັນເຈົ້າປະເທດຊາດຂອງປະຊາຊົນລາວບັນດາເຜົ່າ.
ຈາກນັ້ນບັນດາຜູ້ເຂົ້າຮ່ວມໄດ້ພ້ອມກັນປະກອບຄຳຄິດຄຳເຫັນໃສ່ດຳລັດວ່າດ້ວຍນາມມະຍົດນັກຂ່າວຢ່າງພາວະວິໄສ ແນໃສ່ເພື່ອເຮັດໃຫ້ຮ່າງດຳລັດດັ່ງກ່າວມີຄວາມຮັດກຸມ,ສອດຄ່ອງ,ແທດເໝາະກັບຄວາມເປັນຈິງເພື່ອກ້າວໄປໃນການຈັດຕັ້ງປະຕິບັດໃຫ້ມີຜົນສຳເລັດ.
(ຂ່າວ: ສຳນານ)