ໜັງສືພິມ ປະຊາຊົນ

ອົງການກາແດງແຂວງໄຊຍະບູລີ ສະຫຼຸບວຽກງານ ປະຈຳປີ 2019

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 06/07/2020 09:25:37 ຈຳນວນຢ້ຽມຊົມ 284 ຄັ້ງ

ກອງປະຊຸມສະຫຼຸບວຽກງານອົງການກາແດງແຂວງໄຊຍະບູລີ ປະຈໍາປີ 2019 ແລະ ທິດທາງແຜນການ ປະຈໍາປີ 2020 ໄດ້ຈັດຂຶ້ນເມື່ອທ້າຍເດືອນ ມິຖຸນາຜ່ານມາ ທີ່ຫ້ອງປະຊຸມຫ້ອງວ່າການປົກຄອງເມືອງໄຊຍະບູລີ ໂດຍການເປັນປະທານຂອງທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງ ປະທານອົງການກາແດງແຂວງໄຊຍະບູລີ, ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ວັນນະສິງ ມຸງຄຸນສະຫວັດ ຫົວໜ້າອົງການກາແດງແຂວງ ໄດ້ກ່າວວ່າ: ອົງການກາແດງເປັນອົງການຈັດຕັ້ງທາງສັງຄົມ ເປັນຕົວແທນໃນການປະຕິບັດວຽກງານ ມະນຸດສະທໍາ ໂດຍການມີສ່ວນຮ່ວມ ຂອງທຸກພາກສ່ວນໃນສັງຄົມ, ມີພາ ລະບົດບາດເປັນເສນາທິການໃຫ້ອໍານາດການປົກຄອງຂັ້ນແຂວງ-ຂັ້ນເມືອງ-ບ້ານໃນການຊ່ວຍເຫຼືອບັນເທົາທຸກໃຫ້ແກ່ປະຊາຊົນຜູ້ທຸກຍາກ ຂາດເຂີນ, ຜູ້ປະສົບໄພພິບັດຕ່າງໆ, ປົກປັກຮັກສາສຸຂະພາບຂັ້ນພື້ນ ຖານ, ຈັດຕັ້ງປະຕິບັດການບໍ ລິຈາກເລືອດ ສະໜອງເລືອດປອດໄພ ແລະ ສົ່ງເສີມຄຸນຄ່າດ້ານມະນຸດສະທໍາ, ຂົນຂວາຍແຫຼ່ງທຶນ ແລະ ອາສາສະໝັກກາແດງ ເພື່ອປະກອບສ່ວນໃນວຽກງານມະນຸດສະທໍາຕາມ 7 ຫຼັກການ ຂອງຂະບວນການກາແດງ ແລະ ຊີກວົງເດືອນແດງສາກົນ.
ໃນ 1 ປີຜ່ານມາການຊ່ວຍເຫຼືອບັນເທົາທຸກ ໄດ້ຮັບເຄື່ອງຊ່ວຍເຫຼືອບັນເທົາທຸກຈາກກາແດງລາວສູນກາງ, ກະ ຊວງສາທາລະນະສຸກ ແລະ ຈາກບັນດາເມືອງປະເພດເຄື່ອງຄົວ, ເຄື່ອງນຸ່ງຫົ່ມ ລວມມູນຄ່າ 45 ລ້ານກວ່າກີບ. ນໍາເອົາເຄື່ອງຊ່ວຍເຫຼືອບັນເທົາທຸກໄປມອບໃຫ້ແກ່ຜູ້ທີ່ປະສົບເຄາະຮ້າຍຈາກໄຟໄໝ້, ລົມພາຍຸພັດ, ເກີດລູກຝາແຝດ ແລະ ອື່ນໆ ລວມມູນຄ່າ 30 ລ້ານກວ່າກີບ. ໄດ້ປຸກລະດົມການບໍລິຈາກເລືອດໄດ້ທັງໝົດ 2.796 ຖົງ ເທົ່າກັບ 116,5%, ແຜນສູ້ຊົນໃຫ້ໄດ້ 2.400 ຖົງ. ທ່ານຍັງໄດ້ກ່າວຕື່ມວ່າ: ສົກປີ 2020 ຈະຕ້ອງໄດ້ສູ້ຊົນບໍລິຈາກເລືອດ-ສະໜອງເລືອດປອດໄພໃຫ້ໄດ້ 2.600 ຖົງ ຊຶ່ງມາຮອດປັດຈຸບັນສາມາດປະຕິບັດໄດ້ແລ້ວ 41,96%. ຈາກນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ພ້ອມກັນປະກອບຄໍາຄິດຄໍາເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານອົງການກາແດງໄດ້ຮັບຜົນດີໃນຕໍ່ໜ້າ. ພ້ອມນີ້, ທ່ານ ນາງ ບຸນພັກ ອິນທະປັນຍາ ໄດ້ມອບໃບຍ້ອງຍໍ ຂອງທ່ານເຈົ້າແຂວງໄຊຍະບູລີ ໃຫ້ແກ່ບຸກຄົນ, ກົມກອງ ທີ່ໄດ້ມີພັນທະໃນການຮັບເລືອດ-ສົ່ງເລືອດ ຕື່ມອີກ.
(ຂ່າວ: ມະໄລວັນ)