ໜັງສືພິມ ປະຊາຊົນ

5 ປີ ຜ່ານມາມູນຄ່າການຜະລິດດ້ານອຸດສາຫະກຳ ແລະ ຫັດຖະກຳ ແຂວງໄຊຍະບູລີ ເພີ່ມຂຶ້ນ 38,95%

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 06/07/2020 09:42:40 ຈຳນວນຢ້ຽມຊົມ 320 ຄັ້ງ

ທ່ານ ຈັນເພັງ ພັນທຸອາມາດ ຫົວໜ້າພະແນກອຸດສາຫະກໍາ ແລະ ການຄ້າແຂວງ ໄດ້ໃຫ້ຮູ້ວ່າ: ຕະຫຼອດໄລຍະ 5 ປີຜ່ານມາ ພະແນກການຄ້າແຂວງໄຊຍະບູລີ ແມ່ນໄດ້ເອົາໃຈໃສ່ຊຸກຍູ້ສົ່ງເສີມບັນດານັກທຸລະກິດທັງພາຍໃນ ແລະ ຕ່າງປະເທດໃຫ້ເຂົ້າມາລົງທຶນໃນບັນດາຂະແໜງການຜະລິດອຸດສາຫະກໍາ ແລະ ການຄ້າ ນັບມື້ນັບຫຼາຍຂຶ້ນ ເຮັດໃຫ້ການຜະລິດດ້ານອຸດສາຫະກໍາ ແລະ ການຄ້າ ຂະຫຍາຍຕົວຢ່າງຕໍ່ເນື່ອງ. ໃນປັດຈຸບັນທົ່ວແຂວງໄຊຍະບູລີ ມີຈໍານວນໂຮງງານ ແລະ ກິດຈະການດ້ານອຸດສາຫະກໍາທັງໝົດ 2.186 ແຫ່ງ ໃນນີ້ໂຮງງານຂະໜາດໃຫຍ່ມີ 52 ແຫ່ງ, ຂະໜາດກາງ 56 ແຫ່ງ ແລະ ຂະໜາດນ້ອຍ 2.078 ແຫ່ງ; ທຽບໃສ່ປີ 2015 ມີການຂະຫຍາຍຕົວເພີ່ມຂຶ້ນ 13,38%, ສ້າງວຽກເຮັດງານທໍາໃຫ້ສັງຄົມໃນຂົງເຂດອຸດສາຫະກໍາທັງໝົດ 9.000 ກວ່າຄົນ, ທຽບໃສ່ປີ 2015 ເພີ່ມຂຶ້ນ 3,2% ມູນຄ່າການຜະລິດດ້ານອຸດສາຫະກໍາ ແລະ ຫັດຖະກໍາ ບັນລຸ 842 ຕື້ກວ່າກີບ, ທຽບໃສ່ 5 ປີຜ່ານມາເພີ່ມຂຶ້ນ 38,95% ສິ່ງທີ່ສໍາຄັນ ແລະ ພົ້ນເດັ່ນນັ້ນໄດ້ເກີດມີບັນດາຫົວໜ່ວຍການຜະລິດດ້ານອຸດສາຫະກໍາ ທີ່ສໍາຄັນຈໍານວນໜຶ່ງ ທີ່ເກີດຂຶ້ນ ເຊັ່ນ: ໂຮງງານສີ ແລະ ອົບແຫ້ງສາລີ, ໝາກເດືອຍ, ໂຮງງານປຸງແຕ່ງຊາໝ້ຽງ, ໂຮງງານຜະລິດດິນຈີ່ທັນສະໄໝ, ໂຮງງານປຸງແຕ່ງສ່ວນປະສົມຊີມັງ (ໂຮງງານຂີ່ເຖົ່າລອຍ) ແລະ ໂຮງງານຜະລິດປຸຍຊີວະພາບ ທັງໝົດນີ້ ແມ່ນເພື່ອສະໜອງຄວາມຕ້ອງການແກ່ຜູ້ຊົມໃຊ້ພາຍໃນ ແລະ ສົ່ງອອກຕ່າງປະເທດ ທັງເປັນການຫຼຸດຜ່ອນການນໍາເຂົ້າຈາກຕ່າງປະເທດ ຊຶ່ງເຫັນວ່າ: ໃນ 5 ປີຜ່ານມາມູນຄ່າສົ່ງອອກສິນຄ້າໄປຕ່າງປະເທດມີທັງໝົດ 136,5 ລ້ານກວ່າໂດລາ, ທຽບໃສ່ແຜນການ 5 ປີປະຕິບັດໄດ້ 29,95%, ສິນຄ້າທີ່ສົ່ງອອກຫຼາຍກວ່າໝູ່ ແມ່ນພືດ ກະສິກໍາ ມູນຄ່າ 111,6 ລ້ານໂດລາ, ເຄື່ອງປ່າຂອງດົງມູນຄ່າ 4,7 ລ້ານໂດລາ. ສ່ວນການນໍາເຂົ້າສິນຄ້າຈາກຕ່າງປະເທດມີທັງໝົດ 64,238 ລ້ານໂດລາ, ທຽບໃສ່ແຜນການ 5 ປີປະຕິບັດໄດ້ 22,7% ໃນນີ້ສິນຄ້ານໍາເຂົ້າຫຼາຍກວ່າໝູ່ ແມ່ນອຸປະກອນໄຟຟ້າ ແລະ ເຄື່ອງກໍ່ສ້າງ ມູນຄ່າ 14,8 ລ້ານໂດລາ, ພາຫະນະແນວພັນ ແລະ ເຄື່ອງຮັບໃຊ້ການຜະລິດ ມູນຄ່າ 7 ລ້ານໂດລາ, ດ້ານມູນຄ່າການນໍາເຂົ້າເຄື່ອງຈັກ, ອຸປະກອນ ແລະ ວັດສະດຸກໍ່ສ້າງ ເພື່ອມາຮັບໃຊ້ກໍ່ສ້າງພື້ນຖານໂຄງລ່າງ ຂອງແຂວງມີມູນຄ່າ 404,88 ລ້ານໂດລາ. ພ້ອມນີ້ຍັງໄດ້ອໍານວຍຄວາມສະດວກ ໃຫ້ຜູ້ປະກອບການທຸລະກິດຕ່າງໆ ເຂົ້າເຖິງການບໍລິການງ່າຍຂຶ້ນ; ໂດຍແບ່ງຂັ້ນຄຸ້ມຄອງໃຫ້ເມືອງຮັບຜິດຊອບໃນການອອກອະນຸຍາດ, ການຂຶ້ນທະບຽນວິສາຫະກິດທີ່ມີມູນຄ່າຕໍ່າກວ່າ 500 ລ້ານກີບລົງມາ. ປັດຈຸບັນທົ່ວແຂວງມີຫົວໜ່ວຍທຸລະກິດທັງໝົດ 9.466 ຫົວໜ່ວຍ, ມີທຶນຈົດທະບຽນທັງໝົດ 3.417 ຕື້ກີບ ແລະ ທົ່ວແຂວງມີຜະລິດຕະພັນທີ່ໄດ້ຮັບກາໝາຍ ພ້ອມປະກາດເປັນໂອດ໋ອບແຫ່ງຊາດທັງໝົດ 10 ຜະລິດຕະພັນ. ທ່ານຍັງໃຫ້ຮູ້ຕື່ມວ່າ: ແຕ່ນີ້ຫາປີ 2025 ຕ້ອງໄດ້ສືບຕໍ່ຜັນຂະຫຍາຍແຜນຍຸດທະສາດວຽກງານອຸດສາຫະກໍາ ແລະ ການຄ້າ 5 ປີ ຕິດພັນກັບການປະຕິບັດແຜນພັດທະນາເສດຖະກິດ-ສັງຄົມ 5 ປີ ຂອງແຂວງ, ຊຸກຍູ້ການຈັດຕັ້ງປະຕິບັດມູນຄ່າການສົ່ງອອກສິນຄ້າໃຫ້ໄດ້ 263,2 ລ້ານໂດລາ ແລະ ນໍາເຂົ້າສິນຄ້າບໍ່ໃຫ້ເກີນ 105,5 ລ້ານໂດລາ, ຕັ້ງໜ້າຄຸ້ມຄອງກວດກາບັນດາໂຮງງານ ແລະ ກິດຈະການດ້ານອຸດສາຫະກໍາ ແລະ ຫັດຖະກໍາພາຍໃນແຂວງໃຫ້ເຂັ້ມງວດຕໍ່ເນື່ອງ ເພື່ອເຮັດໃຫ້ການດໍາເນີນກິດຈະການຖືກຕ້ອງຕາມລະບຽບກົດໝາຍ ໂດຍສະເພາະການຄຸ້ມຄອງກວດກາໂຮງງານປຸງແຕ່ງໄມ້, ການສົ່ງອອກຜະລິດຕະພັນໄມ້ ເພື່ອໃຫ້ສອດຄ່ອງກັບກົດໝາຍ ຂອງລັດຖະບານ ແລະ ມາດຕະການທີ່ກະຊວງອຸດສາຫະກໍາ ແລະ ການຄ້າວາງອອກ, ຊຸກຍູ້ສ້າງເງື່ອນໄຂດຶງດູດນັກລົງທຶນທັງພາຍໃນ ແລະ ຕ່າງປະເທດ ໃຫ້ລົງທຶນເຂົ້າໃສ່ຂະແໜງການອື່ນໆ ໃຫ້ນັບມື້ນັບຫຼາຍ ເພື່ອສົ່ງເສີມການຜະລິດພາຍໃນ ແລະ ຫຼຸດຜ່ອນການນໍາເຂົ້າສິນຄ້າທີ່ບໍ່ຈໍາເປັນຈາກຕ່າງປະເທດ, ສູ້ຊົນເຮັດໃຫ້ຍອດຂາຍ ມູນຄ່າການຜະລິດດ້ານອຸດສາຫະກໍາ ແລະ ຫັດຖະກໍາ ບັນລຸ 1.210 ຕື້ກວ່າກີບ.

ໂດຍ: ບຸນທີ