ໜັງສືພິມ ປະຊາຊົນ

ກາເຟສົດ ທ່າແຕງ ປະກາດເປັນສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 06/07/2020 09:43:39 ຈຳນວນຢ້ຽມຊົມ 411 ຄັ້ງ

ກຸ່ມຜະລິດ ແລະ ປຸງແຕ່ງ ກາເຟສົດ ບ້ານຫ້ວຍຊາຍ ເມືອງທ່າແຕງ ແຂວງເຊກອງ ໄດ້ກາຍເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດໂອດ໋ອບ (ODOP) ແລະ ໄດ້ຈັດພິທີປະກາດສິນຄ້າດັ່ງກ່າວໃນທ້າຍເດືອນມິຖຸນາ 2020 ນີ້ ທີ່ສະໂມສອນຂອງເມືອງ ໂດຍມີ ທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງ, ທ່ານ ເຫຼັກໄຫຼ ສີວິໄລ ຮອງເຈົ້າ ແຂວງເຊກອງ, ມີຫົວໜ້າພະ ແນກອຸດສາຫະກຳ ແລະ ການຄ້າແຂວງ, ຂະແໜງການກ່ຽວ ຂ້ອງຂັ້ນແຂວງ ແລະ ຂັ້ນເມືອງ ຕະຫຼອດຮອດກຸ່ມຜະລິດເຂົ້າຮ່ວມ.
ທ່ານ ຈັນເພັງ ກຸນລະວົງ ຫົວໜ້າຂະແໜງສົ່ງເສີມວິສາຫະກິດຂະໜາດນ້ອຍ, ກາງ ແລະ ການຄ້າ ພະແນກອຸດສາຫະກໍາ ແລະ ການຄ້າແຂວງເຊກອງ ໄດ້ຊີ້ແຈງໃຫ້ເຫັນໃນໃບສັນຍາການນຳໃຊ້ກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດໂອດ໋ອບ (ODOP) ລະຫວ່າງ ກົມສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ ຝ່າຍທີ່ເປັນເຈົ້າຂອງກາໝາຍໂອດ໋ອບ (ODOP)ແຫ່ງຊາດ ແລະ ນາງ ໜູ ສະລິດທິລາດ ເຈົ້າຂອງຜະລິດຕະພັນໂຮງງານປຸງແຕ່ງກາເຟສົດບ້ານຫ້ວຍຊາຍ ເມືອງ ທ່າແຕງ ເອີ້ນວ່າຝ່າຍເປັນຜູ້ທີ່ໃຊ້ກາໝາຍໂອດ໋ອບ (ODOP)ແຫ່ງຊາດ. ທັງສອງຝ່າຍໄດ້ຕົກລົງເຊັນສັນຍາສະບັບນີ້ໂດຍແຕ່ລະຝ່າຍມີພັນທະລະອຽດຈະແຈ້ງເພື່ອເປັນບ່ອນອີງໃຫ້ທັງສອງຝ່າຍໃນການນຳໃຊ້ກາໝາຍໂອດ໋ອບ (ODOP) ແຫ່ງຊາດ, ກວດກາການນຳໃຊ້ກາໝາຍ ເພື່ອໃຫ້ສອດຄ່ອງຕາມມາດຕະຖານ, ເງື່ອນໄຂ ແລະ ລະບຽບການນຳໃຊ້ກາໝາຍໂອດ໋ອບແຫ່ງຊາດທີ່ວາງໄວ້. ແນໃສ່ການຮັບຮອງເອົາກາເຟສົດທ່າແຕງ ຂອງກຸ່ມຜະລິດ ແລະ ປຸງແຕ່ງກາເຟສົດ ບ້ານ ຫ້ວຍຊາຍ ເປັນສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດໂອດ໋ອບ (ODOP) ຂອງເມືອງທ່າແຕງຄັ້ງນີ້. ທັງເປັນການຊຸກຍູ້ສົ່ງເສີມຫົວໜ່ວຍທຸລະກິດຂະໜາດນ້ອຍໃຫ້ມີຄວາມເຂັ້ມແຂງ ໂດຍສະເພາະແມ່ນການຜະລິດສິນຄ້າໂດຍການແປຮູບຜະລິດຕະພັນກະສິກໍາມາເປັນຜະລິດຕະພັນອຸດສາຫະກຳປຸງແຕ່ງຂະໜາດນ້ອຍ, ສາມາດສ້າງມູນຄ່າເພີ່ມໃຫ້ໄດ້ລາຄາສູງ, ມີຕະຫຼາດຮອງຮັບທີ່ຍືນຍົງ, ເປັນຜະລິດຕະພັນໃນແບບໃໝ່ຂອງເມືອງ. ນອກນີ້ ຍັງໄດ້ສ້າງອາຊີບວຽກເຮັດງານທຳ ແນໃສ່ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ. ກາເຟສົດທ່າແຕງ ເປັນກາເຟທີ່ປູກແບບທຳມະຊາດ, ປອດສານພິດ ມາແປຮູບເປັນຜະລິດຕະພັນສິນຄ້າທີ່ເນັ້ນຄຸນນະພາບ ແລະ ຄວາມສະອາດປອດໄພ, ມີສັບພະຄຸນດີຕໍ່ຮາງກາຍ,ການຫຸ້ມຫໍ່ ສາມາດຮັກສາໄວ້ໄລຍະຍາວ. ປັດຈຸບັນ ກາເຟສົດທ່າແຕງ ໄດ້ວາງຂາຍຢູ່ພາຍໃນໂຮງງານປຸງແຕ່ງກາເຟສົດ ແລະ ໃນຕໍ່ໜ້າຈະສືບຕໍ່ຊອກຫາຕະຫຼາດພາຍໃນເມືອງອ້ອມຂ້າງ ແລະ ຕ່າງແຂວງເພື່ອຈໍາໜ່າຍ.
ໂອກາດນີ້ ທ່ານ ເຫຼັກໄຫຼ ສີວິໄລ ໃຫ້ກຽດມອບໃບນໍາໃຊ້ກາໝາຍໜຶ່ງເມືອງ ໜຶ່ງຜະລິດຕະພັນ ໃຫ້ທ່ານນາງ ໜູ ສະລິດທິລາດ ເຈົ້າຂອງຜະລິດຕະພັນໂຮງງານປຸງແຕ່ງກາເຟສົດບ້ານ ຫ້ວຍຊາຍ ເມືອງທ່າແຕງ ແຂວງເຊກອງ ຕາມໃບອະນຸຍາດຂອງກົມສົ່ງເສີມການຄ້າກະຊວງອຸດສາຫະກໍາ ແລະ ການຄ້າ ໂດຍຊ້ອງໜ້າທ່ານ ສຸພົນ ໄຊສະຫງ່າ ພ້ອມພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
(ຂ່າວ: ພອນ ບຸນອຸທິດ)