ຊາວກະສິກອນເມືອງສາລະວັນ ປັກດຳເຂົ້ານາປີບໍ່ໄດ້ຕາມແຜນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 16/07/2020 09:22:18 ຈຳ​ນວນ​​ຢ້ຽມ​ຊົມ 2369 ຄັ້ງ

   ຍ້ອນ​ສະພາບ​ຟ້າ​ຝົນ​ບໍ່​ເອື້ອ​ອຳນວຍ, ຝົນ​ບໍ່​ຕົກ​ຕາມ​ລະດູ​ການ ອັນ​ເຮັດ​ໃຫ້​ເກີດ​ໄພ​ແຫ້ງແລ້ງ ທີ່​ສົ່ງ​ຜົນ​ສະ​ທ້ອນ​ຕໍ່​ກັບ​ຊາວ​ກະສິກອນ ຊຶ່ງ​ເຮັດ​ໃຫ້ການ​ປັກ​ດຳ​ເຂົ້ານາ​ປີ ປີ​ນີ້​ຊັກ​ຊ້າ ບໍ່​ທ່ວງ​ທັນ​ຕາມ​ລະດູ​ການ, ບາງ​ທ້ອງ​ຖິ່ນ​ທີ່​ມີ​ເງື່ອນໄຂ​ນອນ​ຢູ່​ຂອບ​ເຂດ​ຊົນ​ລະ​ປະທານ ກໍ​ສາມາດ​ປັກ​ດຳ​ໄດ້​ແລ້ວ​ຈຳນວນ​ໜຶ່ງ. ມາ​ຮອດ​ປັດຈຸບັນ​ນີ້ ທົ່ວ​ເມືອງ​ສາລະ​ວັນ ແຂວງ​ສາລະ​ວັນ ປັກ​ດຳ​ເຂົ້ານາ​ປີ ໄດ້ 54%, ຕົກກ້າ​ເກືອບ​ສຳເລັດ 100%.
    ທ່ານ ພັດ​ສະຫວັນ ໄຊ​ຍະ​ວົງ ຫົວໜ້າ​ຫ້ອງການ​ກະ​ສິ​ກຳ​-​ປ່າໄມ້​ເມືອງ​ສາລະ​ວັນ ໃຫ້​ສໍາ​ພາດ​ຕໍ່​ສື່​ມວນ​ຊົນ​ແຂວງ ໃນ​ວັນ​ທີ 14 ກໍລະກົດ​ນີ້ ໃຫ້​ຮູ້​ວ່າ: ແຜນ​ສູ້​ຊົນ​ການ​ຜະລິດ​ເຂົ້ານາ​ປີ ທົ່ວ​ເມືອງ ປີ​ນີ້ ແມ່ນ​ມີ​ເນື້ອທີ່​ທັງ​ໝົດ 25.600 ເຮັກຕາ ຊຶ່ງ​ປັດຈຸບັນ ສຳເລັດ​ການ​ຕົກກ້າ​ແລ້ວ​ເກືອບ 100%, ໄຖ​ຮຸດ 83% ແລະ​ການ​ປັກ​ດໍາ​ເຂ້ົາ​ນາປີ​ໄດ້ 53% ຂອງ​ເນື້ອທີ່​ແຜນການ​ທັງ​ໝົດ  ຊຶ່ງ​ໃນ​ບາງ​ທ້ອງຖິ່ນ​ເຖີງ​ວ່າ: ຈະ​ຕົກກ້າ​ແລ້ວ​ກໍ່​ຕາມ ແຕ່​ຍ້ອນ​ສະພາບ​ຄວາມ​ແຫ້ງແລ້ງ ເຮັດ​ໃຫ້​ຕົ້ນ​ກ້າ ເສຍ​ຫາຍ ຍ້ອນ​ຂາດ​ນ້ຳ ແລະ​ບໍ່​ນອນ​ໃນ​ເຂດ​ຊົນ​ລະ​ປະ​ທານ. ສຳລັບ​ບ້ານ ທີ່​ນອນ​ໃນ​ເຂດ​ຊົນລະປະທານ ແມ່ນ​ມີ 54 ບ້ານ, ຈຳນວນ 33 ໂຄງການ  ​ໄດ້​ມີ​ການ​ອະນາໄມ​ຄອງເໝືອງ ເພື່ອ​ນໍາ​ໃຊ້​ນໍ້າ​ດັ່ງກ່າວ​ເຂົ້າ​ໃນ​ການ​ຜະ​ລິດ. ສຳລັບ​ເຂດ​ທີ່​ມີ​ຄວາມ​ແຫ້ງແລ້ງ, ຂະແໜງການ​ທີ່​ກ່ຽວຂ້ອງ ກໍໄດ້​ແຕ່ງຕັ້ງ​ຄະນະ​ທີ​ມ​ງານ​ຕ້ານ​ແລ້ງ​ຕ້ານ​​ຖ້ວມ​ຂອງ​ເມືອງ ລົງ​ໄປ​ເກັບ​ກຳ​ຂໍ້​ມູນ​ໃນ​ແຕ່​ລະ​ບ້ານ ເປັນຕົ້ນ: ໃນ​ບ້ານ​ໜຶ່ງ ມີ​ຈັກ​ຄອບຄົວ ປັກ​ດຳ​ແລ້ວ​ຈັກ​ຄອບຄົວ ໃຫ້​ເອົາ​ໂຕ​ເລກ​ທີ່​ກຸ່ມ​ສ່ຽງ​ແທ້ໆ​ທີ່​ແຫ້ງແລ້ງ 100% ບໍ່​ສາມາດ​ຜະລິດ​ເຂົ້າ​ໄດ້ ມາ​ວາງ​ແຜນ​ໃນ​ການ​ຕ້ານ​ແລ້ງ​ຕ້ານ​ຖ້ວມ ໂດຍ​ການ​ຫັນ​ຜູ້ກ່ຽວ​ໄປ​ປູກ​ພືດ​ອາຍຸ​ສັ້ນ, ລ້ຽງສັດ​ປິກ, ເພື່ອ​ທົດ​ແທນ ເຂົ້າ​ທີ່​ບໍ່​ໄດ້​ຜະລິດ​ຕາມ​ລະດູ​ການ. 
    ຄຽງ​ຄູ່​ກັນ​ນັ້ນ, ການ​ປູກ​ພຶ​ດ​ຜັກ​ກິນ​ໃບ ໃນ​ທົ່ວ​ເມືອງ​ສາລະ​ວັນ ມີ​ເນື້ອທີ່ 8 ພັນ​ກວ່າ​ເຮັກຕາ ປູກ​ສຳເລັດ 100% ຕາມ​ການ​ລາຍ​ງານ​ຂອງ​ໜ່ວຍ​ງານ ມາ​ຮອດ​ປັດຈຸ​ບັນ​ການ​ເກັບ​ກ່ຽວ​ຜົນ​ຜະລິດ ປະເພດ​ພຶດ​ກິນ​ໝາກ ຄື: ໝາກແຕງ​ຈິງ, ໝາກສາລີ​ຫວານ  ແລະ​ ພືດ​ຜັກ​ຕ່າງໆ ແມ່ນ​ກຳລັງ​ເປັນ​ຂະບວນ​ຟົດຟື້ນ​ໃນ​ການ​ຊື້​ຂາຍ ຕາມ​ທ້ອງ​ຕະ​ຫຼາດ.  (ພາບ​-​ຂ່າວ: ທິດ​ລາ​ນີ ໂຄດ​ໂຍທາ)
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110