ເມືອງໄຊຍະບູລີ ປ່ອຍປາຄືນສູ່ທຳມະຊາດ 7 ລ້ານກວ່າໂຕ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 16/07/2020 09:26:31 ຈຳ​ນວນ​​ຢ້ຽມ​ຊົມ 2354 ຄັ້ງ

   ເມືອງ​ໄຊ​ຍະ​ບູ​ລີ ແຂວງ​ໄຊ​ຍະ​ບູ​ລີ ໄດ້​ຈັດ​ພິທີ​ປ່ອຍປາ​ ຄືນ​ສູ່​ທໍາ​ມະ​ຊາດ ເນື່ອງ​ໃນໂອ ກາດ​ວັນ​ປ່ອຍ​ປາ ແລະ ອະນຸ​ລັກ​ສັດ​ນໍ້າ-​ສັດປ່າ ແຫ່ງ​ຊາດ ໄດ້​ໝູນ​ວຽນມາ​ບັນຈົບ​ຄົບຮອບ​ອີກ​ວາ ລະ​ໜຶ່ງ ໃນ​ວັນ​ທີ 13 ກໍລະກົດ ຜ່ານ​ມານີ້ ​​ທີ່ບ້ານ​ປົ່ງ ເມືອງ​ໄຊ​ຍະ​ບູ​ລີ. ເຂົ້າ​ຮ່ວມ​ປ່ອຍ​ປາ​ລົງ​ສູ່​ວັງ​ບວດ​ບ້ານ​ປົ່ງ​ໃນ​ຄັ້ງນີ້​ມີ ທ່ານ ຍັນ​ຍົງ ສີ​ປະເສີດ ຮອງ​ເຈົ້າແຂວງ​ໄຊ​ຍະ​ບູ​ລີ, ມີ​ການ​ນໍາ​ຂອງ​ແຂວງ, ຂອງ​ເມືອງ, ອົງການ, ກົມ​ກອງ, ນັກທຸລະກິດ​ຜູ້​ປະກອບ​ການ, ນັກຮຽນ​ນັກ​ສຶກສາ, ອົງການ​ປົກຄອງ​ບ້ານ​ຕະຫຼອດ​ຮອດພໍ່​ ແມ່​ປະຊາຊົນ​ພາຍ​ໃນ​ເທດສະ ບານ​ເມືອງ​ໄຊ​ຍະ​ບູ​ລີ​ເຂົ້າ​ຮ່ວມ.
   ໃນ​ພິທີ ທ່ານ ບຸນ​ແທນ ທິ​ແກ້ວ ເຈົ້າເມືອງ​ໄຊ​ຍະ​ບູ​ລີ ໄດ້​ຍົກ​ໃຫ້​ເຫັນ​ວ່າ​ໃນ​ໄລຍະ​ຜ່ານ​ມາ​ການ​ນໍາ​ຂອງ​ແຂວງ ຂອງ​ເມືອງ​ໄດ້​ເປັນ​ເຈົ້າ​ການ​ຈັດ​ກິດ​ຈະ​ກໍາ​ປ່ອຍ​ປາ​ລົງ​ສູ່​ອ່າງ​ເກັບ​ນໍ້າ, ໜອງ​ນໍ້າ ແລະ ສາຍ​ນໍ້າທໍາ​ມະ​ຊາດ ພ້ອມ​ທັງ​ແຕ່ງຕັ້ງ​ຄະ​ນະ​ກໍາ​ມະ​ການ​ຄຸ້ມ​ຄອງ​ການ​ປະມົງ​ປະ​ຈໍາ​ພື້ນ​ທີ່ກໍາ​ນົດ​ເຂດ​ວັງສະ​ຫງວນ​ທັງ​ໝົດ 6 ຈຸດ ເພື່ອ​ເປັນ​ການ​ປູກ​ຈິດ​ສໍາ​ນຶກ​ໃຫ້​ທົ່ວ​ປວງ​ຊົນ ຄົນ​ຮຸ່ນ​ຫຼັງ​ໃຫ້​ຮູ້ຈັກ​ລະບົບ​ນິເວດ​ຊີວະ​ນາໆ​ພັນ​ໄປ​ຄວບ​ຄູ່​ກັບ​ການ​ອອກ​ລະບຽບ​ຄຸ້ມ​ຄອງ, ວາງ​ມາດ​ຕະການ​ຫ້າມ​ລ່າ​ສັດປ່າ, ຫາ​ປາ​ໃນ​ລະດູ​ວາງ​ໄຂ່ ຂະຫຍາຍ​ພັນ​ຂອງ​ສັດ​ນໍ້າ-​ສັດປ່າ, ສະກັດ​ກັ້ນ​ການ​ຄ້າຂາຍ​ສັດ​ນໍ້າ ແລະ ສັດປ່າ ປະເພດ​ຫວງ​ຫ້າມ ແລະ ອື່ນໆ ອັນ​ໄດ້​ປະກອບສ່ວນ​ເຂົ້າ​ໃນ​ການ​ອະ​ນຸ​ລັກ​ປົກ​ປັກ​ຮັກສາ​ສັດ​ນໍ້າ-​ສັດປ່າ​ໃຫ້​ອຸດົມສົມບູນ ແລະ ຍືນ​ຍົງ. ສໍາ​ລັບ​ປີ​ນີ້​ເມືອງ​ໄຊ​ຍະ​ບູ​ລີ ມີ​ແຜນ​ຈະ​ປ່ອຍ​ປາ​ທັງ​ໝົດ 7.900.000 ໂຕ ມີ​ປາປາກ, ປາໄນ, ປາ​ນິນ; ໃນ​ນີ້​ແຜນ​ປ່ອຍ​ລວມ​ໝູ່​ມີ 13 ຈຸດ, ມີ​ປາ​ທັງ​ໝົດ 230.000 ໂຕ ໃນ​ນັ້ນ​ປ່ອຍ​ອ່າງ​ຫ້ວຍ​ແຄ່ນ 40.000 ໂຕ, ວັງ​ບວດ​ບ້ານ​ໃຫຍ່ 10.000 ໂຕ, ວັງ​ບວດ​ບ້ານ​ນາ​ໄຮ 10.000 ໂຕ, ວັງ​ບວດ​ບ້ານ​ນາ​ຕໍ​ນ້ອຍ 10.000 ໂຕ, ວັງ​ບວດ​ບ້ານ​ວັງ​ຊອຍ 10.000 ໂຕ, ອ່າງ​ນໍ້າ​ຕຽນ 40.000 ໂຕ, ບ້ານ​ປາກ​ທັງ 2.000 ໂຕ, ກອງພັນ 609 ຈໍາ​ນວນ 20.000 ໂຕ, ຄຸມ​ຂັງ​ເມືອງ 2.000 ໂຕ, ມສ ຊົນເຜົ່າ 2.000 ໂຕ, ກອງພັນ 202 ຈໍາ​ນວນ 2.000 ໂຕ ແລະ ມື້​ຈັດ​ພິທີ​ໄດ້​ປ່ອຍ​ລວມ​ໝູ່ ແລະ ປ່ອຍ​ສ່ວນ​ບຸກຄົນ, ຄອບຄົວ ແລະ ທຸລະ​ກິດ, ປ່ອຍ​ລ້ຽງ​ໃນ​ໜອງ​ດິນ ແລະ ໃນ​ກະຊັງ ຈໍາ​ນວນ 7.800.000 ໂຕ ໃນ​ນັ້ນ​ປ່ອຍ​ລົງ​ໃນ​ໜອງ​ດິນ​ຈໍາ​ນວນ 6.800.000 ໂຕ ແລະ ປ່ອຍ​ລ້ຽງ​ໃນ​ກະຊັງ 880.000 ໂຕ. ທ່ານ​ຍັງ​ກ່າວ​ຕື່ມ​ວ່າ ເພື່ອ​ເຮັດ​ໃຫ້​ກິດ​ຈະ​ກໍາ​ປ່ອຍ​ປາ​ປີ​ນີ້​ໄດ້​ຮັບ​ຜົນ​ດີ ຄະນະ​ພັກ​ທຸກ​ຂັ້ນ, ພະນັກງານ, ທະຫານ, ຕໍາ​ຫຼວດ, ນັກຮຽນ, ນັກ​ສຶກສາ, ພໍ່ ຄ້າ​ຊາວ​ຂາຍ, ນັກທຸລະກິດ​ຜູ້​ປະກອບ​ການ ຕະຫຼອດ​ຮອດ​ພໍ່​ແມ່​ປະຊາຊົນ​ບັນດາເຜົ່າ​ໃນ​ທົ່ວ​ເມືອງ​ໄຊ​ຍະ​ບູ​ລີ ຈົ່ງ​ຮ່ວມ​ແຮງ​ຮ່ວມ​ໃຈ​ກັນ​ປ່ອຍ​ປາ​ລົງ​ສູ່​ໜອງ​ນໍ້າ ແລະ ແຫຼ່ງ​ນໍ້າທໍາ​ມະ​ຊາດ ເພື່ອ​ຄືນ​ຄວາມ​ອຸດົມສົມບູນ​ໃຫ້​ກັບ​ທໍາ​ມະ​ຊາດ ແລະ ພ້ອມ​ກັນ​ອະ​ນຸ​ລັກ​ປົກ​ປັກ​ຮັກສາ​ສັດ​ນໍ້າ-​ສັດປ່າ ເຮັດ​ໃຫ້​ຊັບພະຍາກອນ​ອັນ​ລໍ້າ​ຄ່າ​ດັ່ງກ່າວ​ຢູ່​ຄຽງ​ຄູ່​ກັບ​ພວກ​ເຮົາ​ຕະຫຼອດ​ໄປ. ຈາກ​ນັ້ນ ທ່ານ ຍັນ​ຍົງ ສີ​ປະເສີດ ພ້ອມ​ດ້ວຍ​ການ​ນໍາ​ຂອງ​ແຂວງ ຂອງ​ເມືອງ ໄດ້​ຮ່ວມ​ກັນ​ຕັດ​ແຖບ​ຜ້າ ແລະ ປ່ອຍ​ປາ​ຄືນ​ສູ່​ທໍາ​ມະ​ຊາດ.       (ຂ່າວ: ບຸນ​ທີ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110