ກອງປະຊຸມລະດົມທຶນສຳຫຼວດສະຖິຕິ ກະສິກຳ ແລະ ເສດຖະກິດ ຄັ້ງທີ III

ເຜີຍ​ແຜ່​ໂດຍ​: admin ເວ​ລາ: 15/12/2019 11:25:56 ຈຳ​ນວນ​​ຢ້ຽມ​ຊົມ 151 ຄັ້ງ

15.12.2019 11:23      ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມລະດົມທຶນ ສໍາລັບການສໍາຫຼວດສະຖິຕິກະສິກໍາ ແລະການສຳຫຼວດເສດຖະກິດທົ່ວປະເທດ ຄັ້ງທີ III ປີ 2019 ຂຶ້ນໃນວັນທີ 5 ທັນວາຜ່ານມາ ທີ່ສະໂມສອນກະຊວງກະສິກໍາແລະ ປ່າໄມ້ ພາຍໃຕ້ການເປັນ ປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ຫົວໜ້າຄະນະຊີ້ນຳລະດັບຊາດສຳຫຼວດສະຖິຕິກະສິກຳ ແລະສຳຫຼວດເສດຖະກິດທົ່ວປະ ເທດຄັ້ງທີ 3 ທ່ານ ສົມດີ ດວງດີ ກ່າວວ່າ: ການສໍາຫຼວດກະສິກໍາ ແລະ ເສດຖະກິດຄັ້ງນີ້, ເພື່ອຮັບໃຊ້ການຕີລາຄາຜົນສໍາເລັດ ການຈັດຕັ້ງແຜນ 8 ແລະ ສ້າງແຜນພັດທະນາເສດຖະກິດ-ສັງຄົມ ຄັ້ງທີ 9, 2021-2025 ໂດຍສະເພາະແມ່ນການຕີລາຄາຄວາມພະຍາຍາມໃນການສ້າງຄວາມສົມດຸນການຜະລິດ ແລະ ໂພຊະນາການ ແລະ ສືບຕໍ່ສ້າງຄວາມດຸ່ນ ດ່ຽງ ການພັດທະນາທາງດ້ານການ ຄ້າ ແລະ ການຄໍ້າປະກັນສະ ບຽງອາຫານ ໂດຍການສະໜັບ ສະໜູນຊາວກະສິກອນ ແລະ ການຜະລິດ ເພື່ອບັນລຸເປົ້າໝາຍ ຄວາມຕ້ອງການທາງດ້ານໂພຊະນາການ. ລັດຖະບານລາວ ແມ່ນເຫັນຄວາມສໍາຄັນຕໍ່ວຽກງານສະຖິຕິ,ການສະໜອງຂໍ້ມູນ,ຖືກຕ້ອງເປັນຈິງທີ່ສຸດແລະ ທັນເວລາ ແມ່ນຊ່ວຍໃຫ້ທຸກຄົນ ໃນການຕັດສິນບັນຫາຢ່າງຖືກຕ້ອງ ແລະ ກ້າວໄປສູ່ການດໍາລົງຊີວິດທີ່ີດີກວ່າ, ເວົ້າສະເພາະ ສອງການສໍາຫຼວດໃຫຍ່ລະດັບຊາດນີ້ ແມ່ນເພື່ອສາມາດຕອບສະໜອງເຂົ້າໃນການຕິດຕາມປະເມີນ ແລະ ສ້າງແຜນພັດທະນາເສດຖະກິດ-ສັງຄົມ ແຫ່ງຊາດ ແລະແຜນງານຕ່າງໆທີ່ກ່ຽວຂ້ອງ ໃນລະດັບຂະແໜງການ ແລະ ທ້ອງຖິ່ນ. ການສໍາຫຼວດຄັ້ງນີ້ ຈະໃຊ້ ເຄື່ອງມືທີ່ທັນສະໄໝເຂົ້າໃນການສໍາຫຼວດ ເພື່ອໃຫ້ສາມາດເຫັນໄດ້ຂໍ້ມູນທີ່ຖືກຕ້ອງ, ຊັດເຈນ ຊຶ່ງນອກຈາກຈະໃຫ້ຂໍ້ມູນກ່ຽວກັບຖານການຜະລິດແລ້ວ ຍັງຕ້ອງໃຫ້ຮູ້ໄດ້ສະພາບຜົນກະທົບຂອງໄພພິບັດ ແລະ ໃຫ້ຮູ້ເຖິງຜົນກະທົບຕໍ່ປະຊາຊົນທີ່ທຸກຍາກ ແລະ ລວມໄປເຖິງບົດບາດ ຍິງ-ຊາຍ ໃນຂົງເຂດກະສິກໍາ. ໃນວັນທີ 6 ທັນວາຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ ສູນສະ ຖິຕິ ກໍໄດ້ຈັດກອງປະຊຸມປະ ກາດຜົນການຄາດຄະເນພົນລະເມືອງ ລະດັບ ເມືອງ ປີ 2015-2035, ການວິໄຈພົນ ລະເມືອງໜຸ່ມ ໃນສປປ ລາວ ແລະ ແຜ່ນພັບ ການເກີດ-ການຕາຍ ຈາກການນໍາໃຊ້ຂໍ້ມູນ ຜົນການສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ 4 ປີ 2015. ພາຍໃຕ້ການເປັນປະທານຂອງທ່ານ ສະໄໝຈັນ ບຸບຜາ ຫົວໜ້າສູນສະຖິຕິແຫ່ງຊາດ ກະຊວງແຜນການແລະ ການລົງທຶນ. (ຂ່າວ: ແສງຈັນ, ໜັງ​ສື​ພິມ ປະ​ຊາ​ຊົນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110