ຫົວ​ຂໍ້ : ຈີນ​-​ຣັດ​ເຊຍ ເປີດ​ນຳ​ໃຊ້​ທໍ່​ສົ່ງ​ອາຍ​ແ​ກັສ

ເຜີຍ​ແຜ່​ໂດຍ​: admin ເວ​ລາ: 27/12/2019 13:58:47 ຈຳ​ນວນ​ຜູ້​ເຂົ້າ​ຢ້ຽມ​ຊົມ 263 ຄັ້ງ

ຂ່າວສານ​ຊີ​ອາ​ໄອ​ລາຍ​ງານ​ວ່າ: ວັນ​ທີ 2 ທັນວາ ​ຜ່ານ​ມາ, ຢູ່​ນະຄອນຫຼວງ​ປັກ​ກິ່ງ, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ສົນທະນາ​ຜ່ານ​ທາງ​ວີດີ​ໂອ​ ກັບ ທ່ານ ວະ​ລາ​ດີ​ເມຍ ປູ​ຕິນ ປະທານາທິບໍດີ​ຣັດ​ເຊຍ, ເພື່ອ​ຮ່ວມ​ກັນ​ເປັນ​ສັກຂີ​ພິຍານ​ພິທີ​ເປີດ​ນຳ​ໃຊ້​ທໍ່​ສົ່ງ​ອາຍ​ແກັສ​ທຳ​ມະ​ຊາດ​ສາຍຕາ​ເວັນ​ອອກ​ຈີນ​-​ຣັດ​ເຊຍ.

   ຂ່າວ​ລະບຸ​ວ່າ: ທ່ານ ສີ​ຈິ້ນ​ຜິງ ແລະ ທ່ານ ປູ​ຕິນ ໄດ້​ສົ່ງ​ຄວາມ​ຢື້​ຢາມ​ຖາມ​ຂ່າວ​ຊຶ່ງ​ກັນ ແລະ ກັນ​ຜ່ານ​ທາງ​ວີດີ​ໂອ. ທ່ານ ສີ​ຈິ້ນ​ຜິງ ໄດ້​ສະແດງ​ຄວາມ​ຊົມເຊີຍ​ຢ່າງ​ສຸດ​ໃຈ​ຕໍ່​ການ​ເປີດ​ນຳ​ໃຊ້​ທໍ່​ສົ່ງ​ອາຍ​ແກັ​ສ​ທຳ​ມະ​ຊາດ ແລະ ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ຕໍ່​ບັນດາ​ຜູ້​ກໍ່ສ້າງ​ທັງຫຼາຍ​ຂອງ​ສອງ​ປະ​ເທດ. ທ່ານ ສີ​ຈິ້ນ​ຜິງ ຊີ້​ໃຫ້​ເຫັນ​ວ່າ: ທໍ່​ສົ່ງ​ອາຍ​ແກັ​ສ​ທຳ​ມະ​ຊາດ​ສາຍຕາ​ເວັນ​ອອກ ແມ່ນ​ໂຄງການ​ທີ່​ເປັນ​ຂີດ​ໝາຍ​ຂອງ​ການ​ຮ່ວມ​ມື​ດ້ານ​ພະລັງງານ ລະຫວ່າງ ຈີນ​-​ຣັດ​ເຊຍ, ຍັງ​ແມ່ນ​ແບບຢ່າງ​ແຫ່ງ​ການ​ເຊື່ອມ​ໂຍງ​ເຂົ້າກັນ​ຢ່າງ​ເລິກເຊິ່ງ ແລະ ການ​ຮ່ວມ​ມື​ທີ່​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ ລະຫວ່າງ ສອງ​ຝ່າຍ.

   ທ່ານ ສີ​ຈິ້ນ​ຜິງ ກ່າວ​ເນັ້ນ​ວ່າ: ປີ​ນີ້​ແມ່ນ​ປີ​ທີ່ ຈີນ​-​ຣັດ​ເຊຍ ສ້າງຕັ້ງ​ສາຍ​ພົວພັນ​ທາງ​ການ​ທູດ​ຄົບຮອບ 70 ປີ, ຂ້າພະເຈົ້າ​ກັບ​ທ່ານ ປູ​ຕິນ ໄດ້​ຮ່ວມ​ກັນ​ປະກາດ​ການ​ຂະຫຍາຍ​ສາຍ​ພົວພັນ​ຄູ່​ປະສານ​ງານ​ຍຸດທະສາດ​ຮອບດ້ານ ໃນ​ຍຸກ​ໃໝ່ ຈີນ​-​ຣັດ​ເຊຍ, ໄດ້​ເປັນ​ເອກະ​ພາບ​ກັນ​ຕົກລົງ​ວ່າ: ຈະ​ສືບຕໍ່​ເຮັດ​ໃຫ້​ສາຍ​ພົວພັນ ລະຫວ່າງ ສອງ​ຝ່າຍ​ກາຍເປັນ​ບຸລິມະສິດ​ຂອງ​ສາຍ​ພົວພັນ​ການ​ຕ່າງປະເທດ​ຈີນ​-​ຣັດ​ເຊຍ, ລົງ​ເລິກ​ການ​ປະສານ​ງານ​ຍຸດທະສາດ ແລະ ການ​ຮ່ວມ​ມື​ໃນ​ຂົງເຂດ​ຕ່າງໆ ລະຫວ່າງ ສອງ​ປະເທດ​ຢ່າງ​ໝັ້ນ​ໜຽວ​ບໍ່​ປ່ຽນ​ແປງ.

   ປັດຈຸບັນ, ຈີນ ແລະ ຣັດ​ເຊຍ ລ້ວນ​ແຕ່​ຢູ່​ໃນ​ໄລຍະ​ຂໍກຸນແຈ​ທີ່​ສຳຄັນ​ແຫ່ງ​ການ​ພັດທະນາ​ປະເທດ​ຕົນ, ການ​ພົວພັນ ລະຫວ່າງ ຈີນ​-​ຣັດ​ເຊຍ ໄດ້​ກ້າວ​ເຂົ້າ​ສູ່​ຍຸກ​ໃໝ່. ຫວັງ​ວ່າ​ສອງ​ຝ່າຍ​ຈົ່ງ​ສືບຕໍ່​ສຸມ​ຄວາມ​ພະຍາຍາມ, ສ້າງ​ໂຄງການ​ທີ່​ເປັນ​ສັນຍາ​ລັກ​ຄື​ກັບ​ໂຄງການ​ທໍ່​ສົ່ງ​ອາຍ​ແກັດ​ທຳ​ມະ​ຊາດ​ສາຍຕາ​ເວັນ​ອອກ​ໃຫ້​ຫຼາຍ​ກວ່າ​ເກົ່າ, ເພີ່ມ​ພະລັງ​ແຮງ​ໃຫ້​ແກ່​ການ​ພັດທະນາ​ຂອງ​ສອງ​ປະເທດ ແລະ ສ້າງ​ຄວາມສຸກ​ໃຫ້​ແກ່​ສອງ​ປະເທດ​ກໍ​ຄື​ປະຊາຊົນ​ສອງ​ຊາດ​ໃຫ້​ໄດ້​ດີກ​ວ່າ​ເກົ່າ.

   ຂະນະ​ດຽວ​ກັນ, ທ່ານ ປູ​ຕິນ ກ່າວ​ວ່າ: ເນື່ອງ​ໃນ​ໂອກາດ​ທີ່ ຣັດ​ເຊຍ​-​ຈີນ ຈະ​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ທາງ​ການ​ທູດ​ຄົບຮອບ 70 ປີ, ທໍ່​ສົ່ງ​ອາຍ​ແກັ​ສ​ທຳ​ມະ​ຊາດ​ສາຍຕາ​ເວັນ​ອອກ ຣັດ​ເຊຍ​-​ຈີນ ໄດ້​ເປີດ​ນຳ​ໃຊ້​ນັ້ນ ແມ່ນ​ມີ​ຄວາມ​ໝາຍ​ປະຫວັດສາດ​ທີ່​ສຳຄັນ, ຈະ​ເຮັດ​ໃຫ້ການ​ປະສານ​ງານ​ຍຸດທະສາດ ລະຫວ່າງ ສອງ​ປະເທດ​ກ້າວ​ຂຶ້ນ​ສູ່​ລະດັບ​ໃໝ່.

   ທໍ່​ສົ່ງ​ອາຍ​ແກັ​ສ​ທຳ​ມະ​ຊາດ​ສາຍຕາ​ເວັນ​ອອກ ຈີນ​-​ຣັດ​ເຊຍ ເລີ່ມ​ແຕ່​ຊີ​ເບີ​ຣີ​ຕາເວັນ​ອອກ​ຂອງ​ຣັດ​ເຊຍ, ຜ່ານ​ບ​ລາ​ໂກ​ຟ​ເຊັນ ເຂົ້າ​ສູ່​ເມືອງ​ເຮິ່ຍ​ເຮີ ແຂວງ​ເຮິ່ຍ​ລົງ​ຈ່ຽງ​ຂອງ​ຈີນ. ພາຍ​ໃນ​ດິນແດນ​ຣັດ​ເຊຍ, ທໍ່​ສົ່ງ​ດັ່ງກ່າວ​ຍາວ​ປະມານ 3.000 ກິໂລແມັດ, ພາຍ​ໃນ​ແດນ​ຈີນ, ທໍ່​ສົ່ງ​ທີ່​ສ້າງ​ຂຶ້ນ​ໃໝ່​ຍາວ 3.371 ກິໂລແມັດ ​ແລະ ໄດ້​ນຳ​ໃຊ້​ທໍ່​ສົ່ງ​ທີ່​ມີ​ຢູ່​ແລ້ວ 1.740 ກິໂລ​ແມັດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110