ໜັງສືພິມ ປະຊາຊົນ

ຜູ້ນຳ ສິງກະໂປ ເນັ້ນແກ້ໄຂຄວາມທຸກຍາກຂອງປະຊາຊົນ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 30/07/2020 10:40:26 ຈຳນວນຢ້ຽມຊົມ 481 ຄັ້ງ

ຂ່າວສານຊີອາໄອລາຍງານວ່າ: ວັນທີ 27 ກໍລະກົດຜ່ານມາ, ທ່ານ ລີຊຽນລົງ ນາຍົກລັດຖະມົນຕີສິງກະໂປ ໄດ້ນຳພາຄະນະລັດຖະບານຊຸດໃໝ່ສາບານຕົວເຂົ້າຮັບຕຳແໜ່ງ.
ໃນພິທີດັ່ງກ່າວ, ທ່ານ ລີຊຽນລົງ ກ່າວວ່າ: ທ່ານເອງ ພ້ອມດ້ວຍຄະນະລັດຖະບານ ຊຸດໃໝ່ ຈະສຸມທຸກຄວາມພະ ຍາຍາມຊ່ວຍເຫຼືອແກ້ໄຂຄວາມ ຫຍຸ້ງຍາກໃນຊີວິດການເປັນຢູ່ຂອງປະຊາຊົນ, ພະຍາຍາມຊອກຫາໂອກາດໃໝ່ ເພື່ອໃຫ້ເສດຖະກິດຂອງ ສິງກະໂປ ຟື້ນຄືນໃໝ່ໂດຍໄວ.
ທ່ານ ລີຊຽນລົງ ກ່າວເນັ້ນວ່າ: ສະພາບພະຍາດໂຄວິດ-19 ຈະສືບຕໍ່ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງສິງກະໂປ ແລະ ຈະເປັນສິ່ງທ້າທາຍຕໍ່ກັບຊີວິດການເປັນຢູ່ຂອງປະຊາຊົນ. ວຽກງານຮີບດ່ວນທີ່ສຸດ ໃນປັດຈຸບັນຂອງລັດຖະບານ ກໍຄື ການຮັບປະກັນການປະກອບອາຊີບ, ແຕ່ເພື່ອຮັບປະກັນສຸ ຂະພາບຂອງຊາວຜູ້ອອກແຮງງານ, ບາງຂະແໜງການເປັນ ຕົ້ນຂະແໜງການກໍ່ສ້າງຍັງຕ້ອງການເວລາອີກໄລຍະໜຶ່ງ ຈຶ່ງຈະສາມາດຟື້ນຟູການເຮັດວຽກຢ່າງຮອບດ້ານ.
ທ່ານ ລີຊຽນລົງ ຍັງກ່າວວ່າ: ເພື່ອການພັດທະນາໃນໄລຍະຍາວຂອງສິງກະໂປ, ຕ້ອງພັດທະນາຂົງເຂດໃໝ່, ສ້າງວຽກເຮັດງານທຳໃໝ່ ເພື່ອຊ່ວຍເຫຼືອວິສາຫະກິດ ແລະ ຊາວຜູ້ອອກແຮງງານທີ່ຕົກຢູ່ໃນສະພາບຫຍຸ້ງຍາກຫັນໄປສູ່ຂົງເຂດທີ່ຈະເລີນໃໝ່. ຊາວຜູ້ອອກແຮງງານ ກໍຈະໄດ້ຮັບການຊ່ວຍເຫຼືອ ແລະ ການອົບຮົມຈາກລັດຖະບານ ເພື່ອສາມາດປະກອບອາຊີບໃໝ່ໃຫ້ໄດ້ດີ.