ໜັງສືພິມ ປະຊາຊົນ

WHO ເຕືອນການລຶບລ້າງພະຍາດຕັບອັກເສບຫຍຸ້ງຍາກກວ່າເກົ່າ ຍ້ອນໂຄວິດ-19

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 30/07/2020 10:41:34 ຈຳນວນຢ້ຽມຊົມ 532 ຄັ້ງ

ຂ່າວສານຊີອາໄອລາຍງານວ່າ: ວັນທີ 28 ກໍລະກົດແມ່ນວັນຕັບອັກເສບໂລກ. ທ່ານ ເທໂດຣສ ອາດານອມ ເກເບຣເຢຊຸສ ຜູ້ອຳນວຍການໃຫຍ່ອົງການອະນາໄມໂລກ (WHO) ກ່າວວ່າ: ເຖິງວ່າໂລກ ໄດ້ຮັບຜົນສຳເລັດຢ່າງຫຼວງ ຫຼາຍໃນການລຶບລ້າງພະຍາດຕັບອັກເສບ, ແຕ່ສະພາບການທີ່ພະຍາດໂຄວິດ-19 ແຜ່ລະບາດຢ່າງຮຸນແຮງ ເຮັດໃຫ້ວຽກງານລຶບລ້າງຕັບອັກເສບປະສົບຄວາມຫຍຸ້ງຍາກຫຼາຍກວ່າເກົ່າ.
ໃນກອງປະຊຸມຂ່າວທີ່ຈັດຂຶ້ນໃນວັນທີ 27 ກໍລະກົດຜ່ານມາ, ທ່ານ ເທໂດຣສ ກ່າວວ່າ: ຜົນກະທົບຈາກການແຜ່ລະ ບາດຂອງພະຍາດໂຄວິດ-19 ໜັກໜ່ວງກວ່າ, ການບໍລິການສາທາລະນະສຸກຂັ້ນພື້ນຖານຫຼາຍຢ່າງໄດ້ຂາດສະບັ້ນລົງຍ້ອນເລື່ອງນີ້. ຕົວຢ່າງ: ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ການບໍລິການດ້ານການປ້ອງກັນ, ກວດກາ ແລະ ປິ່ນປົວພະຍາດ ຕັບອັກເສບ ຢູ່ບາງເຂດແຄວ້ນຖືກຢຸດຕິ, ກຳລັງຄົນ ແລະ ເງິນທຶນ ທີ່ມີຈຳກັດຢູ່ແລ້ວ ຈຳເປັນຕ້ອງນຳໄປໃຊ້ໃນການປ້ອງກັນ, ຄວບຄຸມພະຍາດໂຄວິດ-19 ແລະ ຟື້ນຟູເສດຖະກິດ, ໝາຍຄວາມວ່າ: ປະຊາຄົມໂລກ ອາດຈະສູນເສຍໝາກຜົນໃນການລຶບລ້າງພະຍາດຕັບອັກເສບທີ່ຍາດມາໄດ້.
ຂະນະດຽວກັນ, ທ່ານ ນາງ ມາກາເຣັດ ແຮຣິສ ໂຄສົກ WHO ໄດ້ອອກຖະແຫຼງການວ່າ: ລະດູການເບິ່ງຄືຈະບໍ່ມີຜົນກະທົບຫຍັງກັບການແຜ່ລະບາດຂອງໄວຣັດ COVID-19. ເຖິງວ່າບາງປະເທດ ໄດ້ຮັບຜົນກະທົບຮຸນແຮງທີ່ສຸດ ກໍຍັງຢູ່ໃນໄລຍະລະດູການທີ່ແຕກຕ່າງໄປຈາກສະຖານທີ່ອື່ນໆເຊັ່ນ: ລະດູຮ້ອນໃນອາເມຣິກາ ພົບຜູ້ເສຍຊີວິດຍ້ອນໄວຣັດເກືອບ 148.000 ຄົນ ແລະ ຜູ້ປ່ວຍຕິດເຊື້ອສະສົມໃກ້ຈະເຖິງ 4,3 ລ້ານຄົນ ຊຶ່ງເປັນປະເທດທີ່ໄດ້ຮັບຜົນກະ ທົບຢ່າງຮຸນແຮງທີ່ສຸດໃນໂລກ. ຂະນະທີ່ ປະເທດ ບຣາຊິນ ຢູ່ໃນໄລຍະລະດູໜາວເປັນປະເທດທີ່ໄດ້ຮັບຜົນກະທົບຮຸນແຮງທີ່ສຸດເປັນອັນດັບທີ 2 ຂອງໂລກ ໂດຍພົບຜູ້ເສຍຊີວິດ 87.000 ຄົນ. ໂຄສົກຂອງ WHO ໄດ້ຢືນຢັນວ່າ: ໄວຣັດສາມາດຢູ່ໄດ້ທຸກລະດູການຍ້ອນການລະບາດຈາກຄົນສູ່ຄົນ.
ສ່ວນອົງການທ່ອງທ່ຽວໂລກຂອງສະຫະປະຊາຊາດ ໄດ້ອອກຖະແຫຼງການວ່າ: ວິກິດໂຣກ COVID-19 ເຮັດໃຫ້ພາກທຸລະກິດທ່ອງທ່ຽວຂອງທົ່ວໂລກຂາດລາຍໄດ້ໄປເຖິງ 320.000 ລ້ານໂດລາ ໃນລະຫວ່າງເດືອນມັງກອນເຖິງເດືອນພຶດສະພາທີ່ຜ່ານມາ.