ເຈົ້າແຂວງໄຊຍະບູລີ ລົງຊຸກຍູ້ການ ປູກພືດເປັນສິນຄ້າຢູ່ເມືອງແກ່ນທ້າວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 04/08/2020 08:57:42 ຈຳ​ນວນ​​ຢ້ຽມ​ຊົມ 2008 ຄັ້ງ

    ທ່ານ ພົງ​ສະຫວັນ ສິດ​ທະ​ວົງ ເຈົ້າແຂວງໄຊ​ຍະ​ບູ​ລີ ແລະ ທ່ານ ພົນ​ຈັດຕະວາ ສີ​ພັນ ພຸດ​ທະ​ວົງ ຫົວໜ້າ​ກົມ ຊາຍ​ແດນ ກະຊວງ​ປ້ອງ​ກັນ​ປະເທດ ພ້ອມ​ດ້ວຍຄະນະ​ໄດ້​ລົງ​ຕິດຕາມ ແລະ ຊຸກຍູ້​ຂະບວນ​ການ​ປູກ​ພືດ​ອຸດ​ສາ​ຫະ​ກໍາ​ເປັນ​ສິນຄ້າ​ຂອງ​ປະຊາຊົນ​ເຂດ​ບ້ານ​ຫ້ວຍ​ເລິກ​-​ວັງ​ປາ ເມືອງ​ແກ່ນ​ທ້າວ ແຂວງ​ໄຊ​ຍະ​ບູ​ລີ ເມື່ອບໍ່​ດົນ​ມານີ້ ໂດຍ ໃຫ້ການ​ຕ້ອນຮັບ ແລະ ນໍາ​ພາ​ລົງ​ເບິ່ງ​ພື້ນ​ທີ່​ເຮັດ​ການ​ຜະລິດ​ຂອງ​ປະຊາຊົນ ມີ ທ່ານ ອໍາ​ຄາ ລັດສະໝີ ເຈົ້າເມືອງ ແກ່ນ​ທ້າວ, ມີ​ນາຍບ້ານ​ແຕ່​ລະ​ບ້ານ ແລະ ປະຊາຊົນ​ຊາວ​ກະສິກອນ​ໃນ​ຂອບ​ເຂດ​ບ້ານ ຫ້ວຍ​ເລິກ​-​ວັງ​ປາ​ເຂົ້າ​ຮ່ວມ.
    ທ່ານ ອໍາ​ຄາ ລັດສະໝີ ເຈົ້າເມືອງແກ່ນ​ທ້າວໄດ້​ໃຫ້​ຮູ້​ວ່າ: ການ​ປູກ​ພືດ​ລະ ດູຝົນ​ຂອງ​ປະຊາຊົນ​ເມືອງ ແກ່ນ​ທ້າວ ໃນ​ປີ​ນີ້​ແມ່ນ​ເປັນ​ຂະບວນ​ຟົດຟື້ນ ແລະ ປູກ​ສໍາ​ເລັດ 100% ທັນ​ຕາມ​ລະດູ​ການ, ສໍາ​ລັບ​ການ​ປູກ​ພືດ​ອຸດ​ສາ​ຫະ​ກໍາ​ເປັນ​ສິນຄ້າ​ຂອງ​ປະຊາຊົນ​ໃນ​ຂອບ​ເຂດ​ບ້ານ ຫ້ວຍ​ເລິກ​-​ວັງ​ປາ ແມ່ນ​ມີ​ເນື້ອທີ່​ທັງ​ໝົດ 24 ພັນ​ກວ່າ​ເຮັກຕາ, ພືດ​ທີ່​ປະຊາຊົນ​ປູກ​ສ່ວນ​ໃຫຍ່​ແມ່ນ ມັນຕົ້ນ, ສາລີ, ໝາກງາ, ຖົ່ວດິນ, ຖົ່ວ​ແດງ ແລະ ອື່ນໆ, ມາ​ຮອດ​ປັດຈຸບັນ​ແມ່ນ​ກໍາ​ລັງ​ບົວລະບັດ​ຮັກສາ, ໃສ່​ຝຸ່ນ ແລະ ເສຍ​ຫຍ້າ​-​ຂ້າ​ແມງໄມ້, ໂອກາດ​ດັ່ງກ່າວ ທ່ານ ພົງ​ສະຫວັນ ສິດ​ທະ​ວົງ ກໍ​ໄດ້​ຍ້ອງຍໍ​ຊົມເຊີຍ​ຕໍ່​ປະຊາຊົນ​ຊາວ​ກະສິກອນ​ທີ່​ໄດ້​ເອົາໃຈໃສ່​ໃນ​ການ​ປູກ​ພືດ​ອຸດ​ສາ​ຫະ​ກໍາ​ເປັນ​ສິນຄ້າ​ເພື່ອ​ສົ່ງ​ອອກ ພ້ອມ​ທັງ​ໄດ້​ຮຽກຮ້ອງ​ໃຫ້​ປະຊາຊົນ​ຊາວ​ກະສິກອນ​ຈົ່ງ​ສືບຕໍ່​ເອົາໃຈໃສ່​ໃນ​ການ​ບົວລະບັດ​ຮັກສາ, ການ​ໃສ່​ຝຸ່ນ, ການ​ເສຍ​ຫຍ້າ​ຂ້າ​ຮຸ່ນ, ເຝົ້າ​ລະວັງ​ການ​ລະບາດ​ຂອງ​ສັດຕູ​ພືດ ແລະ ອື່ນໆ ເພື່ອ​ຮັບປະກັນ​ໃຫ້ການ​ຜະລິດ​ໃນ​ລະດູຝົນ​ດັ່ງກ່າວ​ໄດ້​ຮັບ​ຜົນ​ຜະລິດ​ສູງ​ຕາມ​ແຜນການ​ທີ່​ວາງ​ໄວ້, ຈາກ​ນັ້ນ ທ່ານ ພົງ​ສະຫວັນ ສິດ​ທະ​ວົງ ແລະ ທ່ານ ພົນ​ຈັດຕະວາ ສີ​ພັນ ພຸດ​ທະ​ວົງ ພ້ອມ​ດ້ວຍ​ທີ​ມ​ງານ​ກໍ​ໄດ້​ເຂົ້າ​ຢ້ຽມຢາມ​ອ້າຍ​ນ້ອງ​ທະຫານ​ຊາຍ​ແດນ​ທີ່​ເຮັດ​ໜ້າທີ່​ປ້ອງ​ກັນ​ຊາຍ​ແດນ​ຢູ່​ເມືອງ ທົ່ງ​ມີ​ໄຊ ແລະ ໄດ້​ມອບ​ລົດ​ ຈໍາ​ນວນ 1 ຄັນ ມູນ​ຄ່າ 30 ລ້ານ​ກວ່າ​ກີບ ໃຫ້​ກອງ​ຮ້ອຍ​ຊາຍ​ແດນ 159 ເພື່ອ​ປະກອບສ່ວນ​ເຂົ້າ​ໃນ​ການ​ປະຕິບັດ​ໜ້າທີ່​ຂອງ​ອ້າຍ​ນ້ອງ​ທະຫານ​ຊາຍ​ແດນ. 
(ຂ່າວ​-​ພາບ​ໂດຍ: ອຸ່ນ​ເຮືອນ ໂພທິ​ລັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110