ໜັງສືພິມ ປະຊາຊົນ

ການພົວພັນສອງກອງທັບ ຈີນ-ລາວ ໃນຍຸກໃໝ່

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 05/08/2020 09:20:37 ຈຳນວນຢ້ຽມຊົມ 635 ຄັ້ງ

(ເນື່ອງໃນໂອກາດວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 93 ປີ)
ໂດຍ: ພັນເອກພິເສດ ເສີນ ຢົງຈິ່ງ ທີ່ປຶກສາທູດປ້ອງກັນຊາດ ສປ ຈີນ ປະຈໍາ ສປປ ລາວ
ການລຸກຮື້ຂຶ້ນຢູ່ເມືອງໜານຊາງ, ວັນທີ 1 ສິງຫາ 1927, ເປັນຂີດໝາຍກໍາເນີດຢ່າງເປັນທາງການຂອງກອງ ທັບປະຊາຊົນຈີນ ແບບໃໝ່ທີ່ ສ້າງຕັ້ງ ແລະ ນໍາພາໂດຍພັກກອມມູນິດຈີນ. ພາຍໃຕ້ ການຊີ້ນໍາ-ນໍາພາຂອງ ພັກກອມມູນິດຈີນ, ກອງທັບປະຊາຊົນຈີນກໍໄດ້ດໍາເນີນການຕໍ່ສູ້ປົດປ່ອຍປະຊາ ຊົນຈີນ ຢ່າງອົງອາດກ້າຫານ, ເພື່ອຄວາມເປັນເອກະລາດຂອງຊາດ ແລະ ຟື້ນຟູຄວາມຈະເລີນຮຸ່ງ ເຮືອງ ຊຶ່ງໄດ້ຜູກມັດຊາຕາກໍາປະຊາຊົນຈີນລວມເຂົ້າກັນໄວ້.
93 ປີຜ່ານມາ, ກອງທັບປະຊາຊົນຈີນ ໄດ້ຜ່ານຜ່າແປວ ໄຟສົງຄາມທີ່ລະອິດລະອ້ຽວ ແລະ ເສຍສະຫຼະຊີວິດ ເລືອດເນື້ອຢ່າງໃຫຍ່ຫຼວງ, ແຕ່ໄດ້ຮັບໄຊຊະນະຢ່າງສະ ຫງ່າງາມເປັນໄລຍະໆ ຊຶ່ງໄດ້ສ້າງຜົນງານຄວາມດີເປັນປະຫວັດສາດ ແລະ ເອກອ້າງທະນົງໃຈອັນສູງສົ່ງ ໃຫ້ແກ່ພັກ ແລະ ປະຊາຊົນຈີນ.
ໃນຊຸມປີທີ່ຜ່ານມາ, ກອງ ທັບຈີນ ພາຍໃຕ້ການຊີ້ນໍາ-ນໍາພາຂອງສູນກາງພັກກອມມູນິດ ແລະ ຄະນະກໍາມະການທະຫານສູນກາງ ໂດຍມີສະຫາຍ ສີ ຈິ້ນຜິງ ເປັນແກນນໍານັ້ນ, ບໍ່ລືມຕົ້ນກໍາເນີດ ແລະ ໄດ້ຈົດຈໍາພາລະກໍາ ລົງເລິກປະຕິບັດແນວຄິດກໍ່ສ້າງກອງທັບເຂັ້ມເເຂງຂອງສະຫາຍ ສີ ຈິ້ນຜິງ ແລະ ລົງເລິກປະຕິບັດແນວຄິດຍຸດທະສາດການທະຫານຂອງສະຫາຍ ສີ ຈິ້ນຜິງ ຢຶດໝັ້ນບໍ່ປ່ຽນແປງເດີນຕາມເສັ້ນທາງສ້າງກອງທັບໃຫ້ເຂັ້ມແຂງຕາມສີສັນສັງຄົມນິຍົມຂອງປະ ເທດຈີນ, ຢຶດໝັ້ນກໍ່ສ້າງກອງ ທັບຕາມລະບອບການເມືອງ, ປະຕິຮູບກອງທັບໃຫ້ມີຄວາມເຂັ້ມແຂງ, ເປັນກອງທັບທີ່ມີ ເຕັກນິກວິທະຍາສາດ, ມີບຸກ ຄະລາກອນກອງທັບເຂັ້ມແຂງ, ຄຸ້ມຄອງກອງທັບດ້ວຍກົດ ໝາຍ, ແນໃສ່ສາມາດຕີເອົາໄຊຊະນະສົງຄາມ, ຕັ້ງໜ້າຊຸກຍູ້ກໍ່ສ້າງວຽກງານປ້ອງກັນຊາດ ແລະ ກອງທັບໃຫ້ທັນສະໄໝ, ພະຍາຍາມບັນລຸເປົ້າໝາຍຍຸກ ສະໄໝໃໝ່ ໃຫ້ກາຍເປັນກອງ ທັບປະຊາຊົນເຂັ້ມແຂງດ້ວຍຄໍາຂວັນທີ່ວ່າ; “ກໍ່ສ້າງກອງທັບປະຊາຊົນຕາມການຊີ້ນໍາ-ນໍາພາຂອງພັກ, ສາມາດຕີເອົາໄຊ ຊະນະ, ມີລະບຽບແບບແຜນດີເລີດ ແລະ ສ້າງໃຫ້ເປັນກອງ ທັບປະຊາຊົນອັນດັບແຖວໜ້າຂອງໂລກ”.
ວຽກງານປ້ອງກັນຊາດຈີນ, ຍາມໃດກໍຖືເອົາການປົກປ້ອງຜົນປະໂຫຍດທາງດ້ານອະທິປະໄຕ, ຄວາມໝັ້ນຄົງ ແລະ ການພັດທະນາຂອງຊາດ ເປັນຄາດໝາຍຮາກຖານ, ກອງທັບຈີນ ເດັດດ່ຽວ ໃນການສະກັດກັ້ນ ແລະ ຕ້ານການຮຸກຮານຂອງອິດທິກໍາລັງປໍລະປັກຈາກພາຍນອກ ເພື່ອປົກປ້ອງ ຄວາມໝັ້ນຄົງທາງການເມືອງ, ປະຊາຊົນ ແລະ ສັງຄົມ. ພ້ອມທັງຕໍ່ຕ້ານກັບກອງກໍາລັງທີ່ຢາກ ແບ່ງແຍກດິນແດນ ເພື່ອປົກປ້ອງອະທິປະໄຕຂອງຊາດ, ຄວາມເປັນເອກະພາບ, ຜືນແຜ່ນດີນອັນຄົບຖ້ວນຂອງຊາດ, ປົກປ້ອງສິດ ແລະ ຜົນປະໂຫຍດທາງທະເລຂອງຊາດ, ປົກປ້ອງຜົນປະໂຫຍດດ້ານ ຄວາມປອດໄພຂອງປະເທດທາງນ່ານຟ້າ ແລະ ອະວະກາດ, ອິນເຕີເນັດ ແລະ ອື່ນໆ. ປົກປ້ອງຜົນປະໂຫຍດຂອງຊາດຢູ່ນອກປະເທດ, ສົ່ງເສີມ ແລະ ສະ ໜັບສະໜູນຍຸດທະສາດການພັດທະນາແບບຍືນຍົງຂອງປະເທດ. ບໍ່ວ່າຍາມໃດກໍຕາມ, ກອງທັບຈີນ ກໍມີສະຕິລະວັງຕົວສູງຕະຫຼອດມາ, ມີເຈດຈໍາ ນົງໜັກແໜ້ນ, ມີຄວາມເຊື່ອ ໝັ້ນຢ່າງເຕັມທີ່ ແລະ ມີຄວາມ ສາມາດອັນພຽງພໍໃນການປະ ຕິບັດ ໜ້າທີ່ຕ່າງໆໃຫ້ສໍາເລັດທຸກປະການ.
ຈີນ ຢຶດໝັ້ນຢ່າງເດັດດ່ຽວເດີນຕາມເສັ້ນທາງພັດທະນາໂດຍສັນຕິ, ສວຍໃຊ້ສະຖານະພາບສັນຕິພາບສາກົນ ເພື່ອເອື້ອອໍານວຍພັດທະນາຕົນເອງ, ຜ່ານການພັດທະນາຕົນເອງ ເມື່ອປົກປ້ອງ ແລະ ສົ່ງເສີມສັນຕິພາບໂລກ. ສະຫາຍ ສີ ຈິ້ນຜິງ ຍັງໄດ້ເນັ້ນໜັກວ່າ: ຈີນ ເປັນຜູ້ສ້າງສັນຕິພາບໂລກ ແຕ່ຕົ້ນຕະຫຼອດປາຍ, ທັງເປັນຜູ້ປະກອບສ່ວນເຂົ້າໃນການພັດທະນາຂອງໂລກ ແລະ ເປັນຜູ້ປົກປ້ອງ ລະບຽບການສາກົນ. ຕັ້ງໜ້າປະຕິບັດນະໂຍບາຍປ້ອງກັນຊາດປ້ອງກັນຕົນເອງແຕ່ຕົ້ນຕະຫຼອດປາຍ, ຢຶດໝັ້ນສະແຫວງຫາກໍາລັງມະຫາອໍານາດ, ບໍ່ແຜ່ຂະຫຍາຍກໍາລັງຕໍ່ພາຍນອກ ແລະ ຈະບໍ່ຂະຫຍາຍ ອິດທິພົນຕະຫຼອດໄປ, ປະຕິບັດນະໂຍບາຍຍຸດທະສາດທາງການທະຫານ ໂດຍອີງໃສ່ຫຼັກການປ້ອງກັນຕົວ, ສົ່ງເສີມການພັດທະນາຮ່ວມກັນ, ລົງເລິກການຮ່ວມມືດ້ານຄວາມໝັ້ນຄົງສອງຝ່າຍ ແລະ ຫຼາຍຝ່າຍ, ສ້າງຄວາມສະເໝີພາບ, ຄວາມຍຸຕິທໍາ ແລະ ຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ, ພະຍາຍາມສະໜອງຜະລິດຕະພັນສາທາລະນະທາງດ້ານຄວາມໝັ້ນຄົງໃຫ້ແກ່ພາກພື້ນ ແລະ ສາກົນ. ມີສ່ວນຮ່ວມຢ່າງຕັ້ງໜ້າໃນການແກ້ໄຂຄວາມເຄັ່ງຕຶງທາງການເມືອງຢ່າງສ້າງສັນ,ຮ່ວມກັນຮັກສາຄວາມ ປອດໄພເສັ້ນທາງສາກົນ, ຕອບຕ້ານຕໍ່ລັດທິການກໍ່ການຮ້າຍ, ຄວາມປອດໄພທາງເຄື່ອຂ່າຍ ອິນເຕີເນັດ, ໄພທໍາມະຊາດ ແລະ ສິ່ງທີ່ທ້າທາຍອື່ນໆໃນທົ່ວໂລກ ຢ່າງເໝາະສົມ; ທັງໝົດເຫຼົ່ານັ້ນ ເພື່ອເປັນກໍາລັງປະກອບສ່ວນໃນການສ້າງປະຊາຄົມຮ່ວມຊາຕາກໍາຂອງມວນມະນຸດ.
ສອງປະເທດຈີນ - ລາວ ມີສາຍພູ ສາຍນໍ້າຕິດຈອດກັນ, ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ, ສະຫາຍ ສີ ຈິ້ນຜິງ ເລຂາທິການໃຫຍ່ ປະທານປະເທດ ແຫ່ງ ສປ ຈີນ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ຮ່ວມກັນລົງນາມແຜນແມ່ບົດໃນການສ້າງປະຊາຄົມຄູ່ຮ່ວມຊາຕາກໍາຈີນ - ລາວ ໃນເດືອນເມສາ ປີ 2019. ນີ້ໄດ້ສະແດງໃຫ້ເຫັນວ່າ: ການພົວພັນ ຈີນ-ລາວ ໄດ້ເຂົ້າສູ່ໄລຍະໃໝ່ ຊຶ່ງບໍ່ພຽງແຕ່ສອດຄ່ອງກັບຜົນປະໂຫຍດອັນພື້ນຖານ ແລະ ຄວາມມຸ່ງ ມາດປາຖະໜາຮ່ວມ ກັນຂອງສອງພັກ, ສອງປະເທດ ແລະ ປະຊາຊົນສອງຊາດເທົ່າ ນັ້ນ, ແຕ່ຫາກຍັງມີຜົນດີຕໍ່ສັນຕິ ພາບ, ສະຖຽນລະພາບ, ການ ພັດທະນາຂອງພາກພື້ນນໍາອີກ.
ພາຍໃຕ້ການຊີ້ນໍາ - ນໍາພາ ຂອງສອງພັກ, ສອງລັດ ແລະ ຜູ້ນໍາຂັ້ນສູງຂອງສອງປະເທດ, ກໍາລັງປະກອບອາວຸດຈີນ - ລາວ ໄດ້ຮັກສາ ແລະ ຖະນຸຖະໜອມສາຍພົວພັນມິດຕະພາບໄດ້ຢ່າງເລິກເຊິ່ງ, ດໍາເນີນການ ແລກປ່ຽນຄະນະຜູ້ແທນໃນທຸກລະດັບຢ່າງບໍ່ຢຸດຢັ້ງ ແລະ ສືບຕໍ່ຮັກສາສັນຕິພາບ, ສະຖຽນລະພາບຢູ່ຊາຍແດນ ແລະ ສົ່ງ ເສີມຮ່ວມມືໃນການປ້ອງກັນຄວາມປອດໄພໃຫ້ໂຄງການ “ໜຶ່ງແລວ ໜຶ່ງເສັ້ນທາງ”, ຮ່ວມມືໃນການກໍ່ສ້າງໂຮງຮຽນການທະຫານ, ຄ້າຍຄູ, ຝຶກຊ້ອມຮ່ວມ ແລະ ການຝຶກອົບຮົມບຸກຄະລາກອນໃຫ້ໄດ້ຮັບຜົນສໍາເລັດເປັນ ຢ່າງດີ.
ຕະຫຼອດໄລຍະເວລາ 1 ປີທີ່ຜ່ານມາ, ທ່ານ ພົນເອກ ເວີຍ ເຊີ່ງເຫີ ທີ່ປຶກສາແຫ່ງລັດ, ລັດຖະມົນຕີກະຊວງປ້ອງກັນປະເທດ ໄດ້ປະສົບຜົນສໍາເລັດໃນການເດີນທາງມາຢ້ຽມຢາມ ສປປ ລາວ ຢ່າງຈົບງາມ ແລະ ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງ ປ້ອງກັນປະເທດ ໄດ້ເຂົ້າຮ່ວມພິທີເປີດງານມະຫະກໍາກິລາທະຫານໂລກ ຄັ້ງທີ 7 ຢູ່ນະ ຄອນ ອູຮັນ ສປ ຈີນ. ນອກນີ້, ສອງກອງທັບຈີນ - ລາວໄດ້ ສໍາເລັດຈັດກິດຈະກໍາຝຶກຊ້ອມ ຮ່ວມໃນການຊ່ວຍເຫຼືອດ້ານມະນຸດສະທໍາທາງດ້ານການ ແພດ, ຂະບວນລົດໄຟສັນຕິ ພາບ 2019. ພ້ອມດຽວກັນນັ້ນ. ໄດ້ເຂົ້າຮ່ວມ ການປະຕິບັດງານການແພດສຸກເສີນຕົວຈິງ ກ່ຽວກັບລົດບັດໂດຍສານຈີນ ເກີດອຸບັດເຫດຄັ້ງໃຫຍ່ ໃນວັນທີ 19 ສິງຫາ ຢູ່ຫຼວງພະບາງ. ພາຍຫຼັງມີການແຜ່ລະບາດຂອງໂຣກປອດອັກເສບສາຍ ພັນໃໝ່ ໂຄວິດ-19. ສອງກອງ ທັບໄດ້ປະຕິບັດຕາມຈິດໃຈ ຂອງການນໍາສູງສຸດຂອງສອງພັກ, ສອງລັດ ທີ່ໄດ້ໂອ້ລົມກັນຜ່ານໂທລະສັບທາງໄກ ໂດຍມີຄວາມສະດຸ້ງໄວ, ປະສານງານກັນຢ່າງໃກ້ຊິດ, ສະໜັບສະໜູນໃຫ້ການຊ່ວຍເຫຼືອຊຶ່ງກັນ ແລະ ກັນ, ຮ່ວມມືກັນໃນການຕໍ່ສູ້ກັບພະຍາດລະບາດ ຊຶ່ງໄດ້ຮັບຜົນສໍາເລັດເປັນຢ່າງດີ ແລະ ໄດ້ເປັນການປະກອບສ່ວນອັນສໍາຄັນໃນການຄວບຄຸມພະຍາດລະບາດດັ່ງກ່າວ ເພື່ອສືບຕໍ່ສ້າງປະຊາຄົມຄູ່ຮ່ວມຊາຕາກໍາຈີນ - ລາວ ແລະ ສ້າງປະຊາ ຄົມຮ່ວມ ຊາຕາກໍາດ້ານສາທາລະນະສຸກຂອງມວນມະນຸດຢ່າງມີຊີວິດຊີວາ. ການຮວ່ມມື ແລະ ການແລກປ່ຽນດັ່ງກ່າວ, ແມ່ນໄດ້ຮັບການຍ້ອງຍໍຢ່າງກວ້າງຂວາງຈາກທຸກຝ່າຍກໍໄດ້ເພີ່ມກໍາລັງແຮງອັນໃໝ່ໃຫ້ແກ່ການສົ່ງ ເສີມສາຍພົວພັນສອງກອງທັບຈີນ-ລາວ, ລາວ-ຈີນ ໃຫ້ນັບມື້ນັບເລິກເຊິ່ງກວ່າເກົ່າອີກດ້ວຍ.
ພາຍໃຕ້ເງື່ອນໄຂຂອງຍຸກ ສະໄໝໃໝ່, ກອງທັບປົດປ່ອຍ ປະຊາຊົນຈີນ ຍິນດີຮ່ວມກັບກອງທັບປະຊາຊົນລາວ ໃນການເພີ່ມທະວີການຮ່ວມມືແລກປ່ຽນກັນໃຫ້ແໜ້ນແຟ້ນຂຶ້ນຕື່ມອີກບາດກ້າວໜຶ່ງ ເພື່ອເປັນການປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກໍາຈີນ-ລາວ, ພ້ອມທັງເສີມ ຂະຫຍາຍການແລກປ່ຽນ ແລະ ການຮ່ວມມືດ້ານວຽກງານປ້ອງກັນຊາດຈີນ - ອາຊຽນ ເພື່ອປົກປ້ອງສັນຕິພາບ ແລະ ສະຖຽນລະພາບຂອງພາກພື້ນ ແລະ ທົ່ວໂລກໄວ້ຢ່າງແໜ້ນແກ່ນ.