ຂະແໜງທະນາຄານແຂ່ງຂັນກິລາເປຕັງ ມິດຕະພາບຕ້ອນຮັບກອງປະຊຸມໃຫຍ່ຄັ້ງທີ IV

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 05/08/2020 09:32:35 ຈຳ​ນວນ​​ຢ້ຽມ​ຊົມ 2795 ຄັ້ງ

    ເພື່ອ​ເປັນ​ການ​ສ້າງ​ຂະບວນ​ການ​ຂ່ຳນັບ​ຮັບ​ຕ້ອນ​ກອງ​ປະຊຸມ​ໃຫຍ່​ຜູ້​ແທນ ຄັ້ງ​ທີ IV ຂອງ​ອົງຄະນະ​ພັກ​ທະນາຄານ​ແຫ່ງ ສປປ ລາວ ທີ່​ຈະຈັດ ​ຂຶ້ນ​ໃນ​ມໍ່ໆ​ນີ້; ຄະນະ​ພັກ​-​ຄະນະ​ຜູ້​ ວ່າການ​ທະນາຄານ​ແຫ່ງ ສປປ ລາວ ໄດ້​ຈັດ​ຕັ້ງ​ການ​ແຂ່ງຂັນ​ກິລາ​ມິດ ຕະພາບ (ກິລາ​ເປ​ຕັງ) ຂຶ້ນ​ໃນ​ວັນ​ທີ 1 ສິງຫາ​ຜ່ານ​ມາ​ນີ້, ທີ່​ສະໜາມກິລາ​ເປ​ຕັງ (ຊີເກມ) ມະຫາວິທະຍາໄລ​ແຫ່ງ​ຊາດ ນະຄອນຫຼວງ​ວຽງ​ຈັນ  ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສິດ​ພະ​ໄຊ ກຳ​ມະ​ການ​ສໍາ​ຮອງ​ສູນ​ກາງ​ພັກ ເລຂາ​ຄະນະ​ພັກ ຜູ້​ວ່າການ​ທະນາຄານ ແຫ່ງ ສປປ ລາວ; ບັນດາ​ທ່ານ​ຄະນະ​ປະຈຳ​ພັກ - ຮອງ​ຜູ້​ວ່າການ​ທະນາຄານ​ແຫ່ງ ສປປ ລາວ; ບັນດາ​ຄະນະ​ກົມ​ທະນາຄານ​ແຫ່ງ ສປປ​ລາວ​-​ຄະນະ​ຜູ້​ອໍາ​ນວຍ​ການ​ທະນາຄານ​ທຸລະ​ກິດ ແລະ ນັກ​ກິລາ ເຂົ້າ​ຮ່ວມ.
   ການ​ແຂ່ງຂັນ​ຄັ້ງ​ນີ້, ປະກອບ​ມີ ທີ​ມ​ປະສົມ​ຊາຍ​-​ຍິງ​ຄື: ຄູ່​ທີ​ໜຶ່ງ ໂດຍ​ມີ​ທ່ານ ສອນ​ໄຊ ສິດ​ພະ​ໄຊ, ທ່ານ​ນາງ ວັດທະນາ ດາລາ​ລອຍ ແລະ ທ່ານ ຄໍາ​ພຸດ ສິດທິ​ລາດ ພົບ​ກັບ​ທີ​ມ​ຂອງ​ທ່ານ ຄໍາ​ວົງ ທິບ​ພະ​ວົງ, ທ່ານ ພຸດ​ທະ​ໄຊ ສິວິໄລ ແລະ ທ່ານ​ນາງ ຂັນແກ້ວ ຫຼ້າ​ມະນີ​ເງົາ; ຄູ່​ທີສອງ ປະກອບ​ມີ​ທ່ານ ພານຸ​ສັກ ແກ່ນ​ວົງ​ພະຈັນ, ທ່ານ ພູ​ຂົງ ຈັນທະ​ຈັກ ແລະ ທ່ານ​ນາງ ແສງ​ດາວວີ ວົງ​ຄຳ​ຊາວ ພົບ​ກັບ ທີ​ມ​ຂອງ​ທ່ານ​ນາງ ສາຍສະໝອນ ຈັນທະ​ຈັກ, ທ່ານ ເພັດ​ສະຖາພອນ ແກ້ວ​ວົງ​ວິຈິດ ແລະ ທ່ານ ຄໍາ​ສິງ ແກ້ວ​ມະຫາ​ວົງ. 
   ສຳລັບ​ການ​ແຂ່ງຂັນ​ກິລາ​ເປ​ຕັງ​ຂອງ​ທີມ​ຍິງ ແລະ ທີມ​ຊາຍ ກໍໄດ້​ດຳເນີນ​ການ​ແຂ່ງຂັນ​ກັນ​ຢ່າງ​ຟົດຟື້ນ ໂດຍ​ຜ່ານ​ການ​ຕີແບບ​ຄັດ​ເລືອກ​ມາ​ເປັນ​ລຳດັບ ຊຶ່ງ​ສົ່ງ​ຜົນ​ໃຫ້​ມີ​ຫຼາຍ​ທີມ​ຜ່ານ​ເຂົ້າ​ມາ​ຮອບ​ຕັດ​ເຊືອກ ໂດຍ​ມີ​ທີມ​ທີ່​ຊະນະ​ເລີດປະເພດ​ຊາຍ​ໄດ້ແກ່​ທີມທະນາຄານ​ອຸດ​ສາ​ຫະ​ກໍາ ແລະ ການ​ຄ້າ ຈີນ ຈຳກັດ ສາຂາ​ນະ ຄອນຫຼວງ​ວຽງ​ຈັນ (ICBC) ແລະ ປະ ເພດ​ຍິງ ໄດ້ແກ່​ສຳນັກງານ​ປົກປ້ອງ​ ເງິນ​ຝາກ ໂດຍ​ການ​ໃຫ້​ກຽດ​ມອບຂອງ ​ທ່ານ​ນາງ ວັດທະນາ ດາລາ​ລອຍ   ຮອງ​ຜູ້​ວ່າການ​ທະນາຄານ ​ແຫ່ງ ສປປ ລາວ;  ຮອງຊະນະ​ເລີດປະເພດຊາຍ​ ໄດ້ແກ່​ທະນາຄານ​ຮ່ວມ​ທຸລະ​ກິດ ລາວ​-​ຫວຽດ ແລະ ປະເພດ​ຍິງ​ໄດ້ແກ່​ທະນາຄານ​ແຫ່ງ ສປປ ລາວ.
 (ຂ່າວ​-​ພາບ: ຣັດ​ສະໝີ ດວງ​ສັດຈະ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110