ໜັງສືພິມ ປະຊາຊົນ

ADB ຄາດຄະເນຈຳນວນເງິນສົ່ງກັບປະເທດ ທົ່ວໂລກຫຼຸດລົງຫຼາຍ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 06/08/2020 09:28:50 ຈຳນວນຢ້ຽມຊົມ 706 ຄັ້ງ

ຂ່າວຕ່າງປະເທດລາຍງານ ວັນທີ 3 ສິງຫາທີ່ຜ່ານມາ, ທະນາຄານເພື່ອການພັດທະນາແຫ່ງອາຊີ (ADB) ໄດ້ຄາດຄະເນວ່າ: ຍອດການສົ່ງເງິນກັບຄືນປະເທດຂອງປະເທດຕ່າງໆທົ່ວໂລກ ຈະຫຼຸດລົງ 1.086 ແສນລ້ານໂດລາ ໃນປີ 2020 ເນື່ອງມາຈາກມີການເລີກຈ້າງງານ ແລະ ຫຼຸດຄ່າແຮງງານລົງ ໃນໄລຍະ ທີ່ເກີດການແຜ່ລະບາດຂອງໂຣກ COVID-19.
ADB ເປີດເຜີຍວ່າ: ຈໍານວນເງິນທີ່ສົ່ງກັບຄືນປະເທດໃນອາຊີ ຊຶ່ງເປັນພາກພື້ນທີ່ມີແຮງງານຕ່າງຊາດຢູ່ເປັນຈຳນວນຫຼາຍເຖິງ 1 ໃນ 3 ຂອງໂລກນັ້ນ ອາດຈະຫຼຸດລົງ 5,43 ໝື່ນລ້ານໂດລາ. ໃນປີ 2019 ຈໍານວນເງິນທີ່ສົ່ງກັບຄືນປະເທດໃນອາຊີ-ປາຊີຟິກ ມີຈຳນວນທັງໝົດ 3,15 ແສນລ້ານໂດລາ ໂດຍເງິນເຫຼົ່ານີ້ ມີສ່ວນຊ່ວຍກະຕຸ້ນການເຕີບໂຕຂອງເສດຖະກິດໃນພາກພື້ນດັ່ງກ່າວ.
ບົດລາຍງານຂອງ ADB ລະບຸວ່າ: ການແຜ່ລະບາດຂອງໂຣກ COVID-19 ຈະສົ່ງ ຜົນກະທົບຢ່າງໜັກຕໍ່ຈໍານວນ ເງິນທີ່ສົ່ງກັບຄືນປະເທດໃນອາຊີ-ປາຊີຟິກ. ກ່ອນໜ້ານີ້, ADB ໄດ້ເຜີຍແຜ່ການຄາດຄະເນໃນບົດລາຍງານທ່າອ່ຽງເສດຖະກິດຂອງປະເທດກຳລັງພັດທະນາໃນອາຊີ ໂດຍລະບຸວ່າ: ລວມຍອດຜະລິດຕະພັນພາຍໃນປະເທດ (GDP) ຂອງກຸ່ມປະເທດກຳລັງພັດທະນາໃນອາຊີ ຈະຂະຫຍາຍຕົວພຽງ 0,1% ໃນປີ 2020 ຊຶ່ງຫຼຸດລົງຈາກທີ່ເຄີຍຄາດຄະເນໄວ້ໃນ ເດືອນເມສາ ທີ່ຜ່ານມາວ່າ ຈະຂະຫຍາຍຕົວ 2,2%. ໂຕເລກການຄາດຄະເນ GDP ຫຼ້າສຸດນີ້ຖືວ່າເປັນການ ຂະຫຍາຍ ຕົວໃນ ອັດຕາຕ່ຳທີ່ສຸດ ນັບຕັ້ງແຕ່ປີ 1961, ເນື່ອງຈາກມາດຕະການຄວບຄຸມການແຜ່ລະບາດຂອງ COVID-19 ໄດ້ສົ່ງຜົນກະທົບຕໍ່ກິດຈະກຳທາງເສດຖະກິດ ແລະ ເຮັດໃຫ້ຄວາມຕ້ອງການໃນຕ່າງປະເທດອ່ອນແອລົງ.