ຮີໂຣຊີມາ ຈາກເມືອງທີ່ເຄີຍຖືກລູກລະເບີດປະລະມານູ ສູ່ເມືອງທ່ອງທ່ຽວ

(ເນື່ອງ​ໃນ​ໂອກາດ​ວັນ​ອາ​ເມ​ຣິ​ກາ​ຖິ້ມ​ລະເບີດ​ປະລະ​ມານູ​ຢູ່​ເມືອງ​ຮີ​ໂຣ​ຊີ​ມາ ແລະ ນາ​ກາ​ຊາ​ກິ 6-9/8/1945-6-9/8/2020)
   ຮຽບຮຽງ​ໂດຍ: ລຸ້ງ​ດາວ

    ວັນ​ທີ 6 ສິງຫາຂອງທຸກໆ​ ປີ, ຜູ້ນຳ​ຍີ່ປຸ່ນ ພ້ອມ​ດ້ວຍ​ປະ ຊາຊົນ​ໃນ​ທົ່ວ​ປະເທດ ໄດ້​ຈັດ​ງານ​ໂຮມ​ຊຸມນຸມ​ຢູ່​ເມືອງ​ຮີ​ໂຣ​ຊີ​ມາ ເພື່ອ​ລະນຶກ​ເຫດການປະ ຫວັດສາດທີ່​ອາ​ເມ​ຣິ​ກາ​ຖິ້ມ​ລະ ເບີດ​ໃສ່ ເມືອງ​ຮີ​ໂຣ​ຊີ​ມາ ແລະ ນາ​ກາ​ຊາ​ກິ ໃນ​ວັນ​ທີ 6-9/8/ 1945 ກ່ອນ​ສົງຄາມ​ໂລກ​ຄັ້ງ​   ທີ II ຈະ​ສິ້ນ​ສຸດ​ລົງ.
    ພາຍຫຼັງ​ສົງຄາມ​ໂລກ​ຄັ້ງ​ທີ II, ການ​ຕໍ່ຕ້ານ​ການ​ແຂ່ງ ຂັນ​ອາວຸດ​ເປັນຕົ້ນ​ແມ່ນ​ອາ ວຸດ​ນິວ​ເຄ​ຣຍ, ຕ້ານ​ຜົນຮ້າຍ​ຂອງ​ສົງຄາມ​ໂລກ ໄດ້​ກາຍເປັນ ຂະບວນ ​ສັນຕິພາບ​ທີ່​ຍິ່ງໃຫຍ່. ຍີ່ປຸ່ນ​ເປັນ​ປະເທດ​ທຳອິດທີ່​ຖືກ​ຜົນຮ້າຍ​ຈາກ​ລູກ​ລະເບີດປະ​ລະ​ມາ​ນູ, ຂະບວນສັນຕິພາບ​ໄດ້ພັດທະນາ​ຢ່າງ​ແຂງແຮງ​ໃນ​ຊຸມ​ປີ 50 ສະພາຄວາມ ໝັ້ນ ຄົງ, ຍີ່ປຸ່ນ ຕ້ານ​ລະເບີດປະລະມານູ​ໄດ້​ສ້າງ​ຂຶ້ນ ເພື່ອ​ເຄື່ອນ​ໄຫວ​ສັນຕິພາບ, ຕ້ານ​ການ​ແຂ່ງຂັນ​ອາວຸດ​ນິວ​ເຄ​ຣຍ, ຮຽກຮ້ອງ​ສິດ ຜົນປະໂຫຍດ​ໃຫ້​ແກ່​ຜູ້​ໄດ້​ຮັບ​ເຄາະ​ຮ້າຍ​ຈາກ​ລະເບີດ​ປະ​ລະ​ມາ​ນູູ. ເດືອນ 8/1955 ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະ ຊາຊາດໄດ້​ຈັດ​ກອງ​ປະຊຸມໂລກ ຕ້ານ​ລະເບີດ​ປະລະມາ​ນູ​ ຢູ່​ນະຄອນ ຮີ​ໂຣ​ຊີ​ມາ ແລະ ນາ​ກາ​ຊາ​ກິ ຂອງ​ຍີ່ປຸ່ນ ໂດຍ​ມີ​ຜູ້​ແທນ​ຫຼາຍ​ພັນ​ຄົນ​ເຂົ້າ​ຮ່ວມ. ຫົວຂໍ້​ຂອງກອງ​ປະຊຸມ​ຄັ້ງ​ນັ້ນ​ແມ່ນ “ເກືອດ​ຫ້າມ​ປະ​ລະ​ມາ​ນູ ແລະ ຕ້ານ​ສົງຄາມ​ອາວຸດ​ນິວ​ເຄ​ຣຍ”.
    ໃນ​ຫຼາຍ​ປີຜ່ານມາ, ຢູ່​ສວນ​ອຸທິຍານ​ລະນຶກ​ສັນຕິພາບ, ບຸກຄົນ​ໃນ​ວົງ​ການ​ຕ່າງໆ ໃນ​ນະຄອນ​ຮີ​ໂຣ​ຊີ​ມາ ຫຼາຍ​ພັນ​ຄົນ ໄດ້​ຈັດ​ພິທີ​ໄວ້ອາໄລ​ຜູ້​ປະ ສົບ​ເຄາະ​ຮ້າຍ​ຍ້ອນ​ອາ​ເມ​ຣິ​ກາ​ຖິ້ມ​ລະເບີດ​ລົງ​ໃສ່​ເມືອງ​ຮີ​ໂຣ​ຊີ​ມາ ໃນ​ວັນ​ທີ 6/8/1945 ເຮັດ​ໃຫ້​ມີ​ຜູ້​ເສຍ​ຊີວິດ 140.000  ຄົນ, ຕໍ່​ມາ​ກໍ​ມີ​ຄົນ​​ເສຍ​ຊີວິດ​ຈຳ ນວນຫຼາຍຍ້ອນ​ພະຍາດ​ຈາກ​ ຜົນກະທົບຂອງ​ລູກ​ລະເບີດ​ປະ​ລະ​ມາ​ນູ.
    ປັດຈຸບັນ, ຮີ​ໂຣ​ຊີ​ມາ ກາຍ ເປັນ​ສະຖານທີ່​ທ່ອງ​ທ່ຽວ​ທີ່​ໜ້າ​ສົນໃຈ​ອີກ​ແຫ່ງ​ໜຶ່ງ​ຂອງ​ປະ ເທດ ຊຶ່ງ​ຮີ​ໂຣຊີ​ມາເປັນ​ເຂດ​ເຄີຍ​ຜ່ານ​ການ​ຖືກ​ທຳລາຍ​ລ້າງຜານ​ຂອງ​ລູກ​​ລະ​ເບີດປະ​ລະ​ມາ​ນູ, ອັນ​ເຮັດ​ໃຫ້​ເກີດ​ເລື່ອງລາວ​ໂສກ ເສົ້າ​ມາ​ເຖິງ​ປັດ​ຈຸ​ບັນ. ດອນ​ມີ​ຢາ​ຊີ​ມະ ກໍ​ແມ່ນ​ດອນ​ໜຶ່ງ ທີ່​ນອນ​ຢູ່​ແຂວງ​ຮີ​ໂຣ​ຊີ​ມາ ມີ​ສະຖານທີ່​ທ່ອງທ່ຽວທີ່​ໜ້າ​ສົນໃຈ ແລະ ສຳຄັນ​ທີ່​ສຸດ ມີ​ຫໍ​ພິ​ພິ​ທະ​ພັນ ແລະ ສວນ​ອະ​ນຸ​ສອນ​ສັນຕິພາບ ອັນ​ເປັນ​ສູນ​ລວມ​ແຫ່ງການ​ອະນຸລັກ​ຄວາມ​ຫາຍຍະນະ​ໃນ​ສະໄໝ​ສົງ​ຄາມ. ນອກຈາກ​ນັ້ນ, ກໍ​ຍັງ​ມີ​ອາຄານ​ຫຼົງ​ເຫຼືອ​ຈາກ​ການທຳລາຍ ຂອງ​ລະ​ເບີດ. ສິ່ງ​ຫຼົງ​ເຫຼືອ​ດັ່ງກ່າວ ລ້ວນ​ແຕ່​ເປັນ​ການສະແດງ​ໃຫ້​ເຫັນ​ເຖິງ​ຜົນ​ຮ້າຍ​ຂອງ​ສົງຄາມ ລວມ​ທັງ​ເປັນ ການ​ປູກ​ຈິດ​ສຳນຶກ​ໃຫ້​ຄົນ​ຮຸ່ນ​ໃໝ່ ມີ​ແນວ​ຄິດ​ຮັກຫອມ​ສັນຕິ​ພາບ. ເຖິງ​ແມ່ນ​ວ່າ ຈະ​ມີ​ບັນດາ​ຮ່ອງຮອຍປະຫວັດສາດ​ທີ່​ສະທ້ອນ​ໃຫ້​ເຫັນ ໂດຍ​ຜ່ານ​ອະ​ນຸ​ສອນ​ສະຖານ​ແຫ່ງ​ຕ່າງໆ ທີ່​ສຳຄັນ​ແລ້ວ. ຮີ​ໂຣ​ຊີ​ມາ ຍັງ​ເປັນ​ສະຖານທີ່​ທ່ອງ​ທ່ຽວ​ທີ່​ປະ ທັບ​ໃຈ ຈາກ​ເຄີຍ​ເປັນ​ເມືອງ​ທີ່​ຖືກ​ທຳລາຍ​ລ້າງຜານ​ຂອງ​ລະ ເບີດ​ປະ​ລະມາ​ນູໃນ​ອະດີດ, ກາຍເປັນ​ເມືອງ​ທີ່​ໜ້າ​ທ່ອງ​ທ່ຽວ​ອີກ​ແຫ່ງ​ໜຶ່ງ​ຂອງ​ປະເທດ​ຍີ່​ປຸ່ນ.