ໜັງສືພິມ ປະຊາຊົນ

ຂະບວນວິວັດແຫ່ງການພັດທະນາປະຊາຄົມອາຊຽນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 07/08/2020 09:05:18 ຈຳນວນຢ້ຽມຊົມ 749 ຄັ້ງ

(ເນື່ອງໃນໂອກາດວັນສ້າງຕັ້ງອາຊຽນ ຄົບຮອບ 53 ປີ 8/8/1967 - 8/8/2020)

ນັບແຕ່ອາຊຽນໄດ້ຮັບການສ້າງຕັ້ງຂຶ້ນໃນວັນທີ 8 ສິງຫາ 1967, ທີ່ນະຄອນຫຼວງບາງກອກ ປະເທດໄທ. ອາຊຽນ ໄດ້ປະ ເຊີນກັບສິ່ງທ້າທາຍຫຼາຍປະການ, ແຕ່ດ້ວຍການຮ່ວມມື ກັນຢ່າງໃກ້ຊິດຂອງບັນດາປະ ເທດສະມາຊິກອາຊຽນ. ໃນນັ້ນມີ ສປປ ລາວ ແລະ ລະຫວ່າງ ອາຊຽນກັບພາຍນອກ. ອາຊຽນ ໄດ້ຮັບຜົນສຳເລັດເທື່ອລະກ້າວ ໃນການປົກປັກຮັກສາ ແລະ ສົ່ງເສີມສັນຕິພາບ, ສະ ຖຽນລະພາບ ແລະ ການຮ່ວມມື ເພື່ອຄວາມອຸດົມສົມບູນພູນສຸກຂອງບັນດາ ປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະ ໃນໂລກ ຊຶ່ງເປັນຈຸດປະສົງຕົ້ນຕໍຂອງຕົນ ແລະ ອາຊຽນ ໄດ້ປະກາດການສ້າງຕັ້ງປະຊາ ຄົມອາຊຽນຢ່າງເປັນທາງການໃນວັນທີ 31 ທັນວາ 2015 ປີ.
ວັນທີ 31 ທັນວາ 2015 ປີ, ກາຍເປັນຂີດໝາຍປະຫວັດ ສາດໃນຂະບວນວິວັດແຫ່ງ ການ ເຕີບໃຫຍ່ ແລະ ຂະຫຍາຍ ຕົວຂອງອາຊຽນ ດ້ວຍການສ້າງຕັ້ງປະຊາຄົມອາຊຽນ, ເປີດສັງກາດແຫ່ງການພັດທະນາ ໃໝ່ສໍາລັບປະຊາຄົມ. ປະຊາຄົມອາຊຽນ ແມ່ນປະຊາຄົມວັດທະນະທໍາໜຶ່ງທີ່ອຸດົມສົມ ບູນດ້ວຍ ຫຼາຍຮູບຫຼາຍສີທີ່ເປັນມູນເຊື້ອ. ນັບແຕ່ເຂົ້າເປັນສະມາຊິກອາຊຽນໃນປີ 1997, ສປປ ລາວ ໄດ້ປະກອບສ່ວນຢ່າງຕັ້ງໜ້າ, ເລິກເຊິ່ງກ້ວາງຂວາງ ໃນການ ເຄື່ອນໄຫວຮ່ວມມືໃນທຸກຂົງ ເຂດວຽກງານຄື: ການເມືອງ- ຄວາມໝັ້ນຄົງ, ເສດຖະກິດ, ວັດທະນະທໍາ - ສັງຄົມ ແລະ ການພົວພັນການທູດ. ການປະຕິບັດ ບັນດາສັນຍາຢ່າງເຂັ້ມງວດ ແລະ ຂໍ້ຕົກລົງຕ່າງໆ ເປັນການປະກອບສ່ວນສໍາຄັນເຂົ້າໃນການ ສ້າງປະຊາຄົມອາຊຽນ.
ສປປ ລາວ ລ້ວນແຕ່ກຽມ ພ້ອມທັງກາຍ ແລະ ໃຈ ຮ່ວມກັບປະຊາຊົນປະເທດສະມາຊິກອາ ຊຽນຊຸກຍູ້ຄວາມສາມັກຄີ, ເປັນເອກະພາບ ແລະ ປົກປັກຮັກສາບົດບາດເປັນແກນ ກາງຂອງ ອາຊຽນໃນພາກພື້ນ.
ຜົນສໍາເລັດທີ່ສໍາຄັນຂອງອາຊຽນ ໃນໄລຍະຜ່ານມາ, ສປປ ລາວ ກໍໄດ້ປະກອບສ່ວນສໍາຄັນເຂົ້າໃນຂະບວນວິວັດ ການສ້າງສາ ແລະ ພັດທະນາປະຊາຄົມອາຊຽນ ຊຶ່ງສະແດງອອກໃນດ້ານຕ່າງໆເຊັ່ນ: ຄວາມ ໝັ້ນຄົງດ້ານການເມືອງ ໄດ້ ປະສົບຜົນສໍາເລັດຫຼາຍປະ ການ ອັນພົ້ນເດັ່ນແມ່ນ ອາຊຽນ ໄດ້ກາຍເປັນພາກພື້ນທີ່ມີສັນ ຕິພາບ ແລະ ສະຖຽນລະພາບ ຊຶ່ງເປັນເງື່ອນໄຂຕົ້ນຕໍທີ່ເອື້ອ ອໍານວຍໃຫ້ແກ່ການຮ່ວມມື ເພື່ອການພັດທະນາເສດຖະກິດ-ສັງຄົມຂອງບັນດາປະເທດສະມາຊິກອາຊຽນ ແລະ ຂອງໂລກ ໂດຍລວມ. ຜົນສໍາເລັດດັ່ງກ່າວ ແມ່ນຍ້ອນການຮ່ວມມືກັນຂອງອາຊຽນ ແລະ ລະຫວ່າງ ອາຊຽນກັບບັນດາຄູ່ຮ່ວມມືພາຍນອກ ບົນພື້ນຖານຫຼັກການທີ່ກໍານົດໄວ້ໃນສົນທິສັນຍາໄມຕີຈິດ ແລະ ການຮ່ວມມືໃນອາຊຽນ, ກົດບັດອາຊຽນ ແລະ ເອກະສານອື່ນໆຂອງອາຊຽນ.
ໃນກອງປະຊຸມສຸດຍອດອາຊຽນ ຄັ້ງທີ 36 ດຳເນີນຢູ່ນະຄອນຫຼວງຮ່າໂນ້ຍ ປະເທດຫວຽດນາມ ເປັນເຈົ້າພາບ ຊຶ່ງເປັນຄັ້ງທຳອິດໃນກວ່າເຄິ່ງສະ ຕະວັດຜ່ານມາ, ກອງປະຊຸມສຸດຍອດອາຊຽນ ໄດ້ຈັດຕັ້ງທາງອອນລາຍ ຊຶ່ງໄດ້ສ່ອງແສງໃຫ້ເຫັນສະພາບຕົວຈິງກ່ຽວກັບບັນດາວິທີການເຄື່ອນໄຫວວຽກງານ ທີ່ພວມຖືກບັງຄັບໃຫ້ ມີການປ່ຽນແປງ, ບໍ່ພຽງແຕ່ ຍ້ອນການພັດທະນາຂອງວິທະ ຍາສາດເຕັກໂນໂລຊີເທົ່ານັ້ນ, ແຕ່ຫາກຍັງແມ່ນຍ້ອນສິ່ງທ້າທາຍທີ່ບໍ່ເຄີຍມີມາກ່ອນ ຍ້ອນເກີດໂຣກລະບາດໂຄວິດ-19 ໃນທົ່ວໂລກອີກດ້ວຍ.
ພາຍຫຼັງການສ້າງຕັ້ງປະ ຊາຄົມອາຊຽນ ມາເປັນເວລາ 5 ປີ, ອາຊຽນ ພວມຢືນຢູ່ຕໍ່ໜ້າ ກາລະໂອກາດ ແລະ ສິ່ງທ້າ ທາຍດ້ວຍຫຼາຍປັດໄຈທາງຍຸດ ທະສາດທົ່ວໂລກ ກໍຄືຜົນກະທົບ ຂອງໂຣກ ລະບາດ ໂຄວິດ-19. ເຖິງຢ່າງໃດກໍຕາມ, ທາດແທ້ ຂອງປະຊາຄົມອາຊຽນ ຍັງໄດ້ ສະແດງອອກໃຫ້ເຫັນຢ່າງຈະ ແຈ້ງ, ຄວາມສະໜິດຕິດພັນ ຂອງບັນດາສະມາຊິກ ໄດ້ສ້າງເປັນກຳລັງແຮງສັງລວມ ເພື່ອຜ່ານຜ່າສິ່ງທ້າທາຍໄດ້ຢ່າງໝັ້ນຄົງ. ປະຊາຄົມອາຊຽນໄດ້ມີການເຄື່ອນໄຫວ, ເປັນເຈົ້າການຮັບມື, ສະໜິດຕິດພັນກັບບັນ ດາປະເທດໄດ້ຢ່າງທັນການ.ລະບົບຮັບມືດ້ານການແພດສຸກເສີນຂອງອາຊຽນ ແລະ ການຮ່ວມມືກັບບັນດາຄູ່ຮ່ວມມືໄດ້ເລີ່ມເຄື່ອນໄຫວແຕ່ຫົວທີ ເມື່ອເກີດໂຣກລະບາດ. ບັນດາປະເທດອາຊຽນ ໄດ້ຕັ້ງໜ້າແບ່ງ ປັນຂໍ້ມູນຂ່າວສານ, ບົດຮຽນ, ສົມທົບກັນໃນການຄວບຄຸມ, ສະກັດກັ້ນໂຣກລະບາດ. ທົ່ວ ອາຊຽນ ໄດ້ໃຫ້ຄຳໝັ້ນສັນຍາດ້ານການເມືອງຢູ່ລະດັບສູງສຸດ, ມີວິທີການສຳຜັດຢ່າງຄົບຊຸດ, ສັງລວມ ຢູ່ລະດັບຊາດ ແລະ ພາກພື້ນ, ໄດ້ສະແດງໃຫ້ເຫັນທາດແທ້ທີ່ໝັ້ນຄົງຂອງກຸ່ມ ອາຊຽນ ສາມັກຄີ ແລະ ສະໜິດຕິດພັນ, ເຕັມໄປດ້ວຍນ້ຳໃຈຮັກແພງ, ຊ່ວຍເຫຼືອກັນ.
ກອງປະຊຸມສຸດຍອດອາຊຽນ ຄັ້ງທີ 36 ແມ່ນໂອກາດ ເພືຶ່ອໃຫ້ພວກເຮົາ ຢັ້ງຢືນອີກ ຄັ້ງໜຶ່ງ ກ່ຽວກັບນ້ຳໃຈສາມັກຄີ, ເຈດຈຳນົງດ້ານການເມືອງທີ່ເຂັ້ມແຂງ ແລະ ຄວາມຕັດສິນ ໃຈ ຢ່າງສູງ ຂອງ ບັນດາປະເທດສະມາຊິກອາຊຽນຜ່ານຜ່າບັນ ດາສິ່ງທ້າທາຍ, ກ້າວຂຶ້ນຢ່າງໝັ້ນຄົງ. ກອງປະຊຸມຄັ້ງນີ້, ບັນ ດາຜູ້ແທນໄດ້ແລກປ່ຽນກ່ຽວ ກັບແຜນການຟື້ນຟູສັງລວມ ຂອງອາຊຽນ ພາຍຫຼັງໂຣກລະ ບາດ, ສ້າງສາງແຮອຸປະກອນການແພດສຸກເສີນຂອງອາຊຽນ, ສ້າງຂັ້ນຕອນຮັບມືກັບ ໂຣກລະບາດໃຫ້ເປັນມາດຕະ ຖານຂອງອາຊຽນ ໃນກໍລະນີການແພດສຸກເສີນ.
ຖະແຫຼງການວິໄສທັດຂອງບັນດາການນຳອາຊຽນ ກ່ຽວກັບປະຊາຄົມອາຊຽນສະ ໜິດຕິດພັນ ແລະ ເປັນເຈົ້າການຮັບມື, ຜ່ານຜ່າສິ່ງທ້າທາຍ, ຊຸກຍູ້ການເຕີບໂຕ ແລະ ແມ່ນເຂັມຊີ້ທິດໃຫ້ແກ່ອາຊຽນ ມີຄວາມເຊື່ອໝັ້ນກ້າວເດີນໄປ.
ວັນທີ 4 ສິງຫາຜ່ານມາ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງ ປະເທດ ແຫ່ງ ສປປ ລາວ ໄດ້ເປັນປະທານໃນພິທີເອົາທຸງ ຊາດລາວ ແລະ ທຸງອາຊຽນ ຂຶ້ນສູ່ຍອດເສົາ ເນື່ອງໃນໂອກາດສະເຫຼີມສະຫຼອງຄົບຮອບ 53 ປີ ແຫ່ງການສ້າງຕັ້ງອາຊຽນ (8 ສິງຫາ 1967 - 8 ສິງຫາ 2020) ແລະ ຄົບຮອບ 23 ປີ ທີ່ ສປປ ລາວ ເຂົ້າເປັນສະມາຊິກອາຊຽນ (23 ກໍລະກົດ 1997- 23 ກໍລະກົດ 2020).
ທ່ານ ສະເຫຼີມໄຊ ກົມ ມະສິດ ໄດ້ກ່າວຢໍ້າເຖິງຜົນສຳ ເລັດຂອງອາຊຽນໃນໄລຍະ 53 ປີຜ່ານມາ ອັນໄດ້ປະກອບ ສ່ວນສຳຄັນເຂົ້າໃນການສ້າງ ສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ ໃນພາກພື້ນ ແລະ ໃນໂລກ. ຜົນສຳເລັດອັນໜຶ່ງ ແມ່ນອາຊຽນ ໃນນາມເປັນອົງການຈັດ ຕັ້ງພາກພື້ນລະຫວ່າງລັດຖະ ບານ ໄດ້ສືບຕໍ່ຮັດແໜ້ນການ ພົວພັນຮ່ວມມື ລະຫວ່າງ ປະ ເທດສະມາຊິກອາຊຽນດ້ວຍກັນ ກໍຄືກັບປະເທດຄູ່ຮ່ວມເຈລະຈາ ແລະ ຄູ່ຮ່ວມມືພາຍນອກອາຊຽນ ບົນພື້ນຖານຫຼັກການທີ່ກຳນົດໄວ້ໃນກົດບັດອາຊຽນ, ສົນທິສັນຍາໄມຕີຈິດ ແລະ ການຮ່ວມມື (TAC) ແລະ ບັນດາກົນໄກທີ່ອາຊຽນເປັນຜູ້ສ້າງຂຶ້ນ ຫຼັກການແຫ່ງການຢູ່ຮ່ວມກັນໂດຍສັນຕິ; ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ການບໍ່ແຊກແຊງເຂົ້າ ໃນວຽກງານພາຍໃນຂອງກັນ ແລະ ກັນ; ແກ້ໄຂບັນຫາໂດຍ ສັນຕິວິທີ, ຫຼັກການຄວາມເປັນເອກະສັນ, ຕ່າງຝ່າຍຕ່າງມີຜົນ ປະໂຫຍດ ແລະ ອີງໃສ່ຄວາມ ຫຼາກຫຼາຍຂອງປະເທດສະມາ ຊິກ ທີ່ເອີ້ນວ່າ “ວິຖີທາງຂອງອາຊຽນ” (ASEAN Way).
ທ່ານ ສະເຫຼີມໄຊ ກົມມະສິດ ໄດ້ກ່າວເຖິງຜົນສໍາເລັດຂອງກອງປະຊຸມສຸດຍອດອາຊຽນ ຄັ້ງທີ 36 ແລະ ກອງປະຊຸມ ກ່ຽວຂ້ອງຜ່ານມາ ພາຍໃຕ້ ການ ເປັນປະທານຂອງ ສສ ຫວຽດ ນາມ (ແບບທາງໄກ) ເຫັນວ່າໃນໄລຍະເກືອບໜຶ່ງປີຜ່ານມາ, ເຖິງວ່າສະພາບການພາກພື້ນ ແລະ ສາກົນ ກຳລັງປະເຊີນກັບໄພພິບັດທຳມະຊາດ ແລະ ການແຜ່ລະບາດຂອງພະຍາດ ໂຄວິດ-19 ອັນເປັນໄພຂົ່ມຂູ່ ແລະ ສົ່ງຜົນກະທົບໜັກໜ່ວງຕໍ່ສຸຂະພາບ, ການພັດທະນາເສດຖະກິດ-ສັງຄົມ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ຂອງໂລກ, ແຕ່ສະມາຊິກອາຊຽນ ແລະ ປະເທດຄູ່ຮ່ວມ ກໍຍັງສືບຕໍ່ມີຄວາມສາມັກຄີ ແລະ ສາມາດຈັດຕັ້ງປະຕິບັດບັນດາຂໍ້ລິເລີ່ມ, ມາດຕະການ ແລະ ແຜນງານ, ໂຄງການຮ່ວມມືໃນ 3 ເສົາຄ້ຳປະຊາຄົມອາຊຽນ ໄດ້ຮັບຜົນ ສຳເລັດເປັນກ້າວໆມາ; ໄດ້ສ້າງຕັ້ງກອງທຶນອາຊຽນ ເພື່ອຮັບມືກັບການແຜ່ລະບາດຂອງພະຍາດໂຄວິດ-19; ສ້າງຕັ້ງຄັງແຮອຸປະກອນການແພດສຸກເສີນອາຊຽນ; ການຮ່າງແຜນຟື້ນຟູເສດຖະກິດຮອບດ້ານ ຫຼັງໂຄວິດ-19 ສິ້ນສຸດ.
ນອກຈາກນີ້, ທ່ານ ສະ ເຫຼີມໄຊ ກົມມະສິດ ຍັງໄດ້ເນັ້ນຕື່ມອີກວ່າ: ຕະຫຼອດໄລ ຍະ 23 ປີ ທີ່ ສປປ ລາວເຮົາ ໄດ້ເຂົ້າເປັນສະມາຊິກອາຊຽນ. ສປປ ລາວ ໄດ້ເຂົ້າຮ່ວມຢ່າງຕັ້ງ ໜ້າ ແລະ ເປັນເຈົ້າການສູງ ໃນຂະບວນການລວມຂອງອາ ຊຽນ ອັນໄດ້ເຮັດໃຫ້ບົດບາດ ຂອງ ສປປ ລາວ ໃນພາກພື້ນ ແລະ ສາກົນນັບມື້ພົ້ນເດັ່ນ.
ທ່ານລັດຖະມົນຕີ ໄດ້ຢືນຢັນເຖິງຄວາມໝາຍໝັ້ນ ຂອງ ສປປ ລາວ ທີ່ຈະສືບຕໍ່ເຂົ້າຮ່ວມໃນຂະບວນການລວມຂອງອາຊຽນຢ່າງສະເໝີຕົ້ນສະເໝີປາຍ ເພື່ອສາມາດບັນລຸໄດ້ການສ້າງປະຊາຄົມອາຊຽນ ໃນປີ 2025.