ອົງຄະ​ນະ​ພັກ​ເມືອງ​ອຸ​ທຸມ​ພອນ ແຂວງ​ສະຫວັນ​ນະ​ເຂດ ໄດ້​ຈັດ​ກອງ​ປະຊຸມ​ເປີດ​ກວ້າງ​ຄັ້ງ​ທີ 1 ສະ​ໄໝ​ທີ 8 ຂຶ້ນໃນ​​ວັນ​ທີ 5 ສິງຫາ​ຜ່ານ​ມາ ທີ່​ສະໂມສອນ​ຫຼັງ​ໃໝ່ ໂດຍ​ການ​ເຂົ້າ​ຮ່ວມ​ຂອງ​ສະຫາຍ ທອງ​ທ່ຽງ ສີດາ​ວົງ ຄະນະ​ປະຈຳ​ພັກ​ແຂວງ ຫົວໜ້າ​ຄະນະ​ຈັດ​ຕັ້ງ​ແຂວງ, ສະຫາຍ ປະສົງ​ສິນ ຈະເລີນ​ສຸກ ກຳມະການ​ພັກ​ແຂວງ ເລຂາ​ພັກ​ເມືອງ ເຈົ້າເມືອງ​ອຸທຸມພອນ
   ສະຫາຍ ສີວິໄລ ສຸລິໂຍ ກຳມະການ​ພັກ​ເມືອງ ຫົວໜ້າ​ຫ້ອງ​ວ່າການ​ປົກຄອງ​ເມືອງ ກໍໄດ້​ສະຫຼຸບ​ສັງເກດ​ຕີ​ລາຄາ​ໃນ​ການ​ຊີ້​ນຳ​-​ນຳພາ​ຂອງ​ອົງຄະ​ນະ​ພັກ​ເມືອງ​ໄລຍະ​ຜ່ານ​ມາ ແລະ ວາງ​ທິດ​ທາງ​ແຜນການ 6 ເດືອນ​ທ້າຍ​ປີ 2020 ວ່າ: ເມືອງ​ພວກ​ເຮົາ​ຍັງ​ຮັກສາ​ໄດ້​ສະຖຽນ​ລະ​ພາບ​ທາງ​ດ້ານ​ການເມືອງ ມີ​ຄວາມ​ສະຫງົບ​ໂດຍ​ພື້ນ​ຖານ ລະບົບ​ເສດຖະກິດ​ຍັງ​ຂະຫຍາຍຕົວ​ຕໍ່​ເນື່ອງ.ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຍັງ​ຢູ່​ໃນ​ທ່ວງ​ທ່າ​ທີ່​ດີ​ຂຶ້ນ​ເປັນ​ກ້າວໆ ເສດຖະກິດ​ຂອງ​ເມືອງ​ຍັງ​ຢູ່​ໃນ​ລະດັບ​ທີ່​ໝັ້ນ​ທ່ຽງ​ໃນ​ອັດຕາ​ການ​ຂະຫຍາຍຕົວ 7,5% ຕໍ່​ປີ ລວມ​ຍອດ​ຜະລິດ​ຕະ​ພັນ​ພາຍ​ໃນ​ບັນລຸ​ 1.777 ຕື້​ກວ່າ​ກີບ. ສະເລ່ຍ​ລາຍ​ຮັບ 18 ລ້ານ  5 ແສນ​ກວ່າ​ກີບ ຫຼື 2.210 ໂດ​ລາ/ຄົນ/ປີ. ​ເຖິງ​ຢ່າງໃດ​ກໍ ຕາມບັນດາ​ອິດ​ທິ​ກຳ ລັງ​ປໍ​ລະ​ປັກ ຍັງ​ສືບຕໍ່​ດຳເນີນ​ນະໂຍບາຍ​ຫັນປ່ຽນ​ໂດຍ​ສັນ​ຕິພວກ​ກຸ່ມ​ຄົນ​ບໍ່​ດີ​ຍັງ​ສືບຕໍ່​ເຄື່ອນ​ໄຫວ​ມ້າງເພ​ແນວທາງ​ນະໂຍບາຍ​ຂອງ​ພັກ​-​ລັດ ດ້ວຍ​ຫຼາຍ​ຮູບ​ແບບຫຼາຍ​ວິທີ ບໍ່​ວ່າ​ຈະ​ເປັນໂຄສະນາ​ບິດ​ເບືອນ ໃສ່​ຮ້າຍ​ປ້າຍ​ສີ​ທາງ​ອິນ​ເຕີ​ເນັດ ແລະ ສື່​ສັງຄົມ​ອອນ​ລາຍ. ບາງ​ປະກົດ​ການ​ຫຍໍ້ທໍ້​ໃນ​ສັງຄົມ​ຍັງ​ບໍ່​ທັນ​ໄດ້​ຮັບ​ການ​ແກ້​ໄຂ​ໃຫ້​ໝົດ​ໄປ​ເຊັ່ນ: ບັນຫາ​ຢາ​ເສບ​ຕິດ, ຂີ້ລັກ​ງັດ​ແງະ, ການ​ປຸ້ນ​ຈີ້, ອຸບັດເຫດ​ຕາມ​ທ້ອງຖະ ໜົນ, ການ​ຖີ້ມ​ຂີ້ເຫຍື້ອຊະຊາຍ ຍັງ​ມີ​ລັກສະນະ​ເພີ່ມ​ຂຶ້ນ, ການ​ລະບາດ​ຂອງ​ພະຍາດ​ໂຄ​ວິດ-19, ການ​ແຜ່​ລະບາດ​ຂອງພະ ຍາດ​ຕາມ​ລະດູ​ການ​ກໍສົ່ງ​ຜົນ​ກະທົບ​ຕໍ່​ການ​ດຳລົງ​ຊີວິດ​ຂອງ​ປະຊາຊົນ ແລະ ບັນຫາ​ໄພແຫ້ງ ແລ້ງ. ທົ່ວ​ເມືອງ​ມີ​ເນື້ອທີ່​ປູກ ​ເຂົ້ານາ​ປີ​ທັງ​ໝົດ 17.605 ເຮັກຕາ ໃນ​ນີ້​ນາ​ດຳ 17.355 ເຮັກຕາ,  ນາ​ຢອດ 175 ເຮັກຕາ, ນາຫວ່ານ 75 ເຮັກຕາ.  ມາ​ຮອດ​ປັດຈຸ​ບັນ​ການ​ປັກ​ດຳ​ເຂົ້ານາປີ​ ປະຕິບັດ​ໄດ້​ພຽງ​ແຕ່ 2.950 ເຮັກຕາ ​ເທົ່າ​ນັ້ນ, ນາ​ຢອດ​ 250 ເຮັກຕາ, ນາຫວ່ານ 85 ເຮັກຕາ.
   ສະເພາະ​ການ​ຈັດ​ເກັບ​ ລາຍ​ຮັບ​ເພື່ອ​ມອບ​ເຂົ້າ​ງົບປະ ມານ​ມາ​ຮອດ​ປັດຈຸ​ບັນ​ທາງ​ເມືອງ​ປະຕິບັດ​ໄດ້​ພຽງ​ແຕ່ 2 ຕື້ 869 ກວ່າ​ລ້ານ​ກີບ ແຜນການ​ແມ່ນ 5 ຕື້ 435 ລ້ານ​ກີບ. ໃນນີ້​ ໄດ້​ຮັບ​ຈາກ​ວຽກ​ງານ​ສ່ວຍ​ສາ​ອາກອນ ແລະ ທີ່​ດິນ 2 ຕື້ 473 ລ້ານ​ກ່​ວາ​ກີບ ຮັບ​ຈາກ​ວຽກ​ງານ​ຊັບ​ສິນ​ລັດ 396 ລ້ານ​ກວ່າ​ກີບ ແລະ ວຽກ​ງານ​ດ້ານ​ອື່ນໆ​ກໍ​ໄດ້​ຮັບ​ການຈັດຕັ້ງ​ປະຕິບັດ​ເຊັ່ນ​ດຽວ​ກັນ​ ຄຽງ​ຄູ່​ກັບ​ຜົນສຳເລັດ​ດັ່ງກ່າວ​ພວກ​ເຮົາ​ຍັງ​ມີ​ຂໍ້ຄົງຄ້າງ​ຈຳນວນ​ບໍ່​ໜ້ອຍ​ທີ່​ຈະ​ຕ້ອງ​ໄດ້​ເອົາໃຈໃສ່​ແກ້​ໄຂ​ໃນຕໍ່ໜ້າບໍ່​ວ່າ​ຈະ​ເປັນ​ການ​ເກັບ​ລາຍ​ຮັບ​ເຂົ້າ​ງົບປະມານ​ພູດ​ຂອງ​ເມືອງ ຍັງ​ປະຕິບັດ​ບໍ່​ທັນ​ໄດ້​ດີ​ເທົ່າ​ທີ່​ຄວນ. ຖານ​ລາຍ​ຮັບ​ຍັງ​ບໍ່​ທັນ ​ຄົບ​ຖ້ວນ​ຈະ​ແຈ້ງ, ການ​ເກັບ​ລາຍ​ຮັບຄ່າ​ບໍລິການບາງ​ຂະ ແໜງການ​ຍັງ​ປະຕິບັດ​ຕາມ​ລະບຽບ​ການ​ຈົດ​ຮັບ​-​ຈົດ​ຈ່າຍ​ບໍ່​ທັນ​ໄດ້, ການ​ຄຸ້ມ​ຄອງ​ສິນຄ້າ​ນຳ​ເຂົ້າ​ແບບຜິດ​ກົດ​ໝາຍ, ການ​ຄຸ້ມ​ຄອງ​ລາຄາ, ການ​ຄຸ້ມ​ຄອງ​ສິນຄ້າ​ໝົດ​ອາຍຸຍັງ​ບໍ່​ສາມາດ​ສະກັດ​ກັ້ນ​ໄດ້​ໝົດ, ການ​ຄຸ້ມ​ຄອງ ແລະ ການໃຫ້​ເຊົ່າ​ທີ່​ດິນ ເພື່ອ​ປູກ​ພຶ​ດ​ອຸດສາຫະກຳ​ລະ​ຫວ່າງ​​ປະຊາຊົນ ກັບ​ບໍລິສັດຜູ້​ ລົງ​ທຶນຍັງ​ບໍ່​ສອດຄ່ອງ​ຕາມ​ກົດໝາຍ, ລະບຽບ​ການ ແລະ ບັນຫາ​ອື່ນໆ. ພ້ອມ​ທັງ​ຜ່ານ​ທິດ​ທາງ​ແຜນການ​ຈຸດ​ສຸມ​ທ້າຍ​ປີ 2020 ຕື່ມ​ອີກ.
(ຂ່າວ: ບຸນ​ຊູ ພົມ​ມະ​ເທບ)