ໜັງສືພິມ ປະຊາຊົນ

ຫວຽດນາມ ມີຄວາມສາມາດພັດທະນາຂະແໜງ ເຕັກໂນໂລຊີ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 11/08/2020 09:05:29 ຈຳນວນຢ້ຽມຊົມ 363 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: HCL ພວມຊຸກຍູ້ແຜນການລົງທຶນໃຫຍ່ທີ່ມີມູນຄ່ານັບຮ້ອຍລ້ານໂດລາ ເຂົ້າຫວຽດນາມ, ພິເສດແມ່ນໃນຂົງເຂດຊ໊ອບແວ ແລະ ການບໍລິການ. ກຸ່ມບໍລິສັດ ພວມມຸ່ງໄປສູ່ເປົ້າໝາຍສ້າງສູນກາງຢູ່ຫວຽດນາມ ແລະ ຈະແມ່ນໜຶ່ງ ໃນບັນດາສູນໃຫຍ່ທີ່ສຸດຂອງ HCL ຢູ່ອາຊີຕາເວັນອອກສ່ຽງໃຕ້.
ທ່ານ ຊານໃຈ ກູບຕາ ຮອງປະທານຜູ້ຮັບຜິດຊອບການດໍາເນີນທຸລະກິດຂອງກຸ່ມບໍລິສັດ HCL Technologies ອິນເດຍ ໃຫ້ຮູ້ວ່າ: ຫວຽດນາມ ມີຄວາມສາມາດບົ່ມຊ້ອນ ພັດທະນາຢ່າງໃຫຍ່ຫຼວງ ໃນຂະແໜງເຕັກໂນໂລຊີຂໍ້ມູນຂ່າວສານ, ຍ້ອນມີແຫຼ່ງຊັບພະຍາກອນມະນຸດໜຸ່ມ ແລະ ສະພາບແວດລ້ອມ ແຫ່ງການລົງທຶນທີ່ດຶງດູດໃຈ, ກາຍເປັນໜຶ່ງໃນບັນດາຈຸດນັດພົບຂອງການລົງທຶນທີ່ພົ້ນເດັ່ນທີ່ສຸດ ໃນພາກພື້ນສຳລັບບັນ ຫາວິສາຫະກິດອິນເດຍ.
ທ່ານ ຊານໃຈ ກູບຕາ ໄດ້ໃຫ້ທັດສະນະດັ່ງກ່າວ, ໃນເວລາເຂົ້າຮ່ວມກອງປະຊຸມສຳມະນາທາງອອນລາຍ ທີ່ມີຫົວຂໍ້ວ່າ; “ບັນດານະໂຍບາຍເສດຖະກິດມະຫາພາກຫຼັກແຫຼ່ງຂອງລັດ ຖະບານຫວຽດນາມ ໃນການ ຮັບມືກັບໂຣກລະບາດ ແລະ ບາງຂະແໜງທີ່ມີຄວາມສາ ມາດ ບົ່ມຊ້ອນໃຫ້ແກ່ນັກ ລົງທຶນ ໄລຍະ ຍາວ”, ໂດຍສະຖານ ທູດຫວຽດນາມ ປະຈຳ ອິນເດຍ ຈັດຕັ້ງໃນວັນທີ 7 ສິງຫາຜ່ານມາ. ກອງປະຊຸມມີການເຂົ້າຮ່ວມຂອງວິສາຫະກິດປະມານ 100 ແຫ່ງ, ນັກລົງທຶນ, ນັກຊ່ຽວຊານ, ນັກຮຽນຮູ້ທີ່ມີອິດທິພົນຊື່ສຽງ ຂອງ ຫວຽດນາມ ແລະ ອິນເດຍ.
ທ່ານ ກູບຕາ ໃຫ້ຮູ້ຕື່ມວ່າ: HCL ພວມຊຸກຍູ້ແຜນການລົງທຶນໃຫຍ່ທີ່ມີມູນຄ່ານັບຮ້ອຍລ້ານໂດລາ ເຂົ້າຫວຽດນາມ, ພິເສດແມ່ນໃນຂົງເຂດຊ໊ອບແວ ແລະ ການບໍລິການ. ກຸ່ມບໍລິສັດພວມມຸ່ງໄປສູ່ເປົ້າໝາຍສ້າງ ສູນກາງຢູ່ຫວຽດນາມ ແລະ ຈະແມ່ນໜຶ່ງໃນບັນດາສູນໃຫຍ່ທີ່ສຸດຂອງ HCL ຢູ່ອາຊີຕາເວັນ ອອກ ສ່ຽງໃຕ້. ປັດຈຸບັນ, HCL ແມ່ນບໍລິສັດ ເຕັກໂນໂລຊີຂໍ້ມູນຂ່າວສານໃຫຍ່ທີ 3 ຂອງ ອິນເດຍ ທີ່ດໍາເນີນທຸລະກິດຢູ່ 47 ປະເທດໃນທົ່ວໂລກ.