ໜັງສືພິມ ປະຊາຊົນ

ບັນດາປະເທດໃຫ້ສັນຍາໜູນຊ່ວຍ ລີບັງ 300 ລ້ານໂດລາ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 12/08/2020 09:03:24 ຈຳນວນຢ້ຽມຊົມ 298 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ບັນດາປະເທດ ໄດ້ໃຫ້ຄຳໝັ້ນສັນຍາໜູນຊ່ວຍເງິນ ປະມານ 300 ລ້ານໂດລາ ໃຫ້ແກ່ລີບັງ ເພື່ອແກ້ໄຂຜົນຮ້າຍ ຢ້ອນຫຼັງ ຈາກເຫດລະເບີດ ທີ່ຜ່ານມາ ຢູ່ນະຄອນຫຼວງເບຣຸດ.
ຂ່າວລະບຸວ່າ: ໃນກອງປະຊຸມສາກົນເພື່ອຊ່ວຍເຫຼືອ ລີບັງ ທາງອອນລາຍ, ວັນທີ 9 ສິງຫາ ຜ່ານມາ ໂດຍ ຝຣັ່ງ ແລະ ສະຫະປະຊາຊາດ ສົມທົບກັນ ຈັດຕັ້ງຂຶ້ນ. ກອງປະຊຸມໄດ້ສະ ເໜີ ບ້ວງ ເງິນໜູນຊ່ວຍລີບັງ ປະມານ 300 ລ້ານໂດລາ ເພື່ອແນໃສ່ຊ່ວຍເຫຼືອຊາວລີບັງ ແກ້ໄຂຜົນຮ້າຍ ຢ້ອນ ຫຼັງຈາກເຫດລະເບີດທີ່ຜ່ານມາ.
ໃນກອງປະຊຸມ, ທ່ານ ນາງ ອາມີນາ ໂມຣາເມດ ຮອງເລຂາ ທິການໃຫຍ່ປະຈຳອົງການສະ ຫະປະຊາຊາດ ກ່າວວ່າ: ປະຊາຄົມໂລກ ຄວນອອກແຮງຢ່າງຕັ້ງໜ້າຊ່ວຍເຫຼືອ ລີບັງ ຟື້ນຟູຈາກເຫດການລະເບີດແຕກ. ທ່ານ ນາງ ອາມີນາ ໂມຣາເມດ ກ່າວຕື່ມວ່າ: ອົງການສະຫະປະຊາຊາດ ຈະເຮັດສຸດຄວາມສາມາດຂອງຕົນ ເພື່ອຊ່ວຍເຫຼືອປະຊາຊົນລີບັງ.
ໃນຂະນະນັ້ນ, ກອງທຶນ ເງິນຕາສາກົນ (IMF) ກໍກຽມ ພ້ອມທີ່ຈະເພີ່ມຄວາມພະຍາ ຍາມທົບ 2 ເທົ່າ ເພື່ອຊ່ວຍເຫຼືອ ລີບັງ ດ້ວຍເງື່ອນໄຂທີ່ວ່າ ບັນດາກຳລັງການເມືອງພາຍໃນປະ ເທດ ຕ້ອງສາມັກຄີກັນ, ປະຕິບັດບັນດາການປະຕິຮູບທີ່ ຈຳເປັນ, ຄວບຄຸມການຖອນ ແລະ ໂອນທຶນອອກ ຈາກປະເທດຊາດ.