ປະກາດແຕ່ງຕັ້ງ ທ່ານ ບຸນເຫຼືອ ສິນໄຊວໍຣະວົງ ປະທານສະຫະພັນກິລາດອກປີກໄກ່ແຫ່ງຊາດລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 18/08/2020 09:55:34 ຈຳ​ນວນ​​ຢ້ຽມ​ຊົມ 1430 ຄັ້ງ

   ພິທີ​ປະກາດ​ການ​ປັບປຸງ​ກົງຈັກ​ການຈັດຕັ້ງ ຄະນະ​ບໍລິຫານ​ງານ​ສະຫະພັນ​ກິລາ​ດອກ​ປີກ​ໄກ່​ແຫ່ງ​ຊາດ​ລາວ​ຊຸດ​ໃໝ່​ໄດ້​ຈັດ​ຂຶ້ນ​ໃນ​ວັນ​ທີ 14 ສິງຫາຜ່ານ​ມາ ທີ່ນະຄອນຫຼວງ​ວຽງ​ຈັນ ໂດຍ​ມີ​ທ່ານນາງ ແສງເດືອນ ຫຼ້າ​ຈັນທະ​ບູນ ລັດຖະມົນຕີກະຊວງ ສຶກສາ​ທິ​ການ ແລະ ກິລາ​ປະທານ ​ຄະນະ​ກຳມະການ​ໂອ​ແລ​ມ​ປີກແຫ່ງ​ ຊາດ​ລາວ ພ້ອມ​ດ້ວຍຄະນະ ບໍລິຫານ ​ງານ​ສະຫະພັນ​ກິລາ​ດອກປີກໄກ່​  ແຫ່ງ​ຊາດ​ລາວ ແລະ  ພາກ​ສ່ວນ​ກ່ຽວ ຂ້ອງ​ເຂົ້າ​ຮ່ວມ.
   ອີງ​ຕາມ​ກົດໝາຍ​ວ່າ​ດ້ວຍ​ກິ​ລາ​-​ກາຍຍະກຳ(ສະບັບ​ປຸງ) ສະບັບ​ເລກ​ທີ 74/ສພຊ, ລົງວັນທີ 25 ພະຈິກ 2019; ອີງ​ຕາມດຳລັດ​ຂອງ​ ນາຍົກລັດຖະມົນຕີ ວ່າ​ດ້ວຍ​ການ ຈັດຕັ້ງ ແລະ ການເຄື່ອນໄຫວ​ຂອງ​ກະຊວງ ສຶກສາ​ທິ​ການ ແລະ ກິລາ ສະບັບ​ເລກ​ທີ 253/ນຍ, ລົງ​ວັນ​ທີ 26 ພຶດສະພາ 2020 ອີງ​ຕາມ​ໜັງສື​ສະເໜີ​ຂອງ​ສະຫະພັນ​ກິລາ​ດອກ​ປີກ​ໄກ່​ແຫ່ງ​ຊາດ​ລາວ ​ສະບັບ​ລົງ​ວັນທີ 7 ມິຖຸນາ 2020  ລັດຖະມົນຕີ​ກະຊວງ ສຶກສາ​ທິ​ການ ແລະ ກິລາ ຕົກລົງຮັບ ຮອງ​ເອົາ​ການ​ປັບປຸງ​ກົງຈັກ​ການຈັດ ຕັ້ງຄະນະ​ບໍລິຫານ​ງານ ສະຫະພັນ​ກິລາ​ດອກ​ປີກ​ໄກ່​ ແຫ່ງ​ຊາດ​ລາວ​ຊຸດ​ໃໝ່ (2020-2024) ດັ່ງ​ລຸ່ມ​ນີ້: ແຕ່ງຕັ້ງ ຄະນະ​ທີ່ປຶກສາ 4 ທ່ານ ແລະ ຄະນະ​ບໍລິຫານ​ງານ​ສະຫະພັນ​ກິລາ​ດອກ ​ປີກ​ໄກ່​ແຫ່ງ​ຊາດ​ລາວ 19 ທ່ານ ໂດຍ​ແມ່ນ​ທ່ານ ບຸນ​ເຫຼືອ ສິນ​ໄຊ​ວໍ​ຣະ​ວົງ ເປັນ​ປະທານ​ສະຫະພັນ​ກິລາ​ດອກປີກໄກ່​ແຫ່ງ​ຊາດ​ລາວ ຊຸດ​ໃໝ່ (2020-2024).
   ທ່ານ ບຸນ​ເຫຼືອ ສິນ​ໄຊ​ວໍ​ຣະວົງ ກ່າວ​ວ່າ: ຄະນະ​ຊຸດ​ໃໝ່​ຈະ​ສືບ​ຕໍ່ພັດ ທະນາ​ກິລາ​ດອກ​ປີກ​ໄກ່​ລາວໃຫ້​ມີ​ ຄວາມ​ເຂັ້ມແຂງ,ມີ​ຄຸນ​ນະ​ພາບສູງ, ເຊື່ອມ​ໂຍງ ແລະ ທຽບ​ເທົ່າ​ກັບ​ພາກ​ພື້ນ​ສາກົນ ແລະ ເປັນ​ກິລາ​ເພື່ອ​ຄົນ​ທຸກ​ເພດທຸກ​ໄວ ພາຍ​ໃຕ້​ຄຳ​ຂວັນ” ເຂັ້ມແຂງມີ​ຄຸນ​ນະ​ພາບ ເຊື່ອມໂຍງ ແລະ ເປັນ​ນັກ​ກິລາ​ເພື່ອ​ທຸກ​ຄົນ”  ເພື່ອ​ບັນລຸ​ວິໄສ​ທັດ​ຂ້າງ​ເທິງນັ້ນ, ຄະນະ ຈະ​ໄດ້​ສຸມ​ໃສ່​ທຸກ​ຄວາມ​ພະຍາຍາມ​ເອົາໃຈໃສ່​ພັດທະນາ ແລະ ປັບປຸງ​ກິລາ​ດອກ​ປີກ​ໄກ່​ໃຫ້​ເຂັ້ມແຂງ ແລະ ເປັນ​ຂະບວນ​ການກິລາ ​ທີ່​ຟົດຟື້ນ​ໃນ​ສັງຄົມ​ ໂດຍ​ມີ​ບຸລິ​ມະ​ສິດ​ຕົ້ນຕໍ​ດັ່ງນີ້: ສືບ​ຕໍ່​ພັດທະນາ​ນັກ​ກິລາ​ຮຸ່ນ​ເຍົາວະ​ຊົນ ແລະ ຊາວ​ໜຸ່ມ​ໃຫ້​ມີ​ຄວາມ​ເຂັ້ມ ແຂງກ້າວ​ເຂົ້າ​ສູ່​ລະດັບ​ທີ​ມ​ຊາດ, ສືບ​ຕໍ່​ພັດທະນາ​ນັກ​ກິລາ​ດອກ​ປີກ​ໄກ່​ລາວ​ໃຫ້​ມີ​ສີມື​ດີ ແລະ ມີ​ຄຸນ​ນະ​ພາບ​ສູງ​ໃຫ້​ສາມາດ​ເຂົ້າ​ຮ່ວມ​ແຂ່ງ​ຂັນ​ໄດ້​ໃນ​ພາກ​ພື້ນ ແລະ ສາກົນ,ຍົກ​ສູງ​ການ​ພົວພັນ​ຮ່ວມ​ມື​ກັບ​ສະຫະພັນ​ກິລາ​ດອກປີກ​ ໄກ່ ໃນ​ລະດັບ​ພາກ​ພື້ນ ແລະ ສາ ກົນ,ຊຸກຍູ້​ບັນດາ​ສະໂມສອນດອກ​ປີກ​ໄກ່ ຂັ້ນ​ສູນ​ກາງ ແລະ ທ້ອງຖິ່ນ​ໃຫ້​ມີ​ການ​ແຂ່ງຂັນ​ຢ່າງ​ເປັນ​ປົກກະຕິ ແລະ ສືບ​ຕໍ່​ເປັນ​ເສນາ​ທິ​ການ​ໃຫ້​ແກ່ ກະຊວງ ສຶກສາ​ທິ​ການ ແລະ ກິລາ​ໃນ ​ການຈັດຕັ້ງ​ຜັນ​ຂະຫຍາຍ​ວິໄສທັດ ແລະ ແຜນການ​ດ້ານ​ກິລາ ໂດຍ​ສະ ເພາະ​ການ​ພັດທະນາ​ນັກ​ກິລາ​ດອກ​ປີກ​ໄກ່​ໃຫ້​ມີ​ຄຸນ​ນະ​ພາບ​ຢ່າງ​ແທ້​ຈິງ.   (ຂ່າວ: ຕຸ​ໄລເພັດ ພິມ​ເມືອງ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110