ທີມຄຸ້ມບ້ານໃຫຍ່ຄອງຂັນເຕະບານ ທົ່ວເມືອງໄຊຍະບູລີ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/09/2020 15:51:08 ຈຳ​ນວນ​​ຢ້ຽມ​ຊົມ 1132 ຄັ້ງ

ເມື່ອ​ບໍ່​ດົນ​ຜ່ານ​ມາ​ທີ່​ເດີ່ນ​ກິລາ​ບານເຕະ​ພອນ​ໄພລິນ ເມືອງ​ໄຊ​ຍະ​ບູ​ລີ ແຂວງ​ໄຊ​ຍະ​ບູ​ລີ ໄດ້​ມີ​ພິທີ​ປິດ ແລະ ມອບ​ຂັນ​ລາງວັນ​ການ​ແຂ່ງຂັນ​ກິລາ​ເຕະບານ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ຄໍາ​ຜາຍ ແກ້ວ​ບົວ ຮອງ​ເລຂາ​ພັກ​ເມືອງ​ໄຊ​ຍະ​ບູ​ລີ, ພ້ອມ​ດ້ວຍ​ການ​ນຳ​ເມືອງ ແລະ ນັກ​ກິລາ​ເຂົ້າ​ຮ່ວມ.
ການ​ຈັດການ​ແຂ່ງຂັນ​ກິລາ​ເຕະບານ​ໃນ​ຄັ້ງ​ນີ້​ປະກອບ​ມີ 9 ທີມ​ຄື: ທີມ​ຂົງເຂດ​ການເມືອງ, ທີມ​ຂົງເຂດ​ເສດຖະກິດ, ທີມ​ຂົງເຂດ​ວັດ​ທະ​ນະ​ທໍາ-​ສັງຄົມ, ທີມ ປກຊ-ປກສ, ທີມ​ຂົງເຂດ​ຕຸລາການ, ທີມ​ຄຸ້ມ​ບ້ານ​ສີ​ເມືອງ, ທີມ​ຄຸ້ມ​ບ້ານ​ນາ​ຍາວ, ທີມ​ຄຸ້ມ​ບ້ານ​ໃຫຍ່ ແລະ ທີມ​ຄຸ້ມ​ບ້ານ​ນາ​ຕໍ​ນ້ອຍ. ໄດ້​ແບ່ງ​ອອກ​ເປັນ 2 ສາຍ​ຄື: ສາຍA ແລະ ສາຍB ການ​ແຂ່ງຂັນ​ແມ່ນ​ພົບ​ກັນ​ໝົດ​ພາຍ​ໃນ​ສາຍ ແລະ ເອົາ​ທີ 1 ແລະ ທີ 2 ຂອງ​ສາຍ​ເຂົ້າ​ຫຼິ້ນ​ຮອບ​ຕໍ່​ໄປ, ຜ່ານ​ການ​ແຂ່ງຂັນ​ປະກົດ​ວ່າ​ທີ I ທີ​ມ​ຄຸ້ມ​ບ້ານ​ໃຫຍ່ ໄດ້​ຮັບ​ຂັນ 1 ໜ່ວຍ, ເງິນ​ລາງວັນ 2 ລ້ານ​ກີບ, ທີ II ທີ​ມ​ກຸ່ມ​ວັດ​ທະ​ນະ​ທໍາ-​ສັງຄົມ ໄດ້​ຮັບ​ເງິນ​ລາງວັນ 1ລ້ານ 5 ແສນກີບ, ທີ III ທີ​ມ​ຄຸ້ມ​ບ້ານ​ສີ​ເມືອງ ໄດ້​ຮັບ​ເງິນສົດ 1 ລ້ານ​ກີບ ແລະ ລາງວັນ​ຊົມເຊີຍ​ທີມ​ລະ 2ແສນ​ກີບ.
ຈຸດປະສົງ​ແມ່ນ​ເພື່ອ​ເປັນ​ການ​ສ້າງ​ຂະບວນ​ການ​ຕ້ອນຮັບ​ວັນ​ສຳຄັນ​ຕ່າງໆ ທັງ​ເປັນ​ການ​ຜູກ​ແໜ້ນ​ຄວາມ​ສາມັກຄີ​ລະຫວ່າງ​ຫ້ອງການ​ກັບ​ຫ້ອງການ, ກົມ​ກອງ, ພະນັກງານ ແລະ ອົງການ​ປົກຄອງ​ບ້ານ​ຄຸ້ມ​ຕ່າງໆ​ພາຍ​ໃນ​ເມືອງ, ທັງ​ເປັນ​ການ​ອອກ​ກໍາ​ລັງ​ກາຍ​ເຮັດ​ໃຫ້​ສຸຂະພາບ​ແຂງແຮງ​ດັ່ງ​ຄໍາ​ເວົ້າ​ທີ່​ວ່າ ກິລາ​ສ້າງ​ຄົນ, ຄົນ​ສ້າງ​ຊາດ ພ້ອມ​ນັ້ນ ຍັງ​ໄດ້​ແຂ່ງຂັນ​ກິລາ​ມິດຕະພາບ​ລະຫວ່າງ​ການ​ນໍາ​ຂອງ​ແຂວງ, ເມືອງ​ກັບ​ນັກທຸລະກິດ​ຕື່ມ​ອີກ.
(ຂ່າວ​-​ພາບ: ອໍາ​ມາລາ ໄຊ​ຍະ​ທັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110