ສຳເລັດກອງປະຊຸມໃຫຍ່ຜູ້ແທນພະສົງທົ່ວເມືອງຫົງສາ ຄັ້ງທີ V

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/09/2020 16:07:09 ຈຳ​ນວນ​​ຢ້ຽມ​ຊົມ 1581 ຄັ້ງ

ກອງ​ປະຊຸມ​ໃຫຍ່​ຜູ້​ແທນ​ພະສົງ ທົ່ວ​ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ຄັ້ງ​ທີ V ໄດ້​ສໍາ​ເລັດ​ລົງ ຢ່າງ​ເປັນ​ທາງ​ການ ເມື່ອບໍ່​ດົນຜ່ານ​ມານີ້ ທີ່​ຫໍ​ປະຊຸມຂອງ ​ເມືອງ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ພະ​ອາຈານ ບຸນ​ທຽນ ພຸດ​ທະ​ວະ​ໂຣ ຄະນະ​ກຳມະການ​ສູນ​ກາງ ອພສ ເຈົ້າ​ຄະນະ​ແຂວງ​ໄຊ​ຍະ​ບູ​ລີ ມີ​ແຂກ​ຖືກ​ເຊີນ​ເຂົ້າ​ຮວ່ມ.
ກອງ​ປະຊຸມ​ຄັ້ງ​ນີ້ ໄດ້​ຄົ້ນຄວ້າ ປະຊາ​ມະຕິ​ຮັບຮອງ​ເອົາ​ຄະນະ​ກຳມະການ ອພສ ເມືອງ​ຫົງ​ສາ ຈຳນວນ​ທັງ​ໝົດ 11 ອົງ, ຮັບຮອງ​ເອົາ​ຄະນະ​ປະຈຳ ອພສ ເມືອງ 7 ອົງ, ຮັບຮອງ​ເອົາ ພະ​ອາຈານ ສົມ​ພອນ ຄໍາ​ຈະເລີນ ເປັນ​ເຈົ້າ​ຄະນະ​ເມືອງ ແລະ ແຕ່ງຕັ້ງ​ຮອງ​ເຈົ້າ​ຄະນະ​ເມືອງ 4 ອົງ, ຮັບຮອງ​ເອົາ​ຫົວໜ້າ - ຮອງ​ຫົວໜ້າ​ຫ້ອງການ​ບໍລິຫານ, ຫົວໜ້າ-ຮອງ​ຫົວ​ໜ້າ​ກໍາ​ມາ​ທິ​ການ​ຕ່າງໆ​ຄົບ​ຊຸດ. ນອກ​ນັ້ນ, ຍັງ​ໄດ້​ມອບ​ໃບ​ກຽດ​ຕິ​ຄຸນ​ໃຫ້​ຄະນະ ອພສ ເມືອງ​ຊຸດ​ເກົ່າ, ມອບ​ໃບ​ກຽດ​ຕິ​ຄຸນ​ໃຫ້ ພາກສ່ວນ​ຕ່າງໆ​ທີ່​ມີ​ຜົນງານ​ປະກອບສ່ວນ​ຕໍ່​ວຽກ​ງານ ອພສ ເມືອງ​ໃນ​ໄລຍະ​ຜ່ານ​ມາ.
ໃນ​ໂອກາດ​ນີ້​ທ່ານ ຄໍາ​ຫຼ້າ ຜິວ​ວັນນາ ເຈົ້າເມືອງຫົງ​ສາ ໄດ້​ໃຫ້​ກຽດ​ມີ​ຄຳ​ເຫັນ​ໂອ້​ລົມ ຊຶ່ງ​ທ່ານ​ກໍໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່ ຄະນະ ອພສ ເມືອງ ຊຸດ​ເກົ່າ ທີ່​ຍາດ​ຜົນງານ​ມາ​ໄດ້​ໃນ​ໄລຍະ​ຜ່ານ​ມາ, ພ້ອມ​ທັງ​ຊີ້​ນໍາ​ຕໍ່​ຄະນະ​ຊຸດ​ໃໝ່ ຈົ່ງ​ພ້ອມ​ກັນ​ເອົາໃຈໃສ່ສືບຕໍ່ຕັ້ງໜ້າປະ ຕິບັດ​ໜ້າທີ່​ວຽກ​ງານ​ທີ່​ຍັງ​ຄົງ​ຄ້າງ, ສ້າງ​ແຜນ​ວຽກ, ແຜນ​ງານ ໃນ​ການ​ຊີ້​ນໍາໆ​ພາ ອົງການ​ພຸດ​ທະ​ສາ​ສະ​ໜາ​ສໍາ​ພັນ​ລາວ​ເມືອງ​ຫົງ​ສາ ໃຫ້​ມີ​ບາດກ້າວ​ອັນ​ໃໝ່ ໃຫ້​ສອດຄ່ອງ​ກັບ​ລະ ບຽບ​ກົດໝາຍ ແລະ ທຳ​ມະນູນ​ສົງ. ກອງ​ປະຊຸມ​ຄັ້ງ​ນີ້ ຍັງ​ໄດ້​ຮັບ​ຟັງ​ຄໍາ​ໂອວາດ​ຈາກ ພະ​ອາຈານ ບຸນ​ທຽນ ພຸດ​ທະ​ວະ​ໂຣ ຊຶ່ງ​ພະ​ອາຈານ​ໄດ້​ມີ​ຄໍາ​ໂອວາດ​ວ່າ: ໃນ​ການ​ສຶກສາ​ອົບຮົມ​ເຕົ້າໂຮມ​ຄວາມ​ສາມັກຄີ​ກັນ​ໃຫ້​ເປັນ​ປຶກ​ແຜ່ນແໜ້ນໜາ ທາງ​ຝ່າຍ​ສົງ ແລະ ຝ່າຍ​ນອກ, ພ້ອມ​ກັນ​ຜັນ​ຂະຫຍາຍ​ມະຕິ​ກອງ​ປະຊຸມ​ຄັ້ງ​ນີ້ ລົງ​ສູ່​ວັດ​ຕ່າງໆ​ໃນ​ທົ່ວ​ເມືອງ​ໃຫ້​ປະກົດ​ຜົນ​ເປັນ​ຈິງ.
(ຂ່າວ: ບຸນ​ປອນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110