ເປີດບໍລິການຢ່າງເປັນທາງການສວນອາຫານວັງລາວ ດາວຄໍາແຫຼ່ງທ່ອງທ່ຽວໃນຕົວເມືອງ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/09/2020 17:18:11 ຈຳ​ນວນ​​ຢ້ຽມ​ຊົມ 1148 ຄັ້ງ

ທ່ານ ຂັນທອງ ສີຊະນະດີ ປະທານກຸ່ມໂຮງແຮມພັດທະຄານດາວຄຳໃຫ້ຮູ້ວ່າ: ສະຖານທີ່ທ່ອງທ່ຽວແຫ່ງນີ້ ມີເນື້ອທີ່ທັງໝົດ 36 ໄລ່ ໄດ້ເລີ່ມສ້າງມາແຕ່ປີ 2017 ເປັນຕົ້ນມາ ປະກອບດ້ວຍວິວທໍາມະຊາດ, ບ້ານນາ ໃຈກາງຕົວເມືອງ, ຢູ່ບ້ານເມືອງນ້ອຍ, ເມືອງໄຊເຊດຖາ ນະຄອນຫຼວງວຽງຈັນ. ຈຸດປະສົງຂອງການສ້າງສວນດັ່ງກ່າວແມ່ນເພື່ອໃຫ້ມີບ່ອນພັກຜ່ອນ ເນັ້ນການບໍລິການຫຼາຍຮູບແບບ ເພື່ອຮອງຮັບແຂກພາຍໃນ ແລະ ຕ່າງປະເທດ. ສໍາລັບອາຫານແມ່ນລົດຊາດແບບລາວແທ້ໆ,ເນັ້ນບັນຍາກາດທີ່ປອດໂປ່ງ ອາກາດຮົ່ມເຢັນ ແລະ ຈັດສັນໃຫ້ມີຄວາມເປັນລະບຽບຮຽບຮ້ອຍສະອາດຈົບງາມ ພ້ອມທັງມີຫຼາຍກິດຈະກຳທີ່ສ່ອງແສງໃຫ້ເຫັນເຖິງວັດທະນະທຳ ຮີດຄອງປະເພນີອັນດີງາມຂອງຊາດ.
ພາຍໃນສວນຈະມີການສະແດງສິລະປະທຸກໆຄໍ່າຄືນເຊັ່ນ: ແບບຟ້ອນພື້ນເມືອງລາວ, ຂັບລໍາແຕ່ລະພາກ, ແຕ່ລະຊົນເຜົ່າ, ແຕ່ລະແຂວງແບບພື້ນບ້ານພ້ອມທັງມີຫຼາຍກິດຈະກຳທີ່ສ່ອງແສງໃຫ້ເຫັນເຖິງວັດທະນະທຳ ຮີດຄອງປະເພນີຂອງຊາດລາວ, ຢູ່ເດີ່ນໃຈກາງສວນຈະມີການສະແດງສິລະປະຂອງແຕ່ລະຊົນເຜົ່າ ເສບດົນຕີພື້ນເມືອງລາວ ແລະ ອື່ນໆ ພ້ອມດຽວກັນນັ້ນໃນສວນອາຫານຍັງມີຕູບໃຫ້ບໍລິການຫຼາຍກວ່າ 70 ຕູບ, ມີອາຫານລາວ, ອາຫານຕາມສັ່ງ ແລະ ເຄື່ອງດື່ມໄວ້ໃຫ້ບໍລິການ ລວມທັງມີທີ່ພັກທີ່ສະອາດຈົບງາມ ແລະ ມີມູມສໍາລັບຖ່າຍຮູບງາມໆ ສະແດງໃຫ້ເຫັນເຖິງທັດສະນີຍະພາບຂອງສວນໃນຫຼາຍໆມູມ ແລະ ໃນຕໍ່ໜ້າທາງສວນກໍຈະພັດທະນາໄປເລື້ອຍໆ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ພ້ອມທັງເອົາໃຈໃສ່ໃນການສ້າງຄວາມເພິ່ງພໍໃຈແກ່ຜູ້ມາໃຊ້ບໍລິການໃຫ້ມີຄວາມປະທັບໃຈທຸກຄັ້ງທີ່ມາສວນແຫ່ງນີ້
ພິທີເປີດຢ່າງເປັນທາງການ ໄດ້ຈັດຂຶ້ນເມືອບໍ່ດົນຜ່ານມານີ້ ໂດຍໃຫ້ກຽດເຂົ້າຮ່ວມຕັດແຖບຜ້າແລະ ລັ່ນຄ້ອງຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ທ່ານ ໂພຄໍາ ໄຊຍະສອນ ເຈົ້າເມືອງໄຊເສດຖາ ແລະ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ພ້ອມດ້ວຍແຂກຖືກເຊີນເຂົ້າຮ່ວມ.
(ຂ່າວ:ຍຸພິນທອງ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110