ນາຍົກລັດຖະມົນຕີ ສົ່ງສານຊົມເຊີຍວັນສ້າງຕັ້ງອົງການ ສປຊ ຄົບຮອບ 75 ປີ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 22/09/2020 09:18:30 ຈຳ​ນວນ​​ຢ້ຽມ​ຊົມ 1218 ຄັ້ງ

ພະນະ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​  ແຫ່ງ ສປປ ລາວ ໄດ້​ສົ່ງສານ ເພື່ອ​ສະແດງ​ຄວາມຊົມເຊີຍ ​ເນື່ອງ​ໃນ​ໂອກາດສະເຫຼີມ ສະຫຼອງ​ວັນ​ຄົບຮອບການ​ສ້າງຕັ້ງ​ອົງການ​ສະຫະ​ປະ ຊາຊາດ (ສປຊ) ຄົບຮອບ 75 ປີ ຜ່ານ​ການບັນທຶກ​ວີດີ​ໂອ ຊຶ່ງ​ພິທີ​ດັ່ງກ່າວ​ໄດ້​ຈັດ​ຂຶ້ນ​ໃນ​ວັນ​ທີ 21 ກັນຍາ 2020, ທີ່​ອົງການ ສປຊ ທີ່ນິວ​ຢອກ ສ.ອາ​ເມ​ຣິ​ກາ ໂດຍ​ມີ​ເນື້ອ​ໃນ​ລະບຸ​ວ່າ:  ຂ້າພະເຈົ້າ ໃນນາມ​ ຕາງໜ້າ​ລັດຖະບານ ແລະ ປະຊາຊົນ​ລາວ​ບັນດາເຜົ່າ ຂໍ​ສະແດງ​ຄວາມ​ຊົມເຊີຍ​ອັນ​ອົບ​ອຸ່ນ ມາ​ຍັງ​ອົງການ ສປຊ ເນື່ອງ​ໃນ​ໂອກາດ​ສະເຫຼີມສະຫຼອງ​ວັນ​ສ້າງຕັ້ງ​ອົງການ ສປຊ ຄົບຮອບ 75 ປີ ທີ່​ມີ​ຄວາມ​ໝາຍ​ສຳຄັນ​ໃນ​ມື້​ນີ້. ອົງການ ສປຊ ໄດ້​ຮັບ​ການ​ສ້າງຕັ້ງ​ຂຶ້ນ ບົນ​ພື້ນຖານ​ຄວາມ​ມຸ່ງ​ມາດ​ປາຖະໜາ​ຂອງ​ມວນ​ມະນຸດ ທີ່​ຢາກ​ຢູ່​ຮ່ວມ​ກັນ​ຢ່າງ​ສັນຕິ, ມີ​ການ​ຮ່ວມ​ມື​ກັນ ແລະ ຊ່ວຍເຫຼືອ​ຊຶ່ງ​ກັນ ແລະ ກັນ ເພື່ອ​ພ້ອມ​ກັນ​ເຮັດ​ໃຫ້​ໂລກ​ນີ້​ມີ ສັນຕິພາບ, ສະຖຽນ​ລະ​ພາບ ແລະ ຄວາມ​ຈະເລີນ​ຮຸ່ງເຮືອງ​ ສີ​ວິໄລ.  ຕະຫຼອດ​ໄລຍະ 75 ປີ ຜ່ານ​ມາ, ພວກ​ເຮົາ​ໄດ້​ເຫັນ​ຜົນ ງານ ແລະ ຜົນສຳເລັດ​ທີ່ສຳ ຄັນ​ຫຼາຍ​ດ້ານ​ຂອງ​ອົງການ ສປຊ. ຫຼາຍ​ປະເທດ​ໄດ້​ຮັບ​ຄວາມ​ເປັນ​ເອກະລາດ​ແຫ່ງ​ຊາດ ແລະ ເປັນ​ເຈົ້າ​ຕົນ​ເອງ ໃນ​ການ​ຕັດສິນ​ຊາ​ຕາ​ກຳ​ຂອງ​ຊາດ​ຕົນ; ການ​ເຈລະຈາ ແລະ ປຶກສາ​ຫາລື​ບັນຫາ​ໂດຍ​ສັນ       ຕິ​ວິທີໄດ້​ກາຍເປັນ​ຫຼັກການ ແລະ ແນວ​ໂນ້ມ ໃນ​ການ​ແກ້​ໄຂ ​ຂໍ້​ຂັດ​ແຍ່ງ​ຕ່າງໆ; ການ​ຮ່ວມ​ມື​ເພື່ອ​ການ​ພັດທະນາ ໄດ້​ຮັບ​ການ​ເຊີດ​ຊູ ອັນ​ໄດ້​ເຮັດ​ໃຫ້​ຫຼາຍ​ລ້ານ​ຄົນ​ໃນ​ທົ່ວ​ໂລກ​ໄດ້​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ; ບັນຫາ​ການ​ຈຳແນກ​ເຊື້ອ​ຊາດ​-​ຜິວພັນ, ຄວາມ​ບໍ່​ສະເໝີພາບ​ຍິງ​-​ຊາຍ ໄດ້​ຮັບ​ການ​ແກ້​ໄຂ​ເປັນ​ກ້າວໆ​ມາ ອັນ​ເປັນ​ການ​ປະກອບສ່ວນ​ທີ່​ສຳຄັນ ໃນ​ການ​ປົກ​ປັກ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ສາກົນ ແລະ ການ​ພັດທະນາ​ໄດ້​ເຕີບ​ໃຫຍ່​ຂະຫຍາຍ​ຕົວ. 
ເຖິງ​ວ່າ ສະພາບ​ແວດ​ລ້ອມ​ໃນ 7 ທົດ​ສະ​ວັດ​ກວ່າ​ຜ່ານ​ມາ ຈະ​ແຕກ​ຕ່າງ​ຈາກ​ສະພາບ​ໃນ​ປັດຈຸບັນ, ແຕ່​ຂ້າພະເຈົ້າ​ເຫັນ​ວ່າ ຈຸດປະສົງ​ເປົ້າ​ໝາຍ ແລະ ຫຼັກການ ທີ່​ໄດ້​ກຳນົດ​ໄວ້​ໃນ​ກົດ​ບັດ ສປຊ ແມ່ນ​ຍັງ​ມີ​ຄຸນຄ່າ​ສູງ ແລະ ແທດເໝາະ​ກັບ​ສະພາບ​ປັດ​ຈຸ​ບັນ. ສະນັ້ນ, ມັນ​ຮຽກຮ້ອງ​ໃຫ້​ບັນດາ​ປະເທດ​ສະມາຊິກ ຈົ່ງ​ພ້ອມ​ໃຈ​ກັນ ສືບຕໍ່​ສົ່ງເສີມ​ຈຸດປະສົງ​ເປົ້າ​ໝາຍ​ຂອງ​ອົງການ ສປຊ ແລະ ຊ່ວຍ​ກັນ​ປັບປຸງ​ກົນ​ໄກ​ການ​ປະຕິບັດ​ໜ້າທີ່​ຂອງ​ອົງການ ສປຊ ໃຫ້​ແທດເໝາະ​ກັບ​ສະພາບ​ແວດ​ລ້ອມ​ໃນ​ປັດຈຸບັນ ແນໃສ່​ຮັບປະກັນ​ການ​ປະຕິບັດ​ພາລະ​ບົດບາດ ແລະ ໜ້າທີ່​ຂອງ​ຕົນ ໃຫ້​ໄດ້​ຮັບ​ຜົນສຳເລັດ​ຢ່າງ​ມີ​ປະສິດທິພາບ​ສູງ ແລະ ສືບຕໍ່​ແກ້​ໄຂ​ສິ່ງ​ທ້າ​ທາຍ​ຕ່າງໆ​ຂອງ​ວົງ​ຄະນາ​ຍາດ​ສາ​ກົນ. 
ສປປ ລາວ ພວກ​ຂ້າພະເຈົ້າ ພ້ອມ​ແລ້ວ ທີ່​ຈະ​ຮ່ວມ​ກັບ​ບັນດາ​ປະເທດ​ສະມາຊິກ ປະກອບສ່ວນ​ຢ່າງ​ຕັ້ງໜ້າ ເພື່ອ​ເຮັດ​ໃຫ້ອົງການ ສປຊ ມີ​ຄວາມ​ເຂັ້ມແຂງ, ສາມາດ​ປະຕິບັດ​ໜ້າທີ່​ຂອງ​ຕົນ ໃຫ້​ມີ​ປະສິດທິພາບ​ສູງ ແນໃສ່​ເຮັດ​ໃຫ້ສັນຕິພາບ​ມີ​ຄວາມ​ຍືນ​ຍົງ, ເສດ​ຖະ​ກິດ​-​ສັງຄົມ ຂອງ​ບັນດາ​ປະຊາຊາດ ໄດ້​ຮັບ​ການ​ພັດທະນາ ແລະ ສີວິໄລ​ຮຸ່ງ​ເຮືອງ.”
ອົງການ ສປຊ ໄດ້​ສ້າງຕັ້ງ​ຂຶ້ນ​ໃນ​ວັນ​ທີ 24 ຕຸລາ 1945 ຈຸດປະສົງ​ແມ່ນ​ເພື່ອ​ປົກ​ປັກ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ຂອງ​ໂລກ, ພັດທະນາ​ສາຍ​ພົວພັນ​ມິດຕະພາບ ບົນ​ພື້ນຖານ​ຫຼັກການ​ເຄົາລົບ​ອະທິປະ​ໄຕ​ຊຶ່ງ​ກັນ ແລະ ກັນ, ສິດ​ສະເໝີພາບ ແລະ ການ​ຮ່ວມ​ມື​ສາກົນ​ໃນ​ການ​ແກ້​ໄຂ​ບັນຫາ​ຕ່າງໆ​ຂອງ​ສາກົນ​ໃນ​ດ້ານ​ເສດຖະກິດ, ສັງຄົມ ແລະ ວັດທະນະ​ທຳ. ປັດຈຸບັນ​ອົງການ ສປຊ ມີ​ສະມາຊິກ​ທັງ​ໝົດ​ຈຳນວນ 193 ປະເທດ ແລະ 2 ລັດ​ສັງເກດ​ການ (ລັດ​ວາ​ຕີ​ກັງ ແລະ ລັດ​ປາ​ເລສ​ຕິນ), ມີ​ສຳນັກງານ​ໃຫຍ່​ຕັ້ງ​ຢູ່ ນິວ​ຢອກ ສ. ອາ​ເມ​ຣິ​ກາ ແລະ ມີ​ພາສາ​ທີ່​ໃຊ້​ເປັນ​ທາງ​ການ 6 ພາສາ​ຄື: ອັງກິດ, ຝຣັ່ງ, ຈີນ, ຣັດ​ເຊຍ, ອາ​ຣັບ ແລະ ແອດ​ສະ​ປາຍ​ໂຍນ. ສຳລັບ ສປປ ລາວ ໄດ້​ເຂົ້າ​ເປັນ​ສະມາຊິກ​ອົງການ​ດັ່ງກ່າວ​ໃນ​ວັນ​ທີ 14 ທັນວາ 1955. 
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110