ໄຊຍະບູລີ ຈັດກອງປະຊຸມເຜີຍແຜ່ແນະນຳກອງທຶນ ສົ່ງເສີມກະສິກຳຍືນຍົງ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 22/09/2020 10:26:49 ຈຳ​ນວນ​​ຢ້ຽມ​ຊົມ 1195 ຄັ້ງ

​ກອງ​ປະຊຸມ​ເຜີຍແຜ່​ແນະ​ນໍາ​ການຈັດຕັ້ງ​ປະຕິບັດ​ຂໍ້​ຕົກລົງ​ກອງ​ທຶນ​ສົ່ງເສີມ​ກະສິກຳ​ຍືນ​ຍົງ, ດຳລັດ​ວ່າ​ດ້ວຍ​ສະພາ​ການ​ຄ້າ ແລະ ອຸດສາຫະກຳ ເມືອງ​ໄຊ​ຍະ​ບູ​ລີ ໄດ້​ຈັດຂຶ້ນເມື່ອບໍ່​ດົນ​ຜ່ານ​ມາ ທີ່​ຫ້ອງ​ປະຊຸມ​ຫ້ອງ​ວ່າການ​ເມືອງ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ ທ່ານ ສອນ​ສະຫວັນ ຈັນທະ​ວົງ ຮອງ​ເຈົ້າເມືອງ​ໄຊ​ຍະ​ບູ​ລີ ຜູ້ຊີ້​ນໍາ​ວຽກ​ງານ​ເສດຖະກິດ, ທ່ານ ບຸນ​ຫຼາຍ ຄຳ​ພູມີ ຮອງ​ຫົວໜ້າ​ພະ​ແນ​ກ​ກະສິກຳ ແລະ ປ່າໄມ້ ແຂວງ​ໄຊ​ຍະ​ບູ​ລີ ມີ​ສະ ມາຊິກ​ສະພາ​ປະຊາຊົນ​ແຂວງ, ຫົວໜ້າ, ຮອງ​ຫົວໜ້າ​ຫ້ອງການ, ທີມ​ງານ​ຂອງ​ແຂວງ, ກົມ​ກອງ, ນັກທຸລະກິດ, ຜູ້ປະກອບ​ການ​ດ້ານ​ກະສິກຳ, ສະມາຄົມ, ກຸ່ມ​ຜູ້ຜະລິດ, ກຸ່ມ​ຜູ້ນໍາ​ໃຊ້​ນໍ້າ​ຊົນລະປະທານ ພ້ອມ​ດ້ວຍ​ນາຍບ້ານ​ເທດສະບານ​ເມືອງ​ເຂົ້າ​ຮ່ວມ​ຢ່າງ​ພ້ອມພຽງ.
ໃນ​ກອງ​ປະຊຸມ​ຜູ້ເຂົ້າ​ຮ່ວມ​ໄດ້​ຮັບ​ຟັງ​ດຳລັດ​ວ່າ​ດ້ວຍ​ສະພາ​ການ​ຄ້າ ແລະ ອຸດສາ ຫະກຳ​ແຫ່ງ​ຊາດ ເລກ​ທີ 237/ລບ, ລົງ​ວັນ​ທີ  8  ພຶດສະພາ 2020, ຂໍ້​ຕົກລົງ​ວ່າ​ດ້ວຍ​ການ ຈັດຕັ້ງ​ປະຕິບັດ, ຂໍ້​ຕົກລົງ​ວ່າ​ດ້ວຍ​ການ​ແຕ່ງຕັ້ງ​ສະພາ​ການ​ຄ້າ ແລະ ອຸດສາຫະກຳ​ແຂວງ, ຂໍ້​ກຳນົດ​ວ່າ​ດ້ວຍ​ກົດ​ລະບຽບ​ຂອງ​ສະພາ ແລະ ອຸດສາຫະກຳ ແຂວງ​ໄຊ​ຍະ​ບູ​ລີ, ດຳລັດ​ວ່າ​ດ້ວຍ​ສະມາຄົມ ເລກ​ທີ 238/ລບ ລົງ​ວັນ​ທີ 11 ສິງຫາ 2020 ແລະ ຮັບ​ຟັງ​ຂໍ້​ຕົກລົງຂອງ​ທ່ານ​ເຈົ້າແຂວງ ເລກ​ທີ  559, ລົງ​ວັນ​ທີ 10 ມິຖຸນາ  2020  ວ່າ​ດ້ວຍ​ກອງ​ທຶນ​ສົ່ງເສີມ​ກະ​ສິ​ກໍາ​ຍືນ​ຍົງ ແລະ ຂໍ້​ຕົກລົງ ເລກ​ທີ 560 ວ່າ​ດ້ວຍ​ການ​ຄຸ້ມ​ຄອງ ແລະ ພັດທະນາ​ຊົນລະປະທານ.
ຈາກ​ນັ້ນ, ​ຜູ້ເຂົ້າ​ຮ່ວມ​ກໍໄດ້​ພ້ອມ​ກັນ​ແລກ​ປ່ຽນ​ຄໍາ​ຄິດ​ຄຳເຫັນ​ຊຶ່ງ​ກັນ ແລະ ກັນ. ໃນ​ຕອນ​ທ້າຍ​ຂອງ​ກອງ​ປະຊຸມ​ກໍ​ໄດ້​ເຊັນ​ບົດ​ບັນທຶກ​ການ​ອອກ​ໃບຮັບ​ເງິນ​ປະກອບສ່ວນ​ກອງ​ທຶນ​ສົ່ງເສີມ​ກະສິກຳ​ຍືນ​ຍົງ​ຕື່ມ​ອີກ. 
(ຂ່າວ​-​ພາບ: ອໍາ​ມາລາ ໄຊ​ຍະ​ທັກ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110