ໜັງສືພິມ ປະຊາຊົນ

ເມືອງລະຄອນເພັງ ຂຶ້ນທະບຽນພະພຸດທະຮູບ ທີ່ວັດພະບາດນາດູ່

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 24/09/2020 09:02:48 ຈຳນວນຢ້ຽມຊົມ 16111 ຄັ້ງ

ໃນວັນທີ 22 ກັນຍາຜ່ານມານີ້, ທ່ານ ມະໄລວອນ ສີປະ ເສີດ ຮັກສາການຫົວໜ້າພະແນກຖະແຫຼງຂ່າວ, ວັດທະນະ ທຳ ແລະ ທ່ອງທ່ຽວ (ຖວທ) ແຂວງສາລະວັນ ໄດ້ລົງຕິດ ຕາມການຂຶ້ນທະບຽນພະພຸດທະຮູບທີ່ວັດພະບາດນາດູ່ ເມືອງລະ ຄອນເພັງ ໂດຍການເຂົ້າຮ່ວມຂອງທ່ານຮອງເຈົ້າເມືອງ ຜູ້ຊີ້ນຳວຽກງານວັດທະນະທຳ-ສັງຄົມ, ມີເຈົ້າອະທິການວັດ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ
ທ່ານ ແກ້ວປະສິດ ຊິນນະຈັກ ຮັກສາການຫົວໜ້າຂະ ແໜງວິຈິດສິນ ແລະ ມໍລະດົກໄດ້ລາຍງານກ່ຽວກັບແຜນເຄື່ອນ ໄຫວລົງເກັບກຳຂໍ້ມູນຂຶ້ນບັນຊີພະພຸດທະຮູບ ແລະ ວັດຖຸທີ່ ມີຄ່າຂອງວັດພະບາດນາດູ່. ການລົງເຄື່ອນໄຫວຄັ້ງນີ້ ແມ່ນໄດ້ປະຕິບັດຕາມກົດໝາຍວ່າດ້ວຍມໍລະດົກແຫ່ງຊາດ ສະບັບປັບປຸງ ເລກທີ 44/ສພຊ ລົງວັນທີ 24 ທັນວາ 2013 ແລະ ອີງຕາມຂໍ້ຕົກລົງຂອງກະຊວງ ຖວທ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກ ຖວທ ແຂວງ ເລກທີ 1491/ຖວທ. ເພື່ອເປັນການປົກປັກຮັກສາມໍລະດົກຂອງຊາດ ກໍ່ຄືຂອງທ້ອງຖິ່ນໄວ້ ບໍ່ໃຫ້ຕົກເຮ່ຍເສຍຫາຍ ຮັກສາໄວ້ໃຫ້ເຊັນລູກ - ຫຼານ ແລະ ລຸ້ນຕໍ່ໆໄປໄດ້ເຄົາລົບ, ສັກກາລະບູຊາເປັນທີ່ເພິ່ງທາງດ້ານຈິດໃຈ ແລະ ໄວ້ເປັນສິ່ງສັກສິດຄູ່ບ້ານຄູ່ເມືອງຕະຫຼອດໄປ. ການລົງເກັບກຳຂຶ້ນທະບຽນບັນຊີພະພຸດທະຮູບຢູ່ທີ່ວັດພະບາດນາດູຄັ້ງນີ້, ແມ່ນຈະໃຊ້ເວລາ 2 ອາທິດ ຈຶ່ງຈະສຳເລັດ ແລະ ເປັນແຫ່ງທີ 2 ຂອງແຂວງ ສາລະວັນ.
ທ່ານ ບຸນປອນ ອິນທະສອນ ຮອງຫົວໜ້າພະແນກ ຖວທ ແຂວງ ໄດ້ໃຫ້ສຳພາດວ່າ: ຈຸດປະສົງຫຼັກທີ່ສຳຄັນອີກອັນໜຶ່ງໃນການຂຶ້ນທະບຽນບັນຊີພະພຸດທະຮູບແຫ່ງນີ້ ເພື່ອກຽມຮັບຮອງເອົາວັດພະບາດນາດູ່ ເປັນມໍລະດົກຂັ້ນທ້ອງຖິ່ນກໍຄືຂອງແຂວງ. ນອກນັ້ນ, ພາຍໃນວັດດັ່ງກ່າວ ກໍຈະໄດ້ຈັດແບ່ງເປັນເຂດພັດທະນາ, ຂອບເຂດອະນຸລັກຮັກສາ ແລະ ເຂດຫວງຫ້າມ ເພື່ອສະດວກໃນການຄຸ້ມຄອງຈັດສັນ ແລະ ພັດທະນາດ້ານຕ່າງໆ. ພ້ອມທັງຈະໄດ້ມີການສຳຫຼວດ, ສັນນິຖານວັດຖຸຕ່າງໆ ທີ່ມີຢູ່ໃນວັດເປັນຕົ້ນວັດ ຖຸມີອາຍຸແຕ່ 50 ປີຂຶ້ນໄປ ຈະ ໄດ້ ຂຶ້ນບັນຊີ້ເປັນມໍລະດົກຂັ້ນທ້ອງຖິ່ນ ໂດຍສະເພາະແມ່ນຮອຍພະບາດ ແລະ ຮອຍສັງກະ ລີວ່າມີອາຍຸຈັກປີແລ້ວກໍຍັງບໍ່ຮູ້.
(ພາບ - ຂ່າວ: ສິດຕາ ເພັດວົງສາ)