ຫວ່າງບໍ່​ດົນຜ່ານ​ມາ ທີ່ ສະໂມສອນ​ເມືອງທ່າ​ແຕງ ແຂວງເຊ​ກອງ ໄດ້​ຈັດ​ພິທີປິດ​ຊຸດ​ອົບຮົມ​ທິດ​ສະ​ດີ​ການເມືອງ ແລະ ການ​ປົກຄອງ​ໃຫ້​ເລຂາ​ພັກ​ບ້ານ, ນາຍບ້ານ​ຢູ່​ເມືອງ​ທ່າ​ແຕງ ພາຍຫຼັງ​ດຳເນີນ​ມາ​ເປັນ​ເວລາ 10 ວັນ ໂດຍ​ມີ​ທ່ານ ສົມ​ເພັດ ເອີ​ດ​ລັດດາ ເລຂາ​ພັກ​ເມືອງ ເຈົ້າເມືອງ​ທ່າ​ແຕງ  ທ່ານ ບຸນ​ທັນ ຈູມ​ຈັນທະ​ວົງ ຜູ້ອຳນວຍການ​ໂຮງຮຽນ​ທິດ​ສະ​ດີ​ການເມືອງ​ແລະ​ ການ​ປົກຄອງ​ແຂວງ, ມີ​ຄະນະ​ຮັບຜິດຊອບ​ການ​ຮຽນ ​-​ການ​ສອນ​ຂັ້ນ​ແຂວງ-ຂັ້ນ​ເມືອງ ພ້ອມ​ດ້ວຍ​ນັກ​ສໍາ​ມະ​ນາ​ກອນ​ເຂົ້າ​ຮ່ວມ.
ທ່ານ ຄຳ​ເຂືອງ ໄຊຍະ ​ເສນ ຮອງ​ອໍາ​ນວຍ​ການ​ໂຮງ ຮຽນ​ທິດ​ສະ​ດີ​ການ​ເມືອງ​-​ການ​ປົກຄອງ​ແຂວງ​ເຊ​ກອງ​ກ່າວ​ວ່າ: ການ​ຝຶກ​ອົບຮົມ​ຄັ້ງ​ນີ້​ເພື່ອ​ແນໃສ່ ຜັນ​ຂະຫຍາຍ​ແນວທາງ​ຂອງ​ພັກ ໃຫ້​ເຂົ້າ​ສູ່​ລວງ​ເລິກ ແລະ ລະດັບ​ຄວາມ​ຮູ້, ຄວາມ​ສາມາດ​ທາງ​ດ້ານ​ທິດ​ສະ​ດີ​ການ​ເມືອງ​-​ການ​ປົກຄອງ ໃຫ້​ແກ່​ບັນດາສະມາຊິກ​ພັກ ພະນັກງານ​ນຳພາ,  ພະນັກງານ​ຫຼັກ​ແຫຼ່ງ​ຢູ່​ຮາກ​ຖານ​ໃຫ້​ເຂົ້າໃຈ​ຕໍ່ແນວທາງ​ການ​ນຳພາ​ຂອງ​ພັກ, ການ​ຄຸ້ມ​ຄອງ​ລັດ, ຄຸ້ມ​ຄອງ​ເສດ​ຖະ​ກິດ​-​ສັງຄົມ ແລະ ມີ​ທັດສະນະ​ຫຼັກ​ໝັ້ນ​ໜັກ​ແໜ້ນ, ມີ​ຄວາມ​ເຊື່ອ​ໝັ້ນ​ຕໍ່​ອຸດົມ​ການ​ຂອງ​ພັກ ໂດຍ​ມີ​ສຳ​ມະ​ນາ​ກອນ​ທັງ​ໝົດ 35 ສະຫາຍ ຍິງ 7 ສະຫາຍ, ສະມາຊິກ​ພັກ​ສົມບູນ​ເປັນ​ນາຍບ້ານ ຈຳນວນ 5 ສະຫາຍ ຍິງ 2 ສະຫາຍ  ຮຽນ​ທັງ​ໝົດ 3 ກຸ່ມ​ວິຊາ ລວມ​ມີ 19 ຫົວຂໍ້ ໃຊ້​ເວລາ​ທັງ​ໝົດ 66 ຊົ່ວໂມງ​ເທົ່າ​ກັບ 3 ໜ່ວຍ​ກິດ ຜ່ານ​ການ​ປະ​ເມີນ​ສຳ​ມະ​ນາ​ກອນ​ເຫັນ​ໄດ້​ວ່າ ຄູ-ອາຈານ ​ທີ່​ຈັດ​ປະເພດ​ເຂົ້າ​ໃນ​ການ​ສອນ​ດີ ສອນ​ເກັ່ງ ມີ 14 ທ່ານ ຊຶ່ງ​ສະເລ່ຍ​ຄະແນນ ຈາກ 6 ມາດຕະຖານ​ໄດ້​ຄະແນນ​ສູງ​ສຸດ 9,68 ແລະ ຕ່ຳ​ສຸດ 9,07 ຄະແນນການ​ຝືກ​ອົບຮົມ​ໃນ​ຄັ້ງ​ນີ້ ສຳ​ມະ​ນາ​ກອນ​ສາມາດ​ເຂົ້າໃຈຕໍ່​ແນວທາງ​ນະໂຍບາຍ​ຂອງ​ພັກ​-​ລັດ ໄດ້ 52%  ແລະ ສາມາດ​ຍາດ​ໄດ້ ຄະແນນ​ດີເລີດ​ຈຳນວນ 15 ສະຫາຍ ເທົ່າ​ກັບ 42,88%, ຄະແນນ​ດີ 15 ສະຫາຍ ຍິງ 4 ສະຫາຍ ເທົ່າ​ກັບ 42,88%, ຄະແນນ​ປານ​ກາງ 5 ສະຫາຍ​ເທົ່າ​ກັບ 14,28% ໂດຍ​ລວມ​ຊຸດ​ຝຶກ​ອົບຮົມ​ຄັ້ງ​ນີ້​ແມ່ນ​ຢູ່​ໃນ​ລະດັບ​ດີ. ຈາກ​ນັ້ນ​ ໃນ​ພິທີ​ກໍ​ໄດ້​ມອບ​ໃບ​ຍັ້ງ​ຢືນ​ໃຫ້​ສຳ​ມະ​ນາ​ກອນ ທັງ​ໝົດ 35 ສະຫາຍ ຍິງ 4 ສະຫາຍ ຊຶ່ງ​ໃຫ້​ກຽດ​ມອບ​ຕາມ​ລຳດັບ ໂດຍ ທ່ານ ບຸນ​ທັນ ຈູມ​ຈັນທະ​ວົງ ຜູ້ອຳນວຍການ​ໂຮງຮຽນ​ທິດ​ສະ​ດີ​ການເມືອງ​ແລະ​ ການ​ປົກຄອງ​ແຂວງ​ເຊ​ກອງ.
ໂອກາດ​ນີ້ ທ່ານ ສົມ​ເພັດ ເອີ​ດ​ລັດດາ ​ກໍໄດ້​ໃຫ້​ກຽດ​ໂອ້​ລົມ​ ຊຶ່ງ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ສຳ​ມະ​ນາ​ກອນ ແລະ ຄູ​ຝືກ​ທຸກ​ຄົນ​ທີ່​ມີ​ຄວາມ​ຕັດສິນ​ໃຈ​ສູງ​ມີ​ຄວາມ​ອົດທົນ​ຜ່ານ​ຜ່າ ແລະ ເອົາໃຈໃສ່​ປະຕິບັດ​ລະບຽບ​ຢ່າງ​ເຂັ້ມ​ງວດ, ເຮັດ​ໃຫ້ການ​ຮຽນ​-​ການ​ສອນ​ສຳເລັດ​ຜົນ​ຕາມ​ຄາດ​ໝາຍ ຂະນະ​ດຽວ​ກັນ ເຈົ້າ​ເມືອງ​ທ່າ​ແຕງ​ຍັງ​ໄດ້​ຮຽກຮ້ອງ​ໃຫ້​ເລຂາ​ພັກ​ບ້ານ-ນາຍບ້ານ​ທີ່​ເຂົ້າ​ຮ່ວມ​ຝຶກ​ອົບຮົມ​ຄັ້ງ​ນີ້​ນໍາ​ເອົາ​ເນື້ອ​ໃນ​ຈິດໃຈ ແລະ ບົດຮຽນ​ດັ່ງກ່າວ​ໄປ​ໝູນ​ໃຊ້​ໃນ​ທ້ອງຖິ່ນ​ຂອງ​ຕົນ​ໃຫ້​ເກີດ​ປະໂຫຍດ​ຢ່າງ​ສູງ.
(ພາບ​-​ຂ່າວ: ລັດຕະນາ​ຄຳ​ສົມ​ພູ)