ເມືອງໄຊເສດຖາ ເຊ່ືອມຊຶມດຳລັດປົກປ້ອງເງິນຝາກ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 24/09/2020 10:28:06 ຈຳ​ນວນ​​ຢ້ຽມ​ຊົມ 1219 ຄັ້ງ

   ກອງ​ປະຊຸມ​ເຜີຍແຜ່ດໍາ​ລັດ​ວ່າ​ດ້ວຍ​ການ​ປົກ​ປ້ອງ​ເງິນ​ຝາກໃຫ້​ແກ່​ບັນດາ​ອົງການຈັດ ຕັ້ງ​ພັກ​-​ລັດ ແລະ ບັນດາ​ບ້ານ​ອ້ອມ​ຂ້າງ​ເມືອງ​ໄຊ​ເສດ​ຖາ ນະ ຄອນຫຼວງ​ວຽງ​ຈັນ ໄດ້​ຈັດ​ຂຶ້ນ​ໃນ​ວັນ​ທີ 22 ກັນຍາຜ່ານ​ມາ ທີ່​ສະໂມສອນ ເມືອງ​ດັ່ງກ່າວ  ພາຍ​ໃຕ້​ການ​ເປັນ​ປະທານ​ຮ່ວມ​ຂອງ​ທ່ານ ຄໍາ​ສະຫວັນ ໂຄດ​ໄຊ ຮອງ​ເຈົ້າ ເມືອງ​ໄຊ​ເສດ​ຖາ, ທ່ານ ນາງ ແສງ​ດາວວີ ວົງ​ຄໍາ​ຊາວ ຫົວ​ໜ້າ​ສໍາ​ນັກ​ງານ​ປົກ​ປ້ອງ​ເງິນ​ຝາກ (ສປງ), ມີ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.
ກອງ​ປະຊຸມ​ເຜີຍແຜ່​ໃນ​ຄັ້ງ​ນີ້, ທ່ານ ນາງ ດາວ​ມະນີ​ວອນ ວິໄລ​ວຽງ ຮອງ​ຫົວໜ້າ ສປງ ໄດ້​ຍົກ​ໃຫ້​ເຫັນ ຄວາມ​ເປັນ​ມາ​ຂອງ ສປງ (ກອງ​ທຶນ​ປົກ​ປ້ອງ​ຜູ້​ຝາກ​ເງິນ​ໃນ​ເມື່ອ​ກ່ອນ)  ຮັບ​ການ​ສ້າງຕັ້ງ​ຂຶ້ນ​ໃນ​ວັນ​ທີ 23 ກັນຍາ 1999 ເປັນ​ການຈັດຕັ້ງ​ການ​ເງິນ​ຂອງ​ລັດ, ມີ​ຖານະ​ທຽບ​ເທົ່າ​ກົມ, ເປັນ​ນິຕິບຸກຄົນທີ່​ເຄື່ອນ​ໄຫວ​ໂດຍ​ບໍ່​ສະແຫວງຫາ​ຜົນ​ກໍາ​ໄລ, ມີ​ຄວາມ​ເປັນ​ເອກະລາດ​ທາງ​ດ້ານ​ການ​ເງິນ ແລະ ຢູ່​ພາຍ​ໃຕ້​ການ​ຄຸ້ມ​ຄອງ​ຂອງ​ທະນາຄານ​ແຫ່ງ ສປປ ລາວ ຊຶ່ງ​ມີ​ພາລະ​ບົດບາດ​ເປັນ​ເສນາ​ທິ​ການ​ໃຫ້​ແກ່​ສະພາ​ບໍລິຫານ ສປງ ແລະ ທະນາຄານ​ແຫ່ງ ສປປ ລາວ ໃນ​ການ​ປົກ​ປ້ອງ​ສິດຜົນ​ປະໂຫຍດ​ອັນ​ຊອບ​ທໍາ​ຂອງ​ຜູ້​ຝາກ​ເງິນ ເປັນ​ສ່ວນ​ໜຶ່ງ​ທີ່​ມີ​ຄວາມ​ສໍາ​ຄັນ ໃນ​ຕາໜ່າງ​ຄວາມ​ປອດໄພ​ ຂອງ​ຂະແໜງການ​ເງິນ  ແລະ ວຽກ​ງານ​ສໍາ​ຄັນ​ອື່ນໆທີ່​ຕິດ​ພັນ​ກັບ​ຂະແໜງການ​ທະນາຄານ ແລະ ສະ​ຖາ​ບັນ​ການ​ເງິນ​ຢູ່ ສປປ ລາວ. ພ້ອມ​ນັ້ນ, ຍັງນໍາສະ ເໜີ​ຄວາມ​ຈໍາ​ເປັນ​ຂອງ​ການ​ສ້າງ​ດໍາ​ລັດວ່າ​ດ້ວຍ​ການ​ປົກ​ປ້ອງ​ເງິນ​ຝາກ  ຊຶ່ງ​ເປັນ ການ​ຍົກ​ບົດບາດ​ທາງ​ດ້ານ​ການຈັດຕັ້ງ​ຂອງ ສປງ ໃຫ້​ມີ​ຄວາມ​ໜັກ​ແໜ້ນເຂັ້ມແຂງ; ສ້າງ​ຄວາມ​ເຊື່ອ​ໝັ້ນ​ໃຫ້​ແກ່​ສັງຄົມ​ຕໍ່​ລະ ບົບ ສະ​ຖາ​ບັນ​ການ​ເງິນ ແລະ ປະ ກອບສ່ວນ​ເຂົ້າ​ໃນ​ການ​ຮັກສາ​ສະຖຽນ​ລະ​ພາບ​ຂອງ​ລະບົບ​ສະ​ຖາ​ບັນ​ການ​ເງິນ ຢູ່ ສປປ ລາວ ແລະ ນອກ​ນີ້ ຍັງ​ຍົກ​ໃຫ້​ເຫັນ​ກົດ​ລະບຽບວ່າ​ດ້ວຍ​ກອງ​ທຶນ​ປົກ​ປ້ອງ​ຜູ້​ຝາກ​ເງິນ ໃນ​ເມື່ອກ່ອນ​ ​ສະບັບ ເລກ​ທີ 283/ທຫລ, ລົງ​ວັນ​ທີ 30 ສິງຫາ 1999 ທີ່​ມີ​ບາງ​ມາດຕາຍັງ​ມີ​ຂໍ້​ຈໍາ​ກັດ ແລະ ບໍ່​ສອດຄ່ອງ​ກັບ​ນິຕິ​ກໍາ​ອື່ນໆທີ່​ກ່ຽວ​ຂອງ​ທັງ​ພາຍ​ໃນ ແລະ ສາ​ກົນ. ນອກ​ນີ້, ຍັງ​ນໍາສະເໜີພາບ​ ລວມ​ຂອງ​ດໍາ​ລັດ​ວ່າ​ດ້ວຍ​ການ​ປົກ​ປ້ອງ​ເງິນ​ຝາກ  ແລະ ເນື້ອໃນ​ບາງ​ມາດຕາ​ທີ່ສໍາ​ຄັນຈໍາ​ນວນ​ໜຶ່ງ.
ທ່ານ ນາງ ແສງ​ດາວວີ ວົງ​ຄໍາ​ຊາວ   ໄດ້​ຕີ​ລາຄາ​ສູງ​ຕໍ່​​ຜົນ​ສໍາ​ເລັດ​ໃນ​ການ​ເຊື່ຶອມ​ຊຶມ​ດໍາ​ລັດ​ໃນ​ຄັ້ງ​ນີ້  ແລະ  ເປັນ​ຄັ້ງທໍາ​ອິດ​ທີ່​ດໍາ​ລັດ​ວ່າດ້ວຍການປົກ​ປ້ອງ​ເງິນ​ຝາກໄດ້​ນໍາ​ມາ​ຈັດ​ຕັ້ງ​ເຜີຍແຜ່​ໃຫ້​ອໍາ​ນາດການປົກ ຄອງ​ທ້ອງຖິ່ນຮັບ​ຊາບເຂົ້າໃຈ ແລະ ນໍາ​ໄປ​ຈັດ​ຕັ້ງ​ການ​ເຜີຍແຜ່​ໃຫ້​ປະຊາຊົນ​ບັນດາເຜົ່າ​ຢູ່​ບ້ານ​ຂອງ​ຕົນ ແລະ ຜ່ານ​ການ​ເຜີຍ ແຜ່​ດໍາ​ລັດ​ສະ​ບັັບ​ນີ້​ແລ້ວ​ເຊື່ອ​ໝັ້ນ​ວ່າຈະ​ເປັນ​ການ​ເພີ່ມ​ຄວາມ​ຮັບ​ຮູ້ ແລະ ເຂົ້າໃຈ​ຈະແຈ້ງຕໍ່ກັບ​ ວຽກ​ງານ​ການປົກ​ປ້ອງ​ເງິນ ຝາກ, ການ​ປົກ​ປ້ອງ​ສິດ ແລະ ຜົນ​ປະໂຫຍດ​ອັນ​ຊອບ​ທໍາ​ຂອງ​ຜູ້​ຝາກ​ເງິນ ທັງ​ປະກອບສ່ວນ​ສ້າງ​ຄວາມເຊື່ອ​ໝັ້ນ​ໃຫ້​ແກ່​ຜູ້​ຝາກ​ເງິນຕໍ່​ລະບົບ​ສະ​ຖາ​ບັນ​ການ​ເງິນ​ຢູ່ ສປປ ລາວ ນັບ​ມື້​ສູງ​ຂຶ້ນ.
(ຂ່າວ​-​ພາບ: ຣັດ​ສະໝີ ດວງ​ສັດຈະ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110