ສະແດງສິລະປະ-ວັນນະຄະດີ ແລະ ແຂ່ງຂັນກິລາຮັບຕ້ອນກອງປະຊຸມໃຫຍ່ ຄັ້ງທີ lX ອົງຄະນະພັກກະຊວງ ສສກ.

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/09/2020 13:48:06 ຈຳ​ນວນ​​ຢ້ຽມ​ຊົມ 922 ຄັ້ງ

   ກະຊວງສຶກສາທິການ ແລະ ກິລາ ຫຼື ສສກ ສ້າງຂະບວນການສະແດງສິລະປະ-ວັນນະຄະດີ ແລະ ແຂ່ງຂັນກິລາ ຂຶ້ນເມືອບໍ່ດົນມານີ້ ເພື່ອຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ lX ຂອງອົງຄະນະພັກກະຊວງ ສສກ ຊຶ່ງຈະເປີດຂຶ້ນໃນເດືອນຕຸລານີ້ ຢ່າງເປັນຂະບວນການຄຶກຄື້ນ. ພາຍໃຕ້ການນຳພາຂອງທ່ານ ນາງ ແສງເດືອນ ຫຼ້າຈັນທະບູນ ເລຂາພັກ ລັດຖະມົນຕີ ກະຊວງ ສສກ ທັງເປັນປະທານຄະນະກຳມະການໂອແລັມປິກແຫ່ງຊາດລາວ, ພ້ອມດ້ວຍ ພະນັກງານ, ຄູ-ອາຈານ, ນັກຮຽນ-ນັກສຶກສາ ເຂົ້າຮ່ວມ.
ກິດຈະກໍາຄັ້ງນີ້ ລວມມີ 5 ກິດຈະກໍາຫຼັກ ມີລາຍການສະແດງສິລະປະ ຈໍານວນ 4 ລາຍການຄື: ຟ້ອນໃຕ້ຮົ່ມທຸງພັກ, ຮ້ອງເພງໃຕ້ການນໍາພາຂອງພັກ, ລໍາຄອນສະຫວັນ ແລະ ຟ້ອນສັນລະເສີນພັກ, ກິລາເຕະບານອາວຸໂສປະສົມຍິງ-ຊາຍ, ກິລາດຶງເຊືອກ ຍິງ-ຊາຍ, ກິລາແລ່ນ 5 ຂາ ຍິງ-ຊາຍ ແລະ ມີເຕັ້ນເອໂຣບິກ ແລະ ເຕັ້ນບັດສະຣົບ.
ໃນຈຳນວນລາຍການດັ່ງກ່າວ ມີການແຂ່ງຂັນຊີງໄຊກັນ 2 ປະເພດກິລາ ຈາກ 4 ລາຍການ ກໍຄື ກິລາດຶງເຊືອກຍິງ-ຊາຍ ແລະ ກິລາແລ່ນ 5 ຂາ ຍິງ-ຊາຍ ນອກນັ້ນ ກໍຍັງມີການແຂ່ງຂັນເຕະບານລາຍການພິເສດ ສະເພາະພະນັກງານການນຳ ກະຊວງ ສສກ ທີມຍິງ ພົບກັບ ພະນັກງານການນຳ ກະຊວງ ສສກ ທີມຊາຍ ຜ່ານການແຂ່ງຂັນປະກົດວ່າ: ທີມນັກກິລາວິທະຍາໄລພະລະສຶກສາ ສາມາດກວາດແຊັມໄດ້ເຖິງ 3 ລາຍການ ຈາກ 2 ປະເພດກິລາ ກໍຄື ກິລາດຶງເຊືອກ 1 ລາຍການ ແລະ ກິລາແລ່ນ 5 ຂາ 2 ລາຍການ, ໃນນັ້ນ ສຳລັບກິລາດຶງເຊືອກຊາຍ ທີ 1 ແມ່ນ ວິທະຍາໄລພະລະສຶກສາ ປ້ອງກັນແຊັມໄດ້ 2 ສະໄໝ, ທີ 2 ມະຫາວິທະຍາໄລແຫ່ງຊາດ ແລະ ທີ 3 ວິທະຍາໄລສັບພະວິຊາ ສ່ວນກິລາດຶງເຊືອກຍິງ ທີ 1 ໂຮງຮຽນພອນສະຫວັນກິລາ ຄອງແຊັມສະໄໝທີ 2, ທີ 2 ວິທະຍາໄລເຕັກນິກກະສິກຳ ດົງຄຳຊ້າງ ແລະ ທີ 3 ວິທະຍາໄລພະລະສຶກສາ ແລະ ກິລາແລ່ນ 5 ຂາ ເພດຊາຍ ທີ 1 ວິທະຍາໄລພະລະສຶກສາ, ທີ 2 ວິທະຍາໄລສິລະປະສຶກສາ ແລະ ທີ 3 ມະຫາວິທະຍາໄລແຫ່ງຊາດ ແລະ ກິລາແລ່ນ 5 ຂາ ເພດຍິງ ທີ 1 ວິທະຍາໄລພະລະສຶກສາ, ທີ 2 ວິທະຍາໄລສິລະປະສຶກສາ ແລະ ທີ 3 ວິທະຍາໄລຄູດົງຄຳຊ້າງ. ຂະນະທີ່ຜົນການແຂ່ງຂັນກິລາເຕະບານ ນັດພິເສດ ມິດຕະພາບ ຜົນປະກົດວ່າ ທີມພະນັກງານການນຳ ກະຊວງ ສສກ ທີມຍິງ ເປັນຝ່າຍເອົາຊະນະໄປແບບສຸດມ່ວນ 4-2 ປະຕູ.
(ຂ່າວ-ພາບ: ສົງການ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110